Ĩthĩwa Mũnyanya wa Ngai Tene na Tene!

Nĩvendekaa kĩthingʼĩĩsyo nĩ kenda mũnyanya akwatĩkane; nĩvendekaa kĩthingʼĩĩsyo kũtũsya mũnyanya. Kĩthingʼĩĩsyo kyaku kya kwĩthĩwa na kũtũa wĩ mũnyanya wa Ngai kĩkaathimwa mũno. Yesũ aisye ũũ kwa ala mamwĩtĩkĩlile: “Ũla wʼo ũkamũthasya.” (Yoana 8:32) Ũu nĩ kwonanʼya ata?

Nũtonya kũtanĩa ũthasyo yuyu. Nũtonya kũkwata ũthasyo wume nthĩnĩ wa momanyĩsyo ma ũvũngũ na movũngũ ala maminĩte kũnyaĩĩkwʼa nĩ Satani. Nũtonya kũkwata ũthasyo ndũkasye wĩkwatyo thayũnĩ waku, ta milioni mbingĩ sya andũ ala matamwĩsĩ Yeova. (Alomi 8:22) Ĩngĩ, anyanya ma Ngai me na ũthasyo kumanwa na “wʼĩa wa kĩkwʼũ.”—Aevelania 2:14, 15.

Nũtonya kũtanĩa ũthasyo nthĩnĩ wa nthĩ nzaũ ya Ngai. Asi, ũthasyo ũla ũkatonya kũtanĩa ĩvinda yĩla yũkĩte ũkeethĩwa mũseo mũno! Nthĩnĩ wa nthĩ ya Valatiso, kũkeethĩwa ũthasyo wa kumanwa na kaũ, ũwau, na wathavu. Ũthasyo wa kumanwa na ũkya na nzaa. Ũthasyo wa kumanwa na ũkũũ na kĩkwʼũ. Ũthasyo wa kumanwa na wʼĩa, kyoneo, na wau-wa-usili-wa-katĩ. Mbivilia yaasya ũũ ĩũlũ wa Ngai: “Nũũkũnzũa ũvĩ waku, na kwĩanĩsya kwenda kwa kĩla kĩndũ kĩ thayũ.”—Savuli 145:16.

Anyanya ma Ngai makekala thayũ tene na tene. Thayũ ũtathela nĩ mũthĩnzĩo wa vata mũno ũla Ngai ũkanenga onthe ala mamanthaa ũnyanya wake. (Alomi 6:23) Asi! kweesilye nĩ ũunĩko mũnene ata ũtonya ũkwata nthĩnĩ wa thayũ ũte kĩtulu!

Ũkeethĩwa na ĩvinda ya kwĩka maũndũ maingĩ. Nokwĩthĩwa wendete kwĩmanyĩsya kũkũna mũio mũna wa kũinga mbathi. O na nokwĩthĩwa wendete kwĩmanyĩsya kũkulula visa kana kũtwʼĩka vundi wa mbwaũ. Nĩvatonyeka ũkenda kũmanya ĩũlũ wa nyamũ kana imei (mĩtĩ). Nĩvatonyeka ũkethĩwa ũyenda kũvanga kyalo ũkeloele nthĩ syĩ kĩvathũkanʼyo na mbaĩ sya mĩthemba mingĩ. Kwĩthĩwa na thayũ ũtathela kũkatuma maũndũ asu onthe matonyeka!

Ũkeethĩwa na ĩvinda ya kwĩthĩwa na anyanya aingĩ. Kwondũ wa kwĩkala tene na tene, vakatonyeka kũmanya andũ angĩ aingĩ ala maminĩte kwĩthĩwa anyanya ma Ngai. Ũkamanya inengo sya ũĩ woo, na ndaĩa syoo nzeo, o nao mayĩthĩwa anyanyau. Ũkamenda, nao makakwenda. (1 Akolintho 13:8) Kwĩthĩwa na thayũ ũte kĩtulu kũkaũnenga ĩvinda ya kwĩthĩwa na ũnyanya na kĩla mũndũ ĩũlũ wa nthĩ! Na kũthonoka maũndũ onthe, ũnyanya waku vamwe na Yeova ũkeana ũendeee kũmesya vinya o ũndũ maana ma myaka meĩthĩwa maendeee kũvĩtũka. Nĩwĩthĩwe mũnyanya wa Ngai tene na tene!