Makũlyo Kuma Kwa Asomi Maitũ

Asikalĩ ma ĩkalũ ya Ayuti maĩ aaũ, na wĩa woo waĩ mwaũ?

Wĩa ũmwe katĩ wa mawĩa ala matethawʼa nĩ andũ ma mbaĩ ya Livai ala mataĩ athembi waĩ kũthũkũma ta asikalĩ. Asikalĩ asu maĩ ungu wa kavuteni wa ĩkalũ. Mũandĩki ũmwe Mũyuti wĩtawa Philo nĩwawetie mawĩa ala asikalĩ asu matethasya asya: “[Alivai] amwe methĩawa mbingĩlonĩ maisunga, angĩ methĩawa [ĩkalũnĩ] mbee wa vala vandũ vatheu nĩ kana masiĩĩe mũndũ o na wĩva ndakalike vau atetĩkĩlĩtwʼe, o na ethĩwa ekĩte kwasya nzĩa. Namo angĩ mathiũũkaa vau ĩkalũnĩ maisunga na mekaa ũu mũthenya na ũtukũ mayumĩanĩsya na angĩ ũndũ vavangĩtwe.”

Nzama ya Ayuti yaĩ ĩtonya kũkũlya asikalĩ asu mamĩtetheesye. Kĩu nokyo kĩkundi kya Ayuti kĩla kyeetĩkĩlĩtwʼe nĩ silikalĩ ya Lomi kũkua mĩio ya kaũ.

Kwosana na mũsomi wĩtawa Joachim Jeremias, “Ndeto ila Yesũ wawetie ĩvinda yĩla wakwatawa asya kana kĩla mũthenya ekalaa Ĩkalũnĩ aimanyĩsya na mayaamũkwata (Mt. 26.55), iyĩthĩwa syaaeleeka nesa ta keka asikalĩ ma ĩkalũ ti mo mookie kũmũkwata.” O na ĩngĩ, mũsomi ũsu aĩkĩĩaa kana asikalĩ ala matũmĩtwe mbeenĩ moke kũmũkwata Yesũ maĩ ma ĩkalũ. (Yoa. 7:32, 45, 46) Ĩtina wa ĩvinda, asikalĩ ta asu nĩmatũmiwe me na kavuteni woo maete amanyĩwʼa ma Yesũ mbee wa Nzama ya Ayuti, na nĩmatonya kwĩthĩwa no mo makusũlanilye mũtũmwa Vaulo maimũveta ĩkalũnĩ.—Meko 4:1-3; 5:17-27; 21:27-30.