¹⁰ Meli na Yosevu mavika meethĩie kataoni kau kausĩe andũ. Aingĩ maĩ mavikie mbee woo nĩ kana maandĩkĩthwʼe, na kwoou mayaakwata mwanya nyũmbanĩ ya aeni.b Vayaĩ vandũ vangĩ makoma ate o kĩtũũnĩ kya indo. Kwasũanĩa ũndũ Yosevu waambĩĩie kũthĩnĩka oona mũka ambĩĩa kũkwatwa nĩ woo ũtaĩ aaĩwʼa ĩngĩ na waendeea kwongeleka nginya amanya nũkwaũnya. Na kũthũkya ũvoo ambĩĩe kwaũnyĩa kĩtũũnĩ kya indo!

11. (a) Nĩkĩ aka onthe matonya kũelewa ũndũ Meli weewʼaa? (b) Nĩ kwa nzĩa syĩva Yesũ waĩ mũsyawa “wa mbee”?

¹¹ Aka nĩmatonya kũelewa ũndũ Meli weewʼaa. Myaka ta 4,000 mĩvĩtu, Yeova aĩ athanie kana aka onthe makeewʼaa woo maisyaa nũndũ wa naĩ ĩla twatiĩwe nĩ asyai maitũ ma mbee. (Mwa. 3:16) Na vaiĩ ũndũ ũwetetwe Maandĩkonĩ ũkwonyʼa kana Meli nĩwĩthĩwa ataakwatwa nĩ woo ũsu. Luka ndaeleetye woo ũla Meli weewie ayaũnya. Vandũ va ũu eekie o kũandĩka kana “[nĩwasyaie] kana kake ka mbee kavĩsĩ.” (Luka 2:7) Kau nĩko kaĩ “kana kake ka mbee” katĩ wa syana syake mũonza iinyiva. (Mko. 6:3) Ĩndĩ mwana ũũ Meli waĩ anasyaa, esaa kwĩthĩwa e kĩvathũkanyʼo na syana isu ingĩ. Eka o kwĩthĩwa newe wake wa mbee, aĩ “wa mbee katĩ wa syĩndũ syonthe ila syoombiwe,” na aĩ Mwana mũsyawa weka wa Ngai!—Ako. 1:15.

12. Meli akomisye mwana wake va, na ũu wĩ kĩvathũkanyʼo ata na sinema ila andũ maseũvasya sya ĩsyawa ya Yesũ?

¹² Meli amina kũsyaa kana kau oou, nĩvo twĩthĩanaa na ndeto ii syĩsĩkĩe mũno: “Na akavwʼĩka ngũa na akakomya mũvalatĩnĩ.” (Luka 2:7) Andũ ĩũlũ wa nthĩ yonthe masolaa vala Yesũ wasyaĩwe ve vandũ vaseo na va kwendeesya. O na nĩmaseũvasya sinema sya ĩsyawa yake monanĩtye asyaĩwe vandũ vaseo mũno. Ĩndĩ kwavindĩĩsya nesa ũndũ vala wasyaĩwe vailye. Asyaĩwe mũvalatĩnĩ, ũla nĩ ĩsandũkũ ĩnene yĩthĩawa yĩseũvĩtwʼe ya kwĩkĩĩa indo ũĩthyo. Na ndũkolwe kana saa isu Yosevu na Meli maĩ kĩtũũnĩ kya indo, o kĩla twĩsĩ ũmũnthĩ kĩthĩawa na kĩko kingĩ na mũuke mũthũku. Kwa wʼo, nĩ mũsyai wĩ va wenda mwana wake asyaĩwe vandũ ta vau atonya kũkwata vandũ vangĩ vaseango? Asyai aingĩ mendaa kwĩka syana syoo maũndũ ala maseo vyũ. Kwoou no nginya wĩthĩe Meli na Yosevu nĩmendaa mũno Mwana wa Ngai asyaĩwe vandũ vala vaseo vyũ.

13. (a) Meli na Yosevu meekie kyonthe kĩla matonya meanĩsye kyaũ? (b) Asyai ala oĩ matonya kwĩka ata ũmũnthĩ maatĩĩe ngelekanyʼo ya Meli na Yosevu?

¹³ Ĩndĩ o na ũu wĩ o vo, mayaaĩtĩkĩla kũsũanĩĩa mũno syĩndũ ila mataĩ nasyo. Vandũ va ũu, mo meekie kyonthe kĩla matonya masũvĩe mwana woo. Kwa ngelekanyʼo, Meli nĩwaĩkĩĩthisye mwana ũsu nĩ mũsũvĩĩku nũndũ nĩwamũvwʼĩkie na aĩkĩĩthya kana ndekwĩwʼa mbevo na amũkomya mũvalatĩnĩ. O na kau Meli aĩ na mawetu maingĩ, ndaaĩtĩkĩla mamũvĩngĩĩse olwe nĩ kũsũvĩa mwana wake. E na Yosevu, nĩmeesĩ kana ũndũ ũla wa vata vyũ nĩ kwĩanĩsya mavata ma kĩ-veva ma mwana woo. (Soma Kũtũngĩlĩlwa Kwa Mĩao 6:6-8.) Ũmũnthĩ asyai ala oĩ nĩmaĩkĩĩthasya kana nĩmatetheesya syana syoo imwende Yeova, o na kau andũ aingĩ ũmũnthĩ maimwendete.