Mũsumbĩ Nĩwalikile Yelusaleme Akuĩtwe Nĩ Kangʼoli

Kwĩ Wakyumwa matukũ 9, mwei wa Nisani, Yesũ nĩwaumie Vethania e na amanyĩwʼa make na makwata nzĩa mathi Yelusaleme. Makililye mathengeea Vethivake, ĩla yĩ Kĩĩmanĩ kya Mĩthata, eea amanyĩwʼa make elĩ atĩĩ:

“Endai ũtũinĩ ũya wĩ mbee wenyu, na mwavika, nĩmũkwĩthĩa ĩngʼoi yovetwe na kangʼoli kayo. Mathasyei mũndetee. Na mũndũ amũkũlya, mwaĩle kũmwĩa, ‘Mwĩaĩi nũkũmenda.’ Mwamina kũmũtavya ũu, vau kwa vau nũkũmũeka mũthi namo.”—Mathayo 21:2, 3.

Amanyĩwʼa mayaamanya kana kĩu Yesũ wamatavisye kyaĩ kĩanĩsye wathani wa Mbivilia. Ĩndĩ ĩtina nĩmesie kũmanya kana ũsu nĩ wathani wa Nzekalia weanĩawʼa. Mwathani ũsu athanĩte kana Mũsumbĩ wa Ngai ũla wathanĩtwe aĩ alike Yelusaleme “e na wĩnyivyo, na atũlĩte ĩngʼoi, o ndena, ndena ya ĩngʼoi.”—Nzekalia 9:9.

Yĩla amanyĩwʼa maendie Vethivake na moosa yĩla ĩngʼoi vamwe na kangʼoli kayo, andũ ala maũngamĩte vau mamakũlilye atĩĩ: “Mwĩthasya kangʼoli kau nĩkĩ?” (Maliko 11:5) Ĩndĩ mamina kwĩwʼa kana Mwĩaĩi nĩwe wĩtĩtye mangʼoi asu, nĩmamaekie mathi namo. Amanyĩwʼa moosie ngũa syoo sya ĩũlũ na mavwʼĩka mangʼoi asu me elĩ, ĩndĩ Yesũ ekalĩla kala kanini.

Andũ nĩmaendeeie kũmũmbĩlĩĩla Yesũ o ũndũ waendeee kũthengeea Yelusaleme. Aingĩ nĩmalanilye ngũa syoo lelũnĩ. Namo angĩ nĩmatũlaa mbonge sya mĩtĩ kana “mbonge syĩ matũ kuma mĩũndanĩ” makasyalanyʼa nzĩanĩ. O na nĩmakayanasya mayasya: “Mũtangĩĩe, nĩtũũvoya! Nĩmũathime ũla wũkĩte ĩsyĩtwanĩ ya Yeova! Ũsumbĩ ũla wũkĩte wa ĩthe witũ Ndaviti nĩmũathime!” (Maliko 11:8-10) Avalisi meewʼa ũu nĩmathatie mũno. Meeie Yesũ atĩĩ: “Mũmanyĩsya, kanyʼa amanyĩwʼa maku.” Nake amea: “Nĩngũmwĩa, aa makavindya, mavia no maneene na wasya mũnene.”—Luka 19:39, 40.

Yesũ asisya Yelusaleme nĩwambĩĩie kũĩa ayasya atĩĩ: “Ta kethĩwa we, o we, nũmanya ũmũnthĩ maũndũ ala matonya kũkũetee mũuo, ĩndĩ nĩmavithĩtwe methonĩ maku.” Yelusaleme ndyaĩ ĩlea kũsilĩlwa nũndũ nĩyaleete kũmwĩwʼa Ngai na ngũlũ. Nĩkyo kĩtumi Yesũ wathanie atĩĩ: “Amaitha maku [makaseũvya] wiio wa ituĩ syĩ na mĩthya myasũvye, na maikũthyũlũlũka na kũũsiĩĩa ngalĩ syonthe. Makakũkimanyʼa nthĩ, we vamwe na syana syaku syonthe, na maikatia ĩvia ĩũlũ wa yĩngĩ nthĩnĩ waku.” (Luka 19:42-44) Wathani ũsu wa Yesũ weanĩie mwaka wa 70 ĩtina wa Klĩsto, yĩla Yelusaleme yaanangiwe.

Yesũ alika Yelusaleme ‘andũ onthe ala maĩ ndũanĩ ĩsu nĩmavũavũanie, makyasya:“Ũũ nũũ?”’ Nayo ĩkomano yaaasya: “Ũũ nĩ mwathani Yesũ, kuma Nasaleti ya Kalilii!” (Mathayo 21:10, 11) Amwe katĩ wa ala maĩ ĩkomanonĩ yĩu nĩmoonete Yesũ aithayũũkya Lasalo, na nĩmaeleasya ala angĩ ĩkomanonĩ yĩu ĩũlũ wa kyama kĩu. Avalisi meewʼaa thĩna mũno nũndũ nĩmamanyaa kana nĩmaemetwe vyũ nĩ kũsiĩĩa Yesũ. Mambĩĩie kũneenanyʼa mayasya atĩĩ: “Nthĩ yonthe nĩmũatĩĩe.”—Yoana 12:18, 19.

Yesũ avika Yelusaleme nĩwaendie ĩkalũnĩ akamanyĩsye o tondũ weekaa. E vau nĩwavoisye ilalinda na ala maĩ onzu mamutha. Anene ma athembi na aandĩki nĩmathatie mũno yĩla moonie ayĩka ũu, na meewʼa tũmwana tũla twaĩ ĩkalũnĩ tũyasya na wasya mũnene, “Mũtangĩĩe, Mwana wa Ndaviti, nĩtũũvoya!” Nũndũ wa ũu atongoi ma ndĩni mamũkũlilye Yesũ atĩĩ: “Nũkwĩwʼa ũndũ tũmwana tũũ tũkwasya?” Nake amea: “No mwaasoma ndeto ii, ‘Kuma makanywʼanĩ ma syana na tũũkenge, wĩ mũtaĩe’?”—Mathayo 21:15, 16.

Yesũ nĩwambĩĩie kwĩloela syĩndũ ila syaĩ ĩkalũnĩ. Kwaĩ kũnatuka, kwoou auma vau athi e na atũmwa make. Nĩwasyokie Vethania mũthenya wa matukũ 10, mwei wa Nisani ũte mũviku, na akomela kwʼo ũtukũ wa Wakyumwa.