Yesũ Nĩwanenganie Ũtao Ĩũlũ wa Ũthwii

Ĩvinda yĩla Yesũ wathoketwʼe nĩ Mũvalisi ũmwe maĩsanĩe, andũ ngili mbingĩ nĩmoombanĩte vau nza mamweteele. Ũu nowʼo kweethĩiwe ĩvinda yĩla waĩ Kalilii. (Maliko 1:33; 2:2; 3:9) Andũ aingĩ ala moombanĩte ĩvindanĩ yĩĩ waĩ Yutia mendaa kũmwona na kũmwĩthukĩĩsya, kĩvathũkanyʼo na Avalisi ala maĩ vamwe nake nyũmba maiya.

O na kau ve andũ aingĩ maĩ vala ve Yesũ, ve ndeto sya vata mũno watavisye amanyĩwʼa make. Ameie atĩĩ: “Ĩkalai mwĩsũvĩanĩte na ĩlawa ya Avalisi, nayo nĩ wanganganyʼa.” Yesũ nĩwanengete amanyĩwʼa ũtao ũsu ĩvinda ĩvĩtu, ĩndĩ maũndũ ala woonie ĩvinda yĩla waĩsaa vamwe na Avalisi nĩmoonanisye kana ũtao ũsu amanyĩwʼa maaĩle kũwosa kwa ũito mũnango. (Luka 12:1; Maliko 8:15) Nĩvatonyeka Avalisi makethĩwa mavithanasya ũthũku woo kwa kwĩka tũmaũndũ tũkwonanyʼa kana nĩmeyumĩtye vyũ kũmũthaitha Ngai, ĩndĩ maĩ andũ athũku na ũthũku woo nĩwaaĩle kũvuanwʼa. Nĩkyo kĩtumi Yesũ waisye atĩĩ: “Vaiĩ ũndũ mũvwʼĩke nesa ũtakavuanwʼa, na vaiĩ kĩndũ kya kĩmbithĩ kĩtakamanyĩka.”—Luka 12:2.

Nĩvatonyeka andũ aingĩ katĩ wa asu mookĩte vala ve Yesũ makethĩwa maumĩte Yutia na kwoou mayeewʼĩte Yesũ aimanyĩsya e Kalilii. Kwoou Yesũ nĩwatũngĩlĩĩile maũndũ ma vata ala wamanyĩĩtye mbeenĩ. Eeie onthe ala mamwĩthukĩĩsye: “Mũikamakĩe ala moaaa mwĩĩ na ĩtina wa vau mai ũndũ ũngĩ matonya kwĩka.” (Luka 12:4) Na o tondũ weekĩte mbeenĩ, nĩwakindĩlĩĩile kana aatĩĩi make nĩmaaĩlĩte kũĩkĩĩa vyũ kana Ngai akamasũvĩa. O na ĩngĩ nĩmaaĩlĩte kũmwĩtĩkĩla Mwana wa mũndũ na maimanya kana Ngai no amatetheesye.—Mathayo 10:19, 20, 26-33; 12:31, 32.

Yesũ aendeee kũmanyĩsya, ve mũndũũme ũmwe kuma ĩkomanonĩ yĩu wamwĩie atĩĩ: “Mũmanyĩsya, ĩa mwana-a-ia andaĩe ũtiĩwa.” (Luka 12:13) Mĩao yaĩtye kana ĩkithathi yaĩle kũnengwa kũndũ kwĩlĩ kwa ũtiĩwa, na kwoou vayaĩ vatonya kwĩthĩwa na kĩtuu andũ maiaana ũtiĩwa. (Kũtũngĩlĩlwa Kwa Mĩao 21:17) Ĩndĩ, veonekana kana mũndũũme ũsu endaa ũtiĩwa mũnene kwĩ ũla wake. Yesũ nĩwatũmĩie ũĩ nĩ kana ndakakwate ũndũ ũsu mbau. Amũkũlilye-ĩ: “Mũndũ we, nũũ ũla ũndwʼĩte mũsili kana mwĩwʼanĩthya katĩ wenyu mwĩ elĩ?”—Luka 12:14.

Ĩtina wa ũu Yesũ nĩwanengie onthe ala mamwĩthukĩĩsye ũtao amea: “Ĩkalai mwĩ metho na mũyĩsũvĩana na mĩthemba yonthe ya ĩtomo, nũndũ o na yĩla mũndũ wĩ na malĩ mbingĩ, thayũ wake ndumanaa na syĩndũ ila wĩ nasyo.” (Luka 12:15) O na ethĩwa mũndũ e na ũthwii wĩana ata, ĩvinda yĩmwe no wĩkwʼa na aitia syĩndũ ĩsu syonthe. Yesũ nĩwatũmĩie ngelekanyʼo ĩtesa kũla kũkindĩlĩĩla ũndũ ũsu, na ngelekanyʼo ĩsu yoonanasya vata wa kwĩthĩwa na ngwatanĩo nzeo na Ngai. Ameie:

“Mũũnda wa mũndũ ũmwe mũthwii nĩwasyaie nesa. Na kwoou ambĩĩa kũsũanĩa, ‘Yu nĩĩka ata nũndũ ndi na vandũ nũmbanĩsya ngetha yakwa?’ Na ĩndĩ asya, ‘Ũũ nĩwʼo ngwĩka: Nĩomboa makũmbĩ makwa na ndyaka angĩ manene, na vau nĩ vo ngũmbanĩsya ngetha yakwa yonthe na syĩndũ syakwa syonthe, na ngeea thayũ wakwa: “Wĩ na syĩndũ mbingĩ nzeo syũmbanĩtwʼe kwondũ wa myaka mingĩ; thũmũa, ũye, ũnywʼe, na ũitana.”’ Ĩndĩ Ngai amwĩa, ‘We mũndũ mũtumanu, ũtukũ ũũ nĩmekwenda thayũ waku. Nũũ ĩndĩ ũkatiĩwa syĩndũ isu wiĩte?’ Kwoou, ũu nĩwʼo kwĩthĩawa ethĩwa mũndũ aiĩte ũthwii kwondũ wake na ti mũthwii kwa Ngai.”—Luka 12:16-21.

Amanyĩwʼa ma Yesũ vamwe na ala angĩ mamwĩthukĩĩsye maĩ matonya kũkwatwʼa nĩ kĩtei kya kũmantha malĩ. O na mawĩmakĩo ma thayũ maĩ matonya kũmavĩngĩĩsa makaeka kũmũthũkũma Yeova na kĩthito. Kwoou, Yesũ nĩwatũngĩlĩĩile ũtao mũseo wamanengete vakuvĩ mwaka ũmwe na nũsu mũvĩtu nthĩnĩ wa Ũtavanyʼa wa Kĩĩmanĩ. Ameie:

“Mũikemakĩe nũndũ wa mathayũ menyu ĩũlũ wa kĩla mũkaya kana nũndũ wa mĩĩ yenyu ĩũlũ wa kĩla mũkekĩa. . . . Sisyai nesa ngũngũũ: Iivandaa mbeũ kana ikaketha; iyĩthĩawa na makũmbĩ kana kũndũ kwa kwia syĩndũ; o na ũu wĩ o vo, Ngai nũiĩthasya. Inywʼĩ mũi ma vata mũno kwĩ nyũnyi? . . . Sisyai nesa ũndũ malaa ma lili mameaa: Maitethasya wĩa o na mayokothaa; ĩndĩ nĩngũmwĩa kana o na Solomoni ũnenenĩ wake wʼonthe ndaaĩvwʼĩka ta yĩmwe yamo. . . . Kwoou ekai kũmantha kĩla mwĩya kana kĩla mwĩnywʼa, na ekai kwĩmakĩa . . . Ĩthe wenyu nĩwĩsĩ mwĩ na vata wa syĩndũ isu. . . . Endeeai kũmantha Ũsumbĩ wake, na syĩndũ isu mũkongeleelwa.”—Luka 12:22-31; Mathayo 6:25-33.

Naaũ maĩ mamanthe Ũsumbĩ wa Ngai? Yesũ aisye kana no kĩkundi kĩnini kya andũ aĩkĩĩku, ala wametie “ĩĩthya ĩnini.” Ĩtina nĩvesie kũmanyĩka kana ũtalo wa andũ asu nĩ 144,000. Mathĩtwe maũndũ meva maseo? Yesũ ameie: “Ĩthe wenyu nĩwendeeiwʼe nĩ kũmũnenga Ũsumbĩ.” Andũ asu mayaĩle kũsũanĩa mũno ũndũ matonya kũkwata ũthwii ĩũlũ wa nthĩ, vala ingʼei itonya kũya. Ĩndĩ, maĩle kũsũanĩa mũno ĩũlũ wa ‘ũthwii ũtathelaa ũla wĩ ĩtunĩ,’ vala makasumbĩka vamwe na Klĩsto.—Luka 12:32-34.