Kyama kya Mbee Kĩla Yesũ Weekie

Nĩ mũthenya wa katatũ kuma Nathanaeli atwʼĩka ũmwe wa amanyĩwʼa ma mbee ma Yesũ. Yesũ na amwe ma amanyĩwʼa asu make meelekele ngalĩko ya ĩũlũ ya Kalilii, kũla mekalaa. Maendete taoninĩ ya Kena, vala Nathanaeli waumĩte. Taoni ya Kena yaĩ iĩmanĩ ila syaĩ ngalĩko ya ĩũlũ ya Nasaleti, kũla Yesũ weanĩie. Yesũ na amanyĩwʼa asu make mathoketwʼe mbokanĩ ya mũtwaano ĩla yaĩ Kena.

O nake Meli, inyia wa Yesũ, nĩwathoketwʼe mũtwaanonĩ ũsu. Na nũndũ aĩ mũnyanyae wa andũ ma mũsyĩ wa ala matwaanaa, nĩvatonyeka akethĩwa aĩ ũmwe wa ala matetheeasya maũndũnĩ ta kũua na kũnengane lĩu. Nũndũ wa ũu, nĩwamanyie mĩtũkĩ kana ve vandũ ve na thĩna, na kwoou eea Yesũ atĩĩ: “Mai na mbinyu.”—Yoana 2:3.

Ndeto isu Meli watũmĩie syonanasya kana endaa Yesũ amatetheesye makwate mbinyu. Ĩndĩ Yesũ atũmĩie ndeto syoonanasya kana ndendaa kwĩka ũu. Amũkũlilye Meli atĩĩ: “Mũndũ mũka, ũndũ ũsu ũngonetye ata na ũkũkonetye ata?” (Yoana 2:4) Ta Mũsumbĩ ũnyuvĩtwe nĩ Ngai, Yesũ nĩweesĩ kana maũndũ ala waĩle kwĩka maĩle kumana na Ĩthe wake wa ĩtunĩ, ĩndĩ ndaĩle kwĩwa ameke nĩ andũ ma mũsyĩ kana anyanyae. Nũndũ Meli nĩweesĩ ũu, nĩwaekie ũndũ ũsu mokonĩ ma Yesũ, na eea ala mathũkũmaa atĩĩ: “Ĩkai o ũndũ ũkũmũtavya.”—Yoana 2:5.

Vaĩ mbisũ thanthatũ sya ĩvia sya kwĩkĩa kĩwʼũ na kĩla ĩmwe yaĩ ya lita mbee wa 40. Yesũ eeie athũkũmi atĩĩ: “Usũsyai mbisũ kĩwʼũ.” Na ĩndĩ mamina kusũsya mbisũ isu, amea: “Yu tavai kĩmwe mũtwaĩe mũũngamĩi wa mboka.”—Yoana 2:7, 8.

Yĩla mamũtwaĩie mũũngamĩi wa mboka mbinyu ĩsu, nĩwatanie mũno nũndũ yaĩ nzeo vyũ, ĩndĩ ndaamanya kana Yesũ nĩwe weekie kyama kya kũmĩseũvya. Kwoou, nĩweetie mũtwaani na amwĩa, “Kĩla mũndũ aetae mbinyu ĩla nzeo mbee, na andũ mamilwa, ayĩete ĩla ĩte nzeo mũno. Ĩndĩ we wiie mbinyu ĩla nzeo nginya yu.”—Yoana 2:10.

Kĩu nĩkyo kyaĩ kyama kya mbee kĩla Yesũ weekie. Yĩla amanyĩwʼa make moonie kyama kĩu, mũĩkĩĩo woo nĩwalũlũmĩĩlwʼe. Ĩtina wa mũtwaano ũsu, Yesũ, ana-a-inyia, na inyia wake, nĩmaendie taoninĩ ya Kavelinaumi, ĩla yaĩ ngalĩko ya ĩũlũ ya Ũkanga wa Kalilii.