Yesũ e Vethania Nĩwathokiwʼe Lĩu kwa Simoni

Yesũ auma Yeliko nĩwaendie Vethania. Aikaavika Vethania aendie mũendo wa maili ta 12. Kyalo kĩu kĩyaĩ laisi nũndũ yaĩ no nginya ambate kĩlĩso kyũmũ mũno. Lasalo na eĩtu-a-inyia elĩ mekalaa ndũanĩ nini ya Vethania. Ndũa ĩsu yaĩ ũasa wa ta maili elĩ kuma Yelusaleme, na yaĩ kĩvaũũkonĩ kya Kĩĩma kya Mĩthata, ngalĩko ya wumĩlonĩ wa syũa.

Yesũ aivika Yelusaleme eethĩie Ayuti aingĩ mavikie kwondũ wa Vasaka. Ayuti asu mavikĩte tene nĩ kana “makethesye kwosana na Mĩao.” Meekaa ũu ethĩwa nĩmethĩwa makwatĩte kimba kana makeka ũndũ ũngĩ ũtonya kũtuma methĩwa me avuku. (Yoana 11:55; Motalo 9:6-10) Amwe katĩ wa asu mavikĩte tene moombanĩĩte ĩkalũnĩ.—Yoana 11:56.

Andũ maĩ na ngusanĩsyo mbingĩ mũno ĩũlũ wa Yesũ. Atongoi amwe ma ndĩni mendaa kũmũkwata mamũae. O na maĩ maumĩtye mwĩao makasya kana mũndũ ũla wĩthĩwa esĩ nesa vala Yesũ ũtonya kwĩthĩwa aĩ, no akũne livoti “nĩ kana mamũkwate.” (Yoana 11:57) Na nengĩ maĩ masũanĩĩte kũmũaa navu ĩtina yĩla wathayũũkisye Lasalo. (Yoana 11:49-53) Nĩkyo kĩtumi aingĩ maĩ matonya kũsũanĩa kana Yesũ ndesa kumĩla andũnĩ ĩngĩ.

Yesũ avikie Vethania Wakatano “vatiele mĩthenya thanthatũ Vasaka yambĩĩe.” (Yoana 12:1) Mũthenya ũla waatĩĩe waĩ wambĩĩe syũa yathũa. Kwoou nũndũ Yesũ avikie syũa yĩtanathũa, nĩwavotie kũmina kyalo kyake Savato ya matukũ 8 mwei wa Nisani ĩtanambĩĩa. Mĩao ya Ayuti ndyaĩ ĩmwĩtĩkĩlya Yesũ ethĩwe kyalonĩ mũthenya wa Savato, ũla wambĩĩaa Wakatano syũa yathũa nginya Wathanthatũ syũa yathũa. Avika Vethania nũtonya kwĩthĩwa aendie kwa Lasalo o ũndũ weekaa navu ĩtina.

Wathanthatũ wĩoo, Yesũ nĩwathokiwʼe vamwe na anyanyae maĩsanĩe nyũmba kwa mũndũ weetawa Simoni, ũla wekalaa Vethania, na Lasalo nũmwe wathoketwʼe. Simoni eesĩkĩe ta mũndũ “mbeenĩ waĩ mũwau mangũ,” na nĩvatonyeka akethĩwa avoetwʼe ũwau ũsu nĩ Yesũ ĩvinda yĩ navu ĩtina. Matha aĩ mũndũ mũka wĩ kĩthito na nĩwe wanengae aeni asu lĩu.

Nake Meli eekie ata? Oosie sũva wa alambasita na aũkunũa. Sũva ũsu weekĩĩtwe “latili ũmwe wa mauta ma thooa mũnene ma nando, mate mavulanyʼe na kĩndũ na me mũuke mũseo.” (Yoana 12:3) Mauta asu maĩ ma lato mũnene. Thooa wamo (ndinalĩ 300) waĩ ta ũndũ ũmwe na mũsaala wa mwaka mũima! Meli etĩkĩĩisye Yesũ mauta asu mũtwe na maaũ na asyoka amũvangũla maaũ aitũmĩa nzwʼĩĩ yake. Nũndũ wa ũu, nyũmba ĩla maĩ nĩyausũie mũuke wa mauta asu.

Amanyĩwʼa nĩmathatie na makũlya: “Nĩkĩ mauta aa me mũuke mũseo maanangwa?” (Maliko 14:4) Nake Yutasi Isikalioti akũlilye: “Nĩkĩ mauta aa me mũuke mũseo matanathoowʼa ndinalĩ 300 ikanengwa ngya?” (Yoana 12:5) Ti atĩ Yutasi athĩnĩkĩaa ngya. Vandũ va ũu, Yutasi nĩwooyaa mbesa nũndũ nĩwe wakuĩaa amanyĩwʼa kasandũkũ ka mbesa.

Yesũ nĩwateteie Meli, aisye: “Nĩkĩ mũũmũthĩnyʼa mũndũ mũka ũũ? Ambĩka ũndũ mũseo. Nũndũ ngya mwĩ nasyo mavinda onthe, ĩndĩ nyie mũi nakwa mavinda onthe. Yĩla mũndũ mũka ũũ wetĩkĩĩsya mauta me mũuke mũseo mwĩĩnĩ wakwa, eeka ũu nĩ kana ambũmbanyʼe kwondũ wa mathiko. Nĩ wʼo nĩngũmwĩa, o kũla kũkatavanwʼa ũvoo ũũ mũseo nthĩ yonthe, ũndũ ũla mũndũ mũka ũũ weeka o nawʼo ũkatavanawʼa kwondũ wa kũmũlilikana.”—Mathayo 26:10-13.

Ĩtina wa Yesũ kwĩkala Vethania mĩthenya kauta, andũ nĩmanyaĩĩkisye ngewa ĩũlũ wake. Ayuti aingĩ nĩmookie kwa Simoni nĩ kana mone Yesũ, na eka ũu, mayona Lasalo, “ũla [Yesũ] waĩ anamũthayũũkya.” (Yoana 12:9) Nũndũ wa ũu, anene ma athembi nĩmoombanie nzama nĩ kana mavange ũndũ mekũaa Yesũ na Lasalo. Atongoi asu ma ndĩni masũanĩaa kana Lasalo aekwa e thayũ andũ aingĩ nĩmekũendeea kũmũĩkĩĩa Yesũ. Mwa maĩ athũku ta kĩ!