Yesũ Nĩwamanyĩisye Ĩũlũ wa Kũthasya Mũtwaano na Kwenda Syana

Yesũ e na amanyĩwʼa make nĩmaumie Kalilii, mainga Ũsĩ wa Yolotani, na ĩndĩ makwata nzĩa ĩla yĩendete ngalĩko ya ĩtheo yĩsĩle kĩsionĩ kya Velea. Yĩla Yesũ waĩ Velea, aĩ atavĩtye Avalisi woni wa Ngai ĩũlũ wa mũtwaano. (Luka 16:18) Kwoou ĩvinda yĩu nĩmakũlilye ĩkũlyo ĩũlũ wa ũndũ ũsu ĩngĩ nĩ kana mamũtate.

Mose aandĩkie kana mũndũũme aĩ atonya kũthasya mũtwaano wake na mũka wake ethĩwa mũndũ mũka ũsu nĩweeka “ũndũ ũtaĩle.” (Kũtũngĩlĩlwa Kwa Mĩao 24:1) Ĩvinda yĩu andũ meethĩawa na mawoni me kĩvathũkanyʼo ĩũlũ wa kĩla kĩtonya kũtuma mũndũ athasya mũtwaano. Amwe maĩkĩĩaa kana ve itumi ingĩ nini itonya kũtuma mũndũ athasya mũtwaano. Kwoou Avalisi mamũkũlya: “Nĩ ũndũ wosanĩte na mĩao mũndũũme kũthasya mũtwaano na kĩveti kyake nũndũ wa kĩtumi o na kĩva?”—Mathayo 19:3.

Yesũ ndaaatĩĩa woni wa mũndũ. Vandũ va ũu, nĩwatũmĩie ũĩ kũelesya mũvango wa Ngai ĩũlũ wa mũtwaano. Aisye: “No mwaasoma kana ũla wamombie kuma mwambĩlĩlyonĩ amombie mũndũũme na mũndũ mũka na asya: ‘Nũndũ wa kĩtumi kĩu mũndũũme akatia ĩthe na inyia na akalũmanyʼa na kĩveti kyake, na me elĩ makeethĩwa mwĩĩ ũmwe’? Kwoou mayĩthĩawa me elĩ ĩngĩ, ĩndĩ nĩ mwĩĩ ũmwe. Kwondũ wa ũu, kĩla Ngai ũlũmanĩtye vamwe, mũndũ ndakakĩtaananyʼe.” (Mathayo 19:4-6) Kwoou yĩla Ngai wambĩlĩĩlye mũtwaano wa Atamu na Eva, ndaamanenga mwanya wa kwĩsa kũthasya mũtwaano ũsu.

Yĩla Yesũ wamatavisye ũu mamũkũlilye atĩĩ: “Nĩkĩ ĩndĩ Mose weetĩkĩlĩtye mũndũũme kũnenga kĩveti kyake valũa wa kũkĩthasya na kũkĩlũngya?” (Mathayo 19:7) Nake Yesũ amasũngĩa amea: “Nũndũ wa wũmũ wa ngoo syenyu, Mose nĩweetĩkĩlĩtye mũthasye mũtwaano na iveti syenyu, ĩndĩ ũu tiwʼo kwailye kuma mwambĩlĩlyonĩ.” (Mathayo 19:8) Yĩla Yesũ wawetie “mwambĩlĩlyonĩ,” ndawetaa ĩvindanĩ ya Mose, ĩndĩ awetaa ĩvinda yĩla Ngai wambĩlĩĩlye mũtwaano mũũndanĩ wa Eteni.

Ĩtina wa vau Yesũ nĩwamamanyĩisye ũndũ wa vata. Ameie: “Nĩngũmwĩa, mũndũ o na wĩva ũla ũthaasya mũtwaano na kĩveti kyake, ate o kwondũ wa ũlaalai [kwa Kĩkiliki, por·neiʹa], na aitwaa kĩngĩ ekaa ũlaalai.” (Mathayo 19:9) Kwoou kĩtumi kĩla kĩnenganĩtwe nĩ Maandĩko kya kũthasya mũtwaano no ũlaalai.

Yĩla amanyĩwʼa meewie ũu maisye: “Ethĩwa ũu nĩwʼo vailye katĩ wa mũndũũme na kĩveti kyake, nĩ kavaa kũlea kũtwaana.” (Mathayo 19:10) Kwoou mũndũ o na wĩva ũla wĩ na mũvango wa kũtwaana kana kũtwawa, aĩlĩte kwĩka ũu ate na mũvango wa kwĩsa kũthasya mũtwaano.

Yesũ aiweta ĩũlũ wa kũlea kũtwawa kana kũlea kũtwaana, aisye kana amwe masyaiwe mate na ũtonyi wa kũmanyana kĩ-mwĩĩ. Angĩ meekie kũvakũwa nĩ andũ, na kwoou meethĩwa mate na ũtonyi wa kũmanyana kĩ-mwĩĩ. Ĩndĩ amwe nĩmasiĩĩaa ne mo ene wendi woo wa kũmanyana kĩ-mwĩĩ. Mekaa ũu nĩ kana matũngĩanĩe ilĩko syoo maũndũnĩ ma Ũsumbĩ. Ĩtina wa ũu, Yesũ eeie ethukĩĩsya make atĩĩ: “Ekai ũla ũtonya kũatĩĩa ndeto isu aiatĩĩe.”—Mathayo 19:12.

Ĩvinda yĩu andũ nĩmambĩĩie kũete syana nini kũla kwĩ Yesũ. Ĩndĩ amanyĩwʼa mamakanyʼa nũndũ nĩmatonya kwĩthĩwa matendaa Yesũ aithĩnwʼa. Yĩla Yesũ woonie ũu ndaaĩwʼa mũyo. Nũndũ wa ũu ameie: “Ekanai na syana nini syũke vala nĩĩ; mũikatate kũisiĩĩa, nũndũ Ũsumbĩ wa Ngai nĩ wa ala mailye tasyo. Nĩ wʼo nĩngũmwĩa, mũndũ o na wĩva ũla ũtawosaa Ũsumbĩ wa Ngai ta kana kanini, ndakalika nongi Ũsumbĩnĩ ũsu.”—Maliko 10:14, 15; Luka 18:15.

Ũndũ ũsu Yesũ wamanyĩisye nĩ wa vata mũno! Nĩ kana twĩlika Ũsumbĩnĩ wa Ngai, no nginya twĩthĩwe na wĩnyivyo na tũyĩtĩkĩla kũmanyĩwʼa ta syana nini. O na ĩngĩ, Yesũ nĩwoonanisye kana nĩwendete syana nini yĩla wasyosie na aiathima. Na nĩwendete andũ onthe ala mosaa “Ũsumbĩ wa Ngai ta kana kanini.”—Luka 18:17.