“Mũndũ ũmwe nĩwaseũvisye lĩu wa wĩoo, na athokya andũ aingĩ. Na atũma ngombo yake . . . ĩkatavye ala mathoketwʼe, ‘Ũkai, nũndũ kĩla kĩndũ nĩkyũmbanyʼe.’ Ĩndĩ onthe mambĩĩa kũnengane itumi sya kũlea kũthi. Wa mbee amwĩa, ‘Nĩnathooie mũũnda na nĩenda kũthi ngawone; nĩngũũkũlya ũndekee.’ Na ũngĩ asya, ‘Nĩnathooie ngʼombe ĩkũmi, na nĩendete kũisisya; nĩngũũkũlya ũndekee.’ Nake ũngĩ asya, ‘No ĩndĩ nĩnatwaanie, na nũndũ wa ũu nditonya kũka.’”—Luka 14:16-20.

Maũndũ ala andũ asu mawetaa maĩ o ma kwĩlingya! Mũndũ akothaa kũsisya mũũnda kana indo atanamba kũithooa, kwoou vayaĩ vata wa kũisisya aminĩte kũithooa. Nake mũndũ wa katatũ ndakwetye kwĩyũmbanyʼa nĩ kana atwaane. Aĩ aminĩte kũtwaana, na kwoou ũndũ ũsu ndwaĩ ũmũsiĩĩa kũthi vala wathoketwʼe. Yĩla vwana weewie itumi isu ite vala siĩ, athatie mũno na eea ngombo yake atĩĩ:

Maũndũ asu Yesũ waeleisye meonanyʼa nesa ũndũ Yeova Ngai wamũtũmĩie Yesũ Klĩsto nĩ kana athokye andũ ma kĩla mũthemba methĩwe matonya kũlika Ũsumbĩnĩ wa ĩtu. Ayuti, na mũno mũno atongoi ma ndĩni, nĩmo maĩ ma mbee kũthokwʼa. Ĩndĩ aingĩ moo nĩmaleile kĩla Yesũ wamamanyĩasya. Ĩndĩ o na malea, Yesũ nĩwaendeeie kũthokya andũ angĩ. Vate nzika, ngelekanyʼo ĩsu ya Yesũ yoonanasya kana ĩvindanĩ yũkĩte aĩ athokye Ayuti ala moonekaa me ma kĩlasi kya nthĩ na angĩ ala maalyũkĩte makalika ũthaithinĩ wa Kĩyuti. Na ĩndĩ mũthya, Yesũ aĩ athokye andũ ala Ayuti moonaa ta mataĩle methonĩ ma Ngai.—Meko ma Atũmwa 10:28-48.