O mĩtũkĩ, Yeova nũkũminĩa andũ mathĩna onthe atũmĩĩte Ũsumbĩ wake. Ũsu nĩ ũvoo mũseo mũno kĩla ũmwe waitũ waĩle kũmanya. Yesũ nĩwendaa aatĩĩi make mathi makatavye andũ onthe ũvoo ũsu. (Mathayo 28:19, 20) Ngũsĩ sya Yeova syĩkaa ata nĩ kana ianĩsye mwĩao ũsu wa Yesũ?

1. Ĩandĩko ya Mathayo 24:14 yĩanĩĩtwʼe ata ũmũnthĩ?

Yesũ aisye atĩĩ: “Ũvoo ũũ mũseo wa Ũsumbĩ ũkatavanwʼa nthĩ yonthe.” (Mathayo 24:14) Ngũsĩ sya Yeova nitanĩaa mũno kũtethya wĩa ũũ wa vata. Tũtavanasya ũvoo mũseo ĩũlũ wa nthĩ yonthe kwa ithyomo mbee wa 1,000! Nĩ kana wĩa ũũ ũnenevete ũu ũtonye kũtethwʼa nesa, nĩvendekaa kĩthito na mũvango mũseo. Tũyĩsa kũũtethya ũndũ vaĩlĩte Yeova atatũtetheesye.

2. Twĩkaa ata nĩ kana tũtavye andũ?

Tũtavanasya kũndũ kwʼonthe kũla andũ methĩawa. O ta Aklĩsto ma ĩvinda ya atũmwa, nĩtũtavanasya “nyũmba kwa nyũmba.” (Meko ma Atũmwa 5:42) Mũvango ũũ nũtũtetheeasya kũvikĩa andũ milioni mbingĩ kĩla mwaka. O na ĩngĩ nĩtũtavanasya kũla kwĩthĩawa na andũ aingĩ nũndũ ti mavinda onthe andũ methĩawa mĩsyĩ. Nĩtũtataa kũtũmĩa nzĩa syonthe ila tũtonya nĩ kana tũtavye andũ ĩũlũ wa Yeova na ieleelo syake.

3. Nũũ wĩ na kĩanda kya kũtavanyʼa ũvoo mũseo?

Aklĩsto onthe ma wʼo nĩmaĩle kũtavanyʼa ũvoo mũseo. Nĩtwosaa kĩanda kĩĩ kwa ũito. Nĩtũtavanasya na kĩthito ũndũ vatonyeka kwosana na ũtonyi witũ nũndũ nĩtwĩsĩ kana mathayũ ma andũ me mũisyonĩ. (Soma 1 Timotheo 4:16.) Tũyĩĩvawa nĩ kana tũtethye wĩa ũũ, nũndũ Mbivilia yaĩtye: “Mwanengiwe mana, nenganai mana.” (Mathayo 10:7, 8) Ti andũ onthe metĩkĩlaa ũvoo ũla tũmatavasya, ĩndĩ tũyĩekaa kũtavanyʼa nũndũ twĩthĩawa tũimwĩwʼa Yeova, na nũtanaa mũno nũndũ wa ũu.

ĨMANYĨSYE MŨNANGO

4. Nĩtwĩkĩaa kĩthito nĩ kana tũvikĩe andũ onthe

VITIO: Kũtavanyʼa Kũvika “Itulu sya Nthĩ” (7:33)

• We nĩ kyaũ kyakwendeesya ĩũlũ wa kĩthito kĩla Ngũsĩ sya Yeova syĩkĩaa nĩ kana itavanyʼe?

Somai Mathayo 22:39 na Alomi 10:13-15, na ĩndĩ mũineenea makũlyo aa maatĩĩe:

• Wĩa witũ wa kũtavanyʼa wonanasya ata kana nĩtwendete atũi maitũ?

• Yeova amonaa ata ala matavanasya ũvoo mũseo? —Sisya mũsoa wa 15.

5. Twĩ atethya ma wĩa vamwe na Ngai

Maũndũ maingĩ ala monekete nĩmonanĩtye kana Yeova nĩwe ũtongoeasya wĩa witũ. Kwa ngelekanyʼo, nthĩ ya New Zealand, mwana-a-asa ũmwe wĩtawa Paul nĩwakomanie na mũndũ mũka ũmwe maitavanyʼa nyũmba kwa nyũmba. Kwakya kũu, mũndũ mũka ũsu nĩwamũvoyete Ngai atũmĩĩte ĩsyĩtwa yake, Yeova, na akamũkũlya atũme mũndũ kwake nĩ kana amũtavye ũvoo. Paul aĩtye atĩĩ: “Ĩtina wa masaa atatũ, nĩnakũnangie mũomo wake.”

Somai 1 Akolintho 3:9, na ĩndĩ mũineenea ĩkũlyo yĩĩ:

• Maũndũ ala monekete, ta ũsu woonekie nthĩ ya New Zealand, monanĩtye ata kana Yeova nĩwe ũtongoeasya wĩa wa kũtavanyʼa?

Somai Meko ma Atũmwa 1:8, na ĩndĩ mũineenea ĩkũlyo yĩĩ:

• Nĩkĩ twendaa ũtethyo wa Yeova nĩ kana twĩanĩsye ũthũkũmi witũ?

We nĩwĩsĩ?

Kĩla kyumwa, ũmbanonĩ witũ wa katĩ katĩ wa kyumwa, nĩtũmanyĩawʼa maũndũ matonya kũtũtetheesya yĩla tũũtavanyʼa. Ethĩwa nĩwaendie ũmbanonĩ ũsu, woonie ata ĩũlũ wa maũndũ asu tũmanyĩawʼa?

6. Nĩtwĩwʼaa mwĩao wa Ngai wa kũtavanyʼa

Ĩvindanĩ ya atũmwa, avĩnganĩsya nĩmatatie kũsiĩĩa aatĩĩi ma Yesũ maikatavanyʼe. Aklĩsto ma mbee nĩmokitĩie ũthasyo woo wa kũtavanyʼa kwa ‘kũtetea ũvoo mũseo kwosana na mĩao.’ (Avilivi 1:7) Ũu nowʼo Ngũsĩ sya Yeova ũmũnthĩ syĩkaa.a

VITIO: Kũtetea Ũvoo Mũseo Kwosana na Mĩao (2:28)

Somai Meko ma Atũmwa 5:27-42, na ĩndĩ mũineenea ĩkũlyo yĩĩ:

• Nĩkĩ tũtesa kũeka wĩa wa kũtavanyʼa? —Sisya mũsoa wa 29, 38, na 39.

KĨLA TWEEMANYĨSYA

Yesũ eeie aatĩĩi make matavanyʼe ũvoo mũseo mbaĩnĩ syonthe. Yeova nũtetheeasya andũ make kũtethya wĩa ũsu.

Makũlyo ma Kũsyokeleela

• Ũvoo mũseo ũtavanawʼa ĩũlũ wa nthĩ yonthe ata?

• Wĩa witũ wa kũtavanyʼa wonanasya ata kana nĩtwendete atũi maitũ?

• We nũkwona wĩa wa kũtavanyʼa ũtonya kũetee mũndũ ũtanu? Nĩkĩ wasũngĩa ũu?

MAŨNDŨ ANGĨ MA KWĨMANYĨSYA

Ĩloele vitio wone ũndũ Ngũsĩ sya Yeova itavanasya taoninĩ ila nene.

Mũvango wa Mwanya wa Kũtavanyʼa na Tũkalĩ twa Mavuku Taoninĩ ya Paris (5:11)

Ngũsĩ sya Yeova syĩkĩte ata nĩ kana itetheesye andũ ala makĩĩĩte nthĩ ingĩ?

Kwĩanĩsya Nzaa ya Kĩ-veva ya Andũ Ala Makĩĩĩte Nthĩ Ingĩ (5:59)

Ĩthukĩĩsye mũndũ mũka ũmwe ayĩelesya ũndũ ũkwatĩte ũtanu nũndũ wa kũtũmĩa ĩvinda yake kũtavanyʼa.

Nĩndanaa Kwĩthĩwa Nanyuvie Wĩa Ũũ (6:29)

Soma wone ũndũ koti imwe syĩkĩte motwi ma vata ala matumĩte wĩthĩwa wĩ ũndũ wĩ laisi kwitũ kũtavanyʼa.

“Atavanyʼa ma Ũsumbĩ Nĩmaendie Kotinĩ” (Ũsumbĩ wa Ngai Nũsumbĩkĩte!, kĩlungu kya 13)

Yesũ amanyĩisye kana no nginya Aklĩsto mavatiswe. (Soma Mathayo 28:19, 20.) Ĩndĩ wʼo ũvatiso nĩ kyaũ? Na mũndũ aĩlĩte kwĩka ata nĩ kana avikĩĩe ĩtambya yĩu?

1. Mũndũ avatisawa ata?

Ndeto “kũvatisa,” yumanĩte na ndeto ya Kĩkiliki ĩla yonanasya “kũinda” kĩwʼũnĩ. Yĩla Yesũ wavatisiwe, aindiwe Ũsĩnĩ wa Yolotani, na ĩndĩ “aumĩla kĩwʼũnĩ.” (Maliko 1:9, 10) O ta ũu, Aklĩsto ma wʼo mavatisawa kwa kũindwa vyũ kĩwʼũnĩ.

2. Ũvatiso wonanasya kyaũ?

Yĩla mũndũ wavatiswa, onanasya kana nĩwĩyumĩtye kũla kwĩ Yeova Ngai. Ĩndĩ we mũndũ eyumasya ata? Mũndũ atanamba kũvatiswa, nũmũvoyaa Yeova amwathĩte kana eenda kũmũthũkũma thayũnĩ wake wʼonthe. Na mboya ĩsu aumasya e weka. Amwathaa Yeova kana eenda kũmũthaitha e weka, na kwĩkaa kwenda kwa Ngai kũyĩthĩwa ũndũ ũla wa vata vyũ thayũnĩ wake. Ethĩawa anyuvĩte ‘kwĩlea mwene, na ayĩendeea kũatĩĩa’ momanyĩsyo ma Yesũ, na ngelekanyʼo yake. (Mathayo 16:24) Yĩla mũndũ weyumya na avatiswa ethĩawa atonya kũtanĩa ngwatanĩo ya vakuvĩ vamwe na Yeova, na athaithi ala angĩ.

3. Mũndũ atonya kwĩka ata nĩ kana avikĩĩe kũvatiswa?

Mũndũ atanamba kũvatiswa nĩ ũndũ wa vata emanyĩsye ĩũlũ wa Yeova na ayĩthĩwa na mũĩkĩĩo mũlũmu vala ũĩ. (Soma Aevelania 11:6.) O ũndũ wamanya maũndũ maingangĩ ĩũlũ wa Yeova, mũĩkĩĩo waku nũendeeaa na kwĩana na ũimwenda mũnango. Na vate nzika kĩu no kĩtume wenda kũtavya angĩ ĩũlũ wake na ũyĩkalaa kwosana na mĩao yake. (2 Timotheo 4:2; 1 Yoana 5:3) Yĩla mũndũ wekala “kwosana na ũndũ Yeova ũkwenda,” kĩu no kĩmũsukume kwĩyumya kwake na aivatiswa.—Akolosai 1:9, 10.a

ĨMANYĨSYE MŨNANGO

4. No twĩmanyĩsye kumana na ũvatiso wa Yesũ

Somai Mathayo 3:13-17 nĩ kana mwĩmanyĩsye maũndũ maingangĩ kumana na ũvatiso wa Yesũ. Na ĩndĩ mũineenea makũlyo aa:

• We Yesũ avatisiwe e kaũkenge?

• Avatisiwe ata? Eekie o kũminzangĩwʼa kĩwʼũ?

Yesũ ambĩĩie kũtethya wĩa wa mwanya ũla wanengetwe nĩ Ngai vaa ĩũlũ wa nthĩ ĩtina wa kũvatiswa. Somai Luka 3:21-23 na Yoana 6:38, na ĩndĩ mũineenea ĩkũlyo yĩĩ:

• Ĩtina wa Yesũ kũvatiswa, nĩ wĩa wĩva wavĩtisye mbee thayũnĩ wake?

5. Ũvatiso nĩ mũvango waĩle kwĩkĩa kĩthito ũvikĩĩe

Ũvatiso nĩ mũvango ũtonya kũũvikĩa. Ĩndĩ wasũanĩa ĩũlũ wa kwĩyumya na kũvatiswa, no wone wĩ ũndũ wĩ vinya mũno. O na ũu wĩ o vo, waendeea kwĩmanyĩsya ĩũlũ wa Yeova na ũimũmanya nesanga, nũtonya kũkwata ũkũmbaũ wa kwosa ĩtambya yĩu ya vata. Mwenda kwona ngelekanyʼo sya andũ amwe ala meekie ũu, ĩloelei VITIO.

VITIO: Aka Ngwatanĩo Yaku na Yeova (1:11)

Somai Yoana 17:3 na Yakovo 1:5, na ĩndĩ mũineenea ĩkũlyo yĩĩ:

• Nĩ kyaũ kĩtonya kũtetheesya mũndũ eyũmbanĩsye kũvatiswa?

1. Twĩyumasya kwa Yeova kwa kũmwatha kana twĩenda kũmũthũkũma thayũnĩ witũ wʼonthe

2. Mũthenyanĩ wa ũvatiso, twĩthĩawa tũyonyʼa ala angĩ kana nĩtwĩyumĩtye kũla kwĩ Ngai

6. Mũndũ avatiswa ethĩawa atwʼĩka ũmwe wa athũkũmi ma Yeova

Yĩla mũndũ wavatiswa, ethĩawa alika ngwatanĩonĩ ya ana-a-asa ya ĩũlũ wa nthĩ yonthe. O na kau tumĩte kũndũ kwĩ kĩvathũkanyʼo na tũeetwe kwa nzĩa syĩ kĩvathũkanyʼo, ithyonthe tũĩkĩĩaa maũndũ mavwʼanene, na tũtongoeawʼa nĩ myolooto o ĩla. Somai Nthimo 3:32 na 1 Vetelo 2:17, na ĩndĩ mũineenea ĩkũlyo yĩĩ:

• Ũvatiso ũtumaa mũndũ ethĩwa na ngwatanĩo yĩilye ata vamwe na Yeova na athaithi ala angĩ?

KĨLA TWEEMANYĨSYA

Yesũ amanyĩisye kana no nginya Aklĩsto mavatiswe. Nĩ kana mũndũ avikĩĩe kũvatiswa, no nginya ethĩwe na mũĩkĩĩo mũlũmu kũla kwĩ Yeova, ekale kwosana na myolooto yake, na ayĩyumya kwake.

Makũlyo ma Kũsyokeleela

• Ũvatiso nĩ kyaũ, na nĩkĩ yĩu ne ĩtambya ya vata mũno?

• Kwĩyumya kũkonanĩtye ata na kũvatiswa?

• Nĩ matambya meva mũndũ waĩlĩte kwosa nĩ kana avikĩĩe kwĩyumya na kũvatiswa?

MAŨNDŨ ANGĨ MA KWĨMANYĨSYA

Ĩmanyĩsye wone kĩla ũvatiso wonanasya na kĩla ũtonanasya.

“Ũvatiso Nĩ Kyaũ?” (Ũvoo wĩ kĩsesenĩ)

Sisya wone maũndũ ala matonya kũtetheesya mũndũ avikĩĩe kũvatiswa.

“Kũmwenda Yeova na Kwenda Kũmũtũngĩa Mũvea no Kũtume Ũtwʼa Kũvatiswa” (Mũsyaĩĩsya, Mwei wa 3, 2020)

Soma wone kĩla kyasukumie mũndũũme ũmwe eyumya na avatiswa.

“Mendaa Nyie Mwene Nĩkunĩkĩlĩle Nĩmanye Kĩla Yo Mbivilia Ĩmanyĩasya” (Mũsyaĩĩsya, Ĩtukũ 1, Mwei wa 2, 2013)

Soma wone nĩkĩ ũvatiso nĩ ĩtambya ya vata mũno, na kĩla waĩle kwĩka nĩ kana wĩyũmbanĩsye kũvatiswa.

“Yo Nĩnaĩle Kũvatiswa?” (Maswali Ambayo Vijana Huuliza—Majibu Yafanyayo Kazi, Ĩvuku ya 2, kĩlungu kya 37)