Mwana wa Mũndũ Akavuanwʼa

Ĩvinda yĩmwe Avalisi nĩmakũlilye Yesũ ĩũlũ wa ũndũ Ũsumbĩ ũkoka nũndũ mo masũanĩaa ta ũkoka na nguma na ngathĩĩo mbingĩ. Aikũlwʼa ĩkũlyo yĩu nũtonya kwĩthĩwa aĩ Samalia kana Kalilii. Akũlwʼa ũu ameie atĩĩ: “Ũsumbĩ wa Ngai ndũkĩte kwa nzĩa ũtonya kwoneka nĩ andũ onthe; o na andũ maikasya, ‘Sisyai wĩ vaa!’ kana, ‘Wĩ vaya!’ Nũndũ sisya! Ũsumbĩ wa Ngai wĩ katĩ wenyu.”—Luka 17:20, 21.

Amwe nĩmatonya kwasya ndeto sya Yesũ syoonanasya kana Ũsumbĩ wa Ngai wĩthĩawa ngoonĩ sya athũkũmi make. Ĩndĩ ndesa kwĩthĩwa oonanasya ũu nũndũ Ũsumbĩ wa Ngai ndwĩsa kwĩthĩwa waĩ ngoonĩ sya Avalisi ala Yesũ waneenaa namo. Ĩndĩ Ũsumbĩ ũsu waĩ katĩ woo nũndũ ũ Yesũ aĩ katĩ woo na nĩwe ũnyuvĩtwe ta Mũsumbĩ wa Ũsumbĩ wa Ngai.—Mathayo 21:5.

Yesũ nĩwasyokie aelesya maũndũ maingangĩ ĩũlũ wa kũka kwa Ũsumbĩ, ĩndĩ nũtonya kwĩthĩwa eekie ũu ĩtina wa Avalisi kũthi. Mbee, aineenea ĩvinda yĩla ũkethĩwa e na ũkũmũ wa kũsumbĩka aisye: “Mĩthenya nĩyũkĩte yĩla mũkenda kwona ũmwe wa mĩthenya ya Mwana wa mũndũ, ĩndĩ mũikawona.” (Luka 17:22) Ndeto syake syoonanasya kana Mwana wa mũndũ aĩ anengwe Ũsumbĩ ĩvinda yũkĩte. Ĩndĩ ĩvinda yĩu yĩte ĩviku, amanyĩwʼa amwe maĩ matonya kũmantha Ũsumbĩ ũsu mũno. O na vailye ũu, yaĩ no nginya meteele nginya ĩvinda yĩla Ngai ũnyuvĩte ya kũka kwa Mwana wa mũndũ yĩvike.

Ĩtina wa ũu aendeeie kwasya: “Andũ makamwĩa, ‘Sisyai e vaya!’ kana, ‘Sisyai e vaa!’ Mũikaathi kana kũmaatĩĩa. Nũndũ o tondũ ũtisi ũtisaa kuma ngalĩko ĩmwe ya ĩtu nginya ngalĩko ĩla ĩngĩ ya ĩtu, nowʼo mĩthenyanĩ ya Mwana wa mũndũ kũkethĩwa kũilye.” (Luka 17:23, 24) Ĩndĩ mo amanyĩwʼa ma Yesũ mesaa kũsũvĩwa ata maikese kũsembanyʼa na andũ angĩ mekwĩyĩta Masia? Yesũ aisye kana kũka kwa Masia ũla wa wʼo kwesaa kwĩthĩwa kũilye ta ũtisi, na ũtisi wonekaa kĩsionĩ kĩnene. Ũsumbĩ ũsu wambĩĩa kũsumbĩka, andũ onthe ala maweteele maĩ mamanye.

Yesũ nĩwasyokie aelesya ũndũ andũ makethĩwa mailye ĩvinda yĩu. Atũmĩie ngewa sya ĩvinda ĩvĩtu kũelesya ũndũ ũsu. Aisye: “O tondũ kweethĩiwe mĩthenyanĩ ya Noa, nowʼo kwĩĩthĩwa kũilye mĩthenyanĩ ya Mwana wa mũndũ . . . O ta ũu, o tondũ kweekĩkie ĩvinda ya Loto: andũ nĩmaĩsaa, nĩmanyusaa, nĩmaũaa, nĩmathooasya, nĩmavandaa, na nĩmaakaa. Ĩndĩ mũthenya ũla Loto waumie ndũanĩ ya Sotomo, nĩkwauie mwaki na mũvĩlĩtĩ kuma ĩtunĩ na wamananga onthe. Ũu nowʼo kũkethĩwa kũilye mũthenya ũla Mwana wa mũndũ wĩvuanwʼa.”—Luka 17:26-30.

Yesũ ndaasya kana atĩ andũ ala maĩ ĩvindanĩ ya Noa maanangiwe nũndũ makwetye maũndũ ala andũ mekaa ta kũya, kũnywʼa, kũthooa, kũthoosya, kũvanda, na kwaka. Noa na Loto vamwe na mĩsyĩ yoo maiema kwĩthĩwa meekaa maũndũ amwe ta asu. Ĩndĩ andũ ala angĩ makũnaa maũndũ asu mateũsũanĩa kwenda kwa Ngai na mateũsũanĩa mekalĩte ĩvinda yĩva. Kwoou kĩla Yesũ wendaa amanyĩwʼa make meke nĩ kũsũanĩa mũno kwenda kwa Ngai na maitata meke ũndũ Ngai wendaa. Kwondũ wa ũu, endaa kũmonyʼa nzĩa ĩla ĩkatuma movowʼa na mayĩkala thayũ yĩla Ngai ũkananga ala athũku.

Amanyĩwʼa ma Yesũ mayaaĩlĩte kũvĩngĩĩswa nĩ syĩndũ ila syamathyũlũlũkĩte, kana kwa ndeto ingi, “syĩndũ ila syĩ ĩtina.” Yesũ aisye: “Mũthenya ũsu, eka mũndũ ũla wĩ nyũmbanĩ ĩũlũ na e na syĩndũ syĩ nyũmba nthĩnĩ, ndakatheee kũsyosa, na o ta ũu, mũndũ ũla wĩ mũũndanĩ ndaĩle nongi kũsyokea syĩndũ ila syĩ ĩtina. Lilikanai mũka wa Loto.” (Luka 17:31, 32) Mũka wa Loto atwʼĩkie kĩtuĩ kya mũnyũ.

Yesũ aendeeie kũelesya ũũ ĩũlũ wa ĩvinda yĩla Mwana wa mũndũ ũkethĩwa asumbĩkĩte: “Ũtukũ ũsu andũ elĩ makeethĩwa makomete kĩtandanĩ kĩmwe; ũmwe akooswa ĩndĩ ũla ũngĩ akatiwa.” (Luka 17:34) Amwe makatangĩĩwa, ĩndĩ angĩ makatiwa na mayasya thayũ.

Amanyĩwʼa mamũkũlilye: “Va, Mwĩaĩi?” Nake amea: “Vala kimba kĩĩ, vau nĩ vo ndiũ syũmbanĩĩaa.” (Luka 17:37) Ũu nĩkwasya kana amwe maĩ methĩwe mailye ta ndiũ ila syonaa vaasa. Amanyĩwʼa asu maĩ mombanĩĩe vala ve Klĩsto ũla wa wʼo, nake nĩ Mwana wa mũndũ. Ĩvindanĩ yĩu, Yesũ aĩ amanyĩsye amanyĩwʼa make wʼo ũla ũkatangĩĩa ala me na mũĩkĩĩo.