ĨSOMO YA 38
Tũngaa Mũvea Nũndũ wa Mũthĩnzĩo wa Thayũ
Ve maũndũ maingĩ tũtonya kwĩka na tũkamatanĩa nũndũ twĩ thayũ. O na yĩla twakwatwa nĩ mathĩna, no tũtanĩe maũndũ amwe thayũnĩ. Tũtonya kwonanyʼa ata kana nĩtũũtũnga mũvea kwondũ wa mũthĩnzĩo wa thayũ? Na nĩ kĩtumi kĩva kĩnene kyaĩle kũtuma twĩka ũu?
1. Nĩkĩ twaĩlĩte kũtũngaa mũvea nũndũ wa thayũ?
Twaĩlĩte kũtũngaa mũvea nũndũ wa thayũ nĩkwĩthĩwa nĩ mũthĩnzĩo kuma kwa Ĩthe witũ wĩ wendo, Yeova. Nĩwe “mbuluti ya thayũ,” nũndũ nĩwoombie kĩla kĩndũ. (Savuli 36:9) Yeova “nĩwe ũnengae andũ onthe thayũ na mĩthũmũ na syĩndũ syonthe.” (Meko ma Atũmwa 17:25, 28) Yeova nũtũnengae kĩla tũkwenda nĩ kana twĩkale thayũ. Na kwongela ũu, nũtwĩkaa maũndũ matumaa tũtanĩa thayũ.—Soma Meko ma Atũmwa 14:17.
2. Tũtonya kwonyʼa Yeova ata kana nĩtũtũngaa mũvea nũndũ wa mũthĩnzĩo wa thayũ?
Yeova ambĩĩie kũũthĩnĩkĩa kuma yĩla waitaviwe. Ndetonĩ yake Mbivilia, ũmwe wa athũkũmi make, Ndaviti, amwĩie atĩĩ: “Metho maku nĩmoonie ndanombĩka.” (Savuli 139:16) Yeova nĩwonaa thayũ waku wĩ wa vata mũno. (Soma Mathayo 10:29-31.) Nĩ ũũmĩaa mũno yĩla ũmwe wamina na ngũlũ thayũ wa mũndũ ũngĩ kana thayũ wake mwene.a (Kuma 20:13) O na nĩ ũũmĩaa yĩla twalikya thayũ witũ mũisyonĩ vate vata, kana twaema kwosa matambya ala maĩlĩte tũsũvĩe thayũ wa andũ ala angĩ. Yĩla twasũvĩa thayũ witũ na twanenga ndaĩa thayũ wa ala angĩ, twonanasya kana nĩtũũtũnga mũvea nũndũ wa mũthĩnzĩo wa thayũ.
ĨMANYĨSYE MŨNANGO
Ĩmanyĩsye maũndũ amwe ũtonya kwĩka ũkonanyʼa kana nũũtũnga mũvea nũndũ wa mũthĩnzĩo wa thayũ.
3. Sũvĩa mwĩĩ waku
Nũndũ nĩtwamwathie Yeova kwĩkaa kĩla we ũkwenda mavinda onthe, nĩtũtũmĩaa thayũ witũ wʼonthe kũmũthũkũma. No ta twĩthĩawa tũinengane mĩĩ yitũ yĩthĩwe ta nthembo kwa Ngai. Somai Alomi 12:1, 2, na ĩndĩ mũineenea makũlyo aa:
Nĩ kyaũ kyaĩle kũtuma ũsũvĩa mwĩĩ waku?
Ũtonya kwĩka ũu ata?
4. Sũvĩa thayũ waku na wa ala angĩ
Mbivilia ĩtwĩkĩĩte vinya twĩvathane na maũndũ matonya kũtũlikya mũisyonĩ. Ĩloelei VITIO nĩ kana mwĩmanyĩsye maũndũ amwe ũtonya kwĩka ũkesũvĩa.
Somai Nthimo 22:3, na ĩndĩ mũineenea ũndũ ũtonya kwĩsũvĩa, na ũisũvĩa ala angĩ yĩla . . .
wĩ mũsyĩ.
ũũthũkũma.
ũũthaũka.
ũtwaĩte ngalĩ kana ũkakuwa na ngalĩ.
5. Nenga ndaĩa thayũ wa kana katanamba kũsyawa
Ndaviti nĩwaeleisye ũndũ Yeova wendeeawʼa nĩ thayũ wa kana kaendeee kwĩana ĩvunĩ ya nyinyia wako. Somai Savuli 139:13-17, na ĩndĩ mũineenea ĩkũlyo yĩĩ:
Kwosana na woni wa Yeova, thayũ wa mũndũ wambĩĩaa yĩla mũndũ mũka waitava-ĩ, kana nĩ yĩla kana kasyawa?
Mĩao ĩla Yeova wanengete Isilaeli ĩvindanĩ ya tene nĩyasũvĩaa syana ila itanamba kũsyawa vamwe na aa-inyia. Somai Kuma 21:22, 23, na ĩndĩ mũineenea makũlyo aa:
Yeova onaa ata mũndũ ũla woaa kana katanamba kũsyawa atataĩĩe?
Atonya kwĩwʼa ata ethĩwa mũndũ eeka ũu na ngenda?b
We woni ũsu wa Ngai wĩwona ata?
O na mũndũ mũka ũla wonaa thayũ wĩ wa vata no avikĩĩe vandũ akambĩĩa kũsũanĩa kana kumya ĩvu nokwʼo kũtonya kũmũtethya. Somai Isaia 41:10, na ĩndĩ mũineenea makũlyo aa:
Ethĩwa mũndũ mũka nũkũthingʼĩĩwʼa mũno aumye ĩvu, aĩle kũmantha ũtethyo vala ve ũũ? Nĩkĩ wasũngĩa ũu?
ANDŨ AMWE MAASYA: “Mũndũ mũka e na ũthasyo wa kwĩnyuvĩa ethĩwa nũkumya ĩvu nũndũ mwĩĩ nĩ wake.”
Nĩ kyaũ kĩũkũĩkĩĩthya kana Yeova nĩwonaa thayũ wa kana katanamba kũsyawa wĩ wa vata, o vamwe na wa nyinyia wako?
KĨLA TWEEMANYĨSYA
Mbivilia ĩtũmanyĩasya kana nĩtwaĩlĩte kwenda, kũnenga ndaĩa, na kũsũvĩa thayũ nũndũ nĩ mũthĩnzĩo tũnengetwe nĩ Yeova. Ũu nĩ vamwe na thayũ witũ, na wa andũ ala angĩ.
Makũlyo ma Kũsyokeleela
Nĩkĩ Yeova wonaa thayũ wa mũndũ wĩ wa vata?
Yeova ewʼaa ata yĩla mũndũ woaa ũngĩ na ngenda?
We nĩwonaa mũthĩnzĩo wa thayũ wĩ wa vata? Nĩkĩ wasũngĩa ũu?
MAŨNDŨ ANGĨ MA KWĨMANYĨSYA
Tũtonya kũmũtũngĩa Yeova mũvea ata nũndũ wa mũthĩnzĩo wa thayũ?
Mantha ũsũngĩo wa ĩkũlyo yĩĩ, We Ngai akamũekea mũndũ ũla waumisye ĩvu?
Ĩmanyĩsye ũndũ woni wa Ngai kwelekela thayũ waĩle kũtũtetheesya twĩtanĩthasye kwa nzĩa ila syaĩlĩte.
“Nĩwaĩlĩte Kũthaũka Mathaũ Matonya Kũũlikya Mũisyonĩ?” (Amkeni!, Matukũ 8, Mwei wa 10, 2000)
Nao nata ethĩwa mũndũ nũsũanĩĩte kwĩyũaa? Sisya wone ũndũ Mbivilia ĩtonya kũtetheesya.
“Yo Mbivilia No Ĩndetheesye Yĩla Nambĩĩa Kwĩthĩwa na Mesilya ma Kwĩyũaa?” (Ũvoo wĩ kĩsesenĩ)
a Yeova nũthĩnĩkĩaa mũno ala matũlĩkĩte ngoo. (Savuli 34:18) O na nĩwĩthĩawa esĩ kana mavinda amwe mũndũ no avinyĩĩwe nĩ mesilya nginya akenda kũkwʼa, na nĩwendaa kũtetheesya andũ ta asu. Nĩ kana wone ũndũ ũtethyo wake ũtonya kũũnenga vinya wa kũsinda mosũanĩo ma kwenda kwĩyũaa, soma ũvoo wĩ na kyongo, “Yo Mbivilia No Ĩndetheesye Yĩla Nambĩĩa Kwĩthĩwa na Mesilya ma Kwĩyũaa?” ũla wĩ kĩlungunĩ kya Maũndũ Angĩ ma Kwĩmanyĩsya, ĩsomonĩ yĩĩ.
b Ala maumisye ĩvu tene mayaĩlĩte kwĩtũla mũtĩ mũno nũndũ Yeova no amaekee. Wenda kũkwata ũvoo mwingangĩ, soma ũvoo wĩ na kyongo “Mbivilia Yaĩtye Ata Ĩũlũ wa Kumya Ĩvu?” ũla wĩ kĩlungunĩ kya Maũndũ Angĩ ma Kwĩmanyĩsya, ĩsomonĩ yĩĩ.