Makũlyo Kuma Kwa Asomi Maitũ

Nĩkĩ amaitha ma Yesũ moonaa nĩ ĩvĩtyo ĩnene kũlea kũthamba moko?

Ũsu no ũndũ ũmwe katĩ wa maũndũ maingĩ ala amaitha ma Yesũ matũmĩaa kũmũmantha mavĩtyo vamwe na amanyĩwʼa make. Ĩla Mĩao ya Mose nĩyawetete maũndũ mana mũndũ waĩle kwĩka ethĩwa nũkumwa nĩ kĩko kũndũnĩ kwake kwa kĩmbithĩ, ethĩwa e na ũwau wa mangũ, na ethĩwa nĩwakwata simba sya andũ kana sya nyamũ. O na nĩyawetete ũndũ mũndũ ũtonya kũthewʼa ethĩwa nĩ mũvuku. Aĩ atonya kũthewʼa kwa kumya nthembo, kũthamba, kana kũminzangĩwʼa kĩwʼũ.—Ali., kĩl. 11-15; Mot., kĩl. 19.

Amanyĩsya ma ndĩni ya Kĩyuti maatĩanĩaa na kĩla kaũndũ mĩaonĩ ĩsu nĩ kana makaelesye kwa ũliku. Ĩvuku yĩmwe yaeleisye kana kĩndũ kyonthe kĩla kyaĩ kĩtonya kũvukya mũndũ “kyaneeneawa mũno nginya makatia maweta nĩ mavinda ta meva kĩtonya kũvukya mũndũ, ũvuku wakyo ũtonya kũkwatwʼa andũ angĩ mũno wĩana ata na kwa nzĩa yĩva, mĩio na syĩndũ ila itonya kũkwatwa nĩ ũvuku ũsu, na mũthya, syĩthĩo ila syaaĩle kũatĩĩwa nĩ kana mũndũ athewʼe.”

Amaitha ma Yesũ mamũkũlilye atĩĩ: “Nĩkĩ amanyĩwʼa maku matikinyaa kwĩanana na mokũũ ma atumĩa, ĩndĩ nĩmaĩsaa lĩu woo na nzaa mbuku?” (Mko. 7:5) Amaitha asu mayendaa kwasya atĩ mũndũ nĩũkwatwa nĩ ũwau anaya na moko mate matheu. Kwosana na kĩthĩo kyoo, amanyĩsya asu ma ndĩni maasyaa kana no nginya mũndũ etĩkĩwʼe kĩwʼũ mokonĩ atanambĩĩa kũya. Ĩvuku yĩla yawetwa vau ĩũlũ yasyokie yasya atĩĩ: “O na no kwakũlanawʼa nĩ mĩio yĩva yaaĩlĩte kwĩtĩkĩsya mũndũ kĩwʼũ, nĩ kĩwʼũ kĩva kyaaĩlĩte kũtũmĩwa, nũũ waaĩlĩte kwĩtĩkĩsya ũla ũngĩ kĩwʼũ, na aaĩlĩte kũmwĩtĩkĩsya kuma va nginya va.”

Yesũ o na ndaatinda aatĩanĩe na mĩao ĩsu atongoi asu ma Ayuti maseũvĩtye. Amasũngĩie o kwa ũkuvĩ amea: “Isaia nĩwathanie nesa ũndũ wenyu anganganʼya, o ũndũ kũandĩkĩtwe, Andũ aa nĩmandaĩaa na ilomo syoo, ĩndĩ ngoo syoo syĩ kũasa nakwa [Yeova]. Ĩndĩ manthaithaa ũthaithi wa mana, makĩmanyĩsya momanyĩsyo, nao nĩ mawĩaĩo ma andũ. Nĩmũtiaa mĩao ya Ngai, na kũkwataa mũno mokũũ ma andũ.”—Mko. 7:6-8.