Yesũ Nĩwavoisye Kelĩtu na Mũndũũme Waĩ Mwau Matũ

Yesũ amina kũneena na Avalisi na kũmakanyʼa nũndũ wa kũatĩĩa syĩthĩo itaĩle, nĩwaumie kĩsionĩ kya Kalilii e na amanyĩwʼa make. Maendie kyalo kya kĩlomita mbingĩ melekele ngalĩko ya ũthũĩlonĩ wa syũa, kĩsionĩ kya Tile na Sitoni kĩla kĩ nthĩ ya Voenike.

Mavika kũu, Yesũ nĩwoonie nyũmba ũtonya kwĩkala ĩndĩ ndendaa andũ maimanya vala ũĩ. Ĩndĩ o na e kĩsionĩ kĩu, ndaĩ atonya kwĩvitha ndakoneke nĩ andũ. Ve mũndũ mũka Mũkiliki wasyaĩwe kĩsionĩ kya Voenike wookie vala ve Yesũ na ambĩĩa kũmwĩsũva akyasya atĩĩ: “Mwĩaĩi, mbĩwʼĩe tei Mwana wa Ndaviti. Mwĩĩtu wakwa nũkũthĩnwʼa mũno nĩ ndaimoni.”—Mathayo 15:22; Maliko 7:26.

Ĩtina wa kavinda kanini, amanyĩwʼa ma Yesũ nĩmamũthingʼĩĩisye makĩmwĩa: “Mũlũngye, nũndũ akwetye kũtũatĩĩa aĩĩte.” Yesũ nĩwatavisye amanyĩwʼa kĩtumi kya kũlea kwĩthukĩĩsya mũndũ mũka ũsu kwa kũmea atĩĩ: “Ndyaatũmwa kwa mũndũ ũngĩ o na wĩva ate o kwa malondu ala maaie ma nyũmba ya Isilaeli.” Ĩndĩ mũndũ mũka ũsu ndaaeka kũmwĩsũva Yesũ. Nĩwaendie ĩngĩ vala ve Yesũ na atulya ndu mbee wake akyasya: “Mwĩaĩi, ndethye!”—Mathayo 15:23-25.

Yĩla Yesũ wawetie woni ũtaĩle ũla Ayuti meethĩawa nawʼo ĩũlũ wa andũ ma mbaĩ ingĩ, noĩthwa endaa kũmanya kana kwa wʼo mũndũ mũka ũsu aĩ na mũĩkĩĩo mũlũmu. Yesũ aisye atĩĩ: “Ti ũseo kwosa mũkate wa syana na kwĩkĩsya tũkitĩ.” (Mathayo 15:26) Kwa kũtũmĩa ndeto “tũkitĩ,” Yesũ oonanasya kana nĩwamewʼĩaa tei andũ ala mataĩ Ayuti. O na no nginya wĩthĩe ũthyũ wake na wasya wake nĩsyoonanisye ũndũ waĩ na tei.

Vandũ va kũthata nũndũ wa ndeto ila wataviwʼe nĩ Yesũ, mũndũ mũka ũsu nĩwoonanisye kana nĩwĩsĩ Ayuti mayĩthĩawa na ngwatanĩo na andũ ma mbaĩ ingĩ. Ĩndĩ enyivĩtye amwĩie Yesũ atĩĩ: “Nĩ wʼo Mwĩaĩi, ĩndĩ o na tũkitĩ nĩtũĩsaa tũtilĩkango tũla twavalũka kuma mesanĩ ya ene matwʼo.” Yesũ nĩwamanyie ndeto sya mũndũ mũka ũsu syumĩte ngoonĩ na kana e na wĩnyivyo na kwoou amwĩa: “Mũndũ mũka, mũĩkĩĩo waku nĩ mũnene, eka kwĩthĩwe kwaku o ũndũ ũkwenda.” (Mathayo 15:27, 28) O na kau kelĩtu kau kake kayaĩ vau vakuvĩ na Yesũ, wendi wa mũndũ mũka ũsu nĩweanĩie! Yĩla mũndũ mũka ũsu wenũkie, eethĩie kelĩtu kau kavoie na kakomete kĩtandanĩ nũndũ “ndaimoni [yaĩ] yumie”!—Maliko 7:30.

Yĩla Yesũ na amanyĩwʼa make maumie Voenike, nĩmaendie melekele ngalĩko ya ĩũlũ ya Ũsĩ wa Yolotani. Veonekana kana makĩlanĩlye Ũsĩ wa Yolotani me ngalĩko ya ĩũlũ ya Ũkanga wa Kalilii na mathi nginya kĩsionĩ kya Ndekavoli. Me kũu, nĩmaendie vandũ kĩĩmanĩ, ĩndĩ ĩkomano yamona. Andũ mookie vala ve Yesũ maetete andũ moo ala maĩ iwete, onzu mamutha, matoonaa, na mataneenaa. Makomisye awau moo maaũnĩ ma Yesũ, na amavosya. Yĩla andũ moonie ũu, nĩmasengʼie mũno na mamũtaĩa Ngai wa Isilaeli.

Katĩ wa andũ asu Yesũ wavoisye, ve mũndũũme ũmwe waĩ mwau matũ na ũtaneenaa. Yesũ avoisye mũndũũme ũsu kwa nzĩa ya mwanya mũno. Kwakũna visa wone ũndũ mũndũũme ũsu weewʼaa ate mwĩanĩe e mbee wa ĩkomano. Na nũndũ Yesũ nũtonya kwĩthĩwa amanyie ũndũ mũndũ ũsu ũkwĩwʼa, nĩwamwosie na amũtwaa vaasa na ĩkomano. Me vau me oka, Yesũ nĩwoonisye mũndũũme ũsu kĩla ũvangĩte kwĩka. Eekĩie syaa syake matũnĩ ma mũndũ ũsu, na ĩtina wa kũtwʼĩla mata, amũkiita ũĩmĩ. Ĩtina wa ũu, Yesũ asyaisye ĩtunĩ na asya “Evavatha,” ũalyũlo wayo nĩ, “Vingũka.” Matũ ma mũndũũme ũsu nĩmavingũkie, o na nĩwambĩĩie kũneena nesa. Yesũ ndendaa ũndũ ũsu ũmanyĩke nĩ andũ nũndũ endaa andũ mamũĩkĩĩe nũndũ wa maũndũ ala mekwĩyonea na mekwĩyĩwʼĩa na matũ moo.—Maliko 7:32-36.

Ũtonyi wa Yesũ wa kwĩka syama nene ta isu nĩwakiitie ngoo sya andũ, na nĩkyo kĩtumi “masengʼie mũno vyũ.” Ũu watumie masya: “Ekaa maũndũ onthe nesa. O na nũtumaa ala matewʼaa nthĩ mewʼa, na ala mataneenaa maneena.”—Maliko 7:37.