Yesũ Nĩwoonanisye Ũndũ Tũtonya Kũkwata Ũtanu

Yesũ aĩ anauma kũtũngĩlĩĩla maũndũ ala mũndũ waĩle kwĩka yĩla ũkũvoya. Ĩndĩ ve maũndũ angĩ watũngĩlĩĩile eka o ũndũ ũsu ũkonetye mboya. Yĩla Yesũ weekaa syama e kĩsionĩ kya Kalilii, andũ nĩmamũneeneie naĩ kwa kwasya kana atũmĩaa vinya wa mũnene wa ndaimoni kwĩka syama. Yesũ e Yutia, andũ nĩmatũngĩlĩĩile ĩngĩ maũndũ asu mathũku mamũneeneete.

Yĩla Yesũ waumisye ĩla ndaimoni yatumaa mũndũ aemwa nĩ kũneena, andũ aingĩ nĩmatanie mũno. Ĩndĩ ũndũ ũsu ndwaaendeesya andũ ala mamũneeneaa Yesũ naĩ. Vandũ va ũu matũngĩlĩĩile ndeto o ila maneenete mwambĩĩonĩ kwa kwasya kana “aumasya ndaimoni atũmĩĩte vinya wa Veelisevuli, mũnene wa ndaimoni.” (Luka 11:15) Namo angĩ nĩmendaa ũĩkĩĩthyo mũnenange kuma vala ve Yesũ na nũndũ wa ũu mamwĩa amonyʼe kyama kuma ĩtunĩ.

Yĩla Yesũ wamanyie kana andũ asu meĩka kũmũtata, amasũngĩie o ũndũ wasũngĩie ala andũ mamũneeneaa naĩ e Kalilii. Nĩ kenda onanyʼe kana kĩla ũsumbĩ ũaanĩkĩte ndũlea kũvalũka, Yesũ akũlilye atĩĩ: “Satani akethĩwa e mũaanĩku, ũsumbĩ wake nĩwũũngama?” Na ĩndĩ Yesũ amatavya ĩmwe kwa ĩmwe amea: “Ethĩwa numasya ndaimoni nĩtũmĩĩte kyaa kya Ngai, Ũsumbĩ wa Ngai nĩwamũvĩtũkie mũtesĩ.”—Luka 11:18-20.

Yĩla Yesũ wawetie ĩũlũ wa “kyaa kya Ngai,” ala mamwĩthukĩĩsye maĩle kwĩthĩwa malilikanile ũndũ weesĩkĩe mũno nĩ Aisilaeli. Ala maĩ nyũmbanĩ ya ũsumbĩ ya Valao na moona kyama kĩla Mose weekie maneenie na wasya mũtũlu masya: “Kĩĩ nĩ kyaa kya Ngai.” O na ĩngĩ, ĩla Mĩao Ĩkũmi yaandĩkĩtwe ĩũlũ wa ala masengea elĩ ma mavia yaandĩkiwe nĩ “kyaa kya Ngai.” (Kuma 8:19; 31:18) O ta ũu, “kyaa kya Ngai” kana veva mũtheu nĩwʼo wamũtetheeasya Yesũ kumya ndaimoni na kũvosya andũ ala awau. Kwoou no twasye kana avĩnganĩsya asu nĩmavĩtũkĩtwe nĩ Ũsumbĩ wa Ngai, nũndũ Yesũ, ũla nĩwe waĩ atwʼĩke Mũsumbĩ wa Ũsumbĩ wa Ngai aĩ vau maĩ aendeee kwĩanĩsya mawĩa asu.

Ũtonyi wa Yesũ wa kumya ndaimoni waĩkĩĩthasya kana e na vinya ĩũlũ wa Satani, o tondũ mũndũ wĩ vinya mwingĩ ũtonya kũthi nyũmbanĩ ya kĩ-ũsumbĩ na aikĩlya vinya mũsungi wayo wĩ na mĩio mĩseo ya kaũ. Yesũ nĩwasyokie atũngĩlĩĩla ĩla ngelekanyʼo ya veva mũvuku umaa mũndũnĩ. Mũndũ ũla waumwa nĩ veva ũsu mũvuku alea kusũsya ngoo yake maũndũ maseo, veva ũsu ũsyokaa na maveva angĩ mũonza, na mũminũkĩlyo wa mũndũ ũsu ũyĩthĩwa wĩ mũthũku kũte mwambĩlĩlyo wake. (Mathayo 12:22, 25-29, 43-45) Ngelekanyʼo ĩsu ya Yesũ yoonanasya ũndũ mbaĩ ya Isilaeli yaendeee naĩ.

Mũndũ mũka ũmwe wamwĩthukĩĩsye Yesũ nĩwakiitiwe ngoo nĩ ndeto isu nginya asya: “Nĩ ĩtanu ĩvu yĩla yakũkuie na nondo ila woongie!” Aka Ayuti maĩ na wĩkwatyo wa kwĩsa kũsyaa mwathani, na mũno mũno Masia. Kwoou nĩvatonyeka mũndũ mũka ũsu akethĩwa asũanĩaa kana Meli eethĩawa e mũtanu nũndũ nĩwe inyia wa Yesũ, ũla waĩ mwalimũ mũseo. Ĩndĩ Yesũ nĩwalũngile ndeto sya mũndũ mũka ũsu na oonanyʼa kĩla kĩtonya kũtuma mũndũ ethĩwa na ũtanu wa wʼo. Aisye atĩĩ: “Aiee, vandũ va ũu, nĩ atanu ala mewʼaa ndeto ya Ngai na kũmĩkwata!” (Luka 11:27, 28) Vaiĩ ĩvinda Yesũ waatata kwonanyʼa kana Meli nĩwaĩle kũnengwa ndaĩa nenange kwĩ andũ ala angĩ. Vandũ va ũu, mũndũ ethĩawa na ũtanu wa wʼo ethĩwa nĩ mũthũkũmi mũĩkĩĩku wa Ngai, ĩndĩ ti aĩ nũndũ ve maũndũ manene wĩanĩĩtye kana ve ũndũ ũilenyʼe na andũ angĩ.

Andũ nĩmendaa Yesũ amonyʼe kyama kuma ĩtunĩ, ĩndĩ o tondũ weekie e Kalilii, nĩwamakanisye. Ameie kana vaiĩ kyama makona eka “kyama kya Yona.” Yona aĩ ta kyama kwĩsĩla maũndũ ala meekĩkie thayũnĩ wake, namo nĩ kwĩkala mĩthenya ĩtatũ ĩvunĩ ya ĩkũyũ, na kũtavanyʼa na ũkũmbaũ nginya andũ ma Nineva meelila. Yesũ aisye atĩĩ: “Ĩndĩ sisya! mũndũ mũnene kwĩ Yona e vaa.” (Luka 11:29-32) O na ĩngĩ Yesũ nĩ mũnene kwĩ Solomoni, ũla waĩ na ũĩ mwingĩ mũno nginya mũsumbĩ mũndũ mũka wa Sieva ooka kwĩyonea ũĩ ũsu.

Yesũ ongeleeile kwasya atĩĩ: “Mũndũ akwatya taa, ndawiaa vandũ vevithanĩtye kana kũũkunĩkĩlya kĩkavũ, ĩndĩ awilĩĩlaa kĩndũnĩ kya kwilĩĩla taa.” (Luka 11:33) Yesũ nũtonya kwĩthĩwa oonanasya kana kũmanyĩsya andũ asu na kwĩka syama mene no ũndũ ũmwe na kũvithanyʼa kyeni kya taa mũkwatye. Nũndũ mayendaa kwĩka kĩla kyaĩle, mayaaelewa momanyĩsyo na syama ila Yesũ weekaa.

Yesũ aĩ anamina kumya ũla veva mũvuku na kũtuma ũla mũndũũme ũtaneenaa ambĩĩa kũneena. Ũndũ ũsu waĩle kwĩthĩwa watumie andũ menda kũmũtaĩa Ngai na kũtavya andũ angĩ ĩũlũ wa maũndũ ala Yeova wĩanĩĩtye. Nũndũ wa ũu Yesũ nĩwakanisye andũ ala mamũneeneaa naĩ. Ameie atĩĩ: “Kwoou, ĩthĩwa wĩ metho, nĩ kana kyeni kĩla kĩ nthĩnĩ waku kĩikethĩwe kĩvindu. Kwondũ wa ũu, ethĩwa mwĩĩ waku wĩ na kyeni na ndwĩ na vandũ ve na kĩvindu, ũkeethĩwa wĩ na kyeni o tondũ taa ũkũmulĩkĩlaa na kyeni kyawʼo.”—Luka 11:35, 36.