Makũlyo Kuma Kwa Asomi Maitũ
Syo ndeto sya Vaulo ila syĩ nthĩnĩ wa 1 Akolintho 15:29, syonanasya kana ve Aklĩsto amwe ma tene mavatisawa kwondũ wa andũ maminie kũkwʼa?
Aiee, vaiĩ vandũ Mbivilianĩ kana mavukunĩ ma tene vonanĩtye kana ũndũ ta ũsu nĩweekawa.
Ũndũ mũsoa ũsu ũalyũlĩtwe Mbivilianĩ mbingĩ, nũtumĩte amwe masũanĩa kana ĩvindanĩ ya Vaulo ve andũ mavatisawa na kĩwʼũ kwondũ wa andũ maminie kũkwʼa. Kwa ngelekanyʼo, Mbivilia ya The Bible in Kikamba, 1974, yaĩtye: “Ethĩwa akwʼũ maithayũũkwʼa nongi, mavatisawa kwondũ wa akwʼũ nũndũ wa kĩ?”
Ĩndĩ o na ũu wĩ o vo, ekai tũsũanĩe maũndũ mawetetwe nĩ asomi elĩ ma Mbivilia ĩũlũ wa ũndũ ũsu. Ũmwe nĩ Dr. Gregory Lockwood, ũla waisye kana vaiĩ vandũ Mbivilianĩ kana mavukunĩ ma tene vonanĩtye ve mũndũ waavatiswa kwondũ wa mũndũ ũngĩ wakwie. O ta ũu, Vulovesa Gordon D. Fee aandĩkie: “Vaiĩ vandũ Mbivilianĩ kana mavukunĩ ma tene vonanĩtye kana vaaĩsa kwĩthĩwa na ũvatiso ta ũsu.” Aĩtye kana vaiĩ vandũ ũndũ ũsu ũwetetwe Ũtianĩonĩ Mweũ, na vaiĩ kĩndũ kĩkwonanyʼa kana nĩweekawa nĩ Aklĩsto ma mbee, kana nĩ makanisa ala mambĩĩiwʼe ĩtina wa atũmwa kũkwʼa.
Yesũ eeaĩe aatĩĩi make ũũ: “Endai ĩndĩ mũkatwʼĩkĩthye andũ ma mbaĩ syonthe amanyĩwʼa, na kũmavatisa . . . , na mũimamanyĩsya kũkwata maũndũ onthe ala namwĩaĩe.” (Mt. 28:19, 20) Kwoou mũndũ atanamba kũtwʼĩka mũmanyĩwʼa mũvatise, nĩwaaĩle kwĩmanyĩsya ĩũlũ wa Yeova na Mwana wake, kũmaĩkĩĩa, na aimewʼa. Vai mũndũ mũkwʼũ waĩ atonya kwĩka ũu e mbũanĩ, kana Mũklĩsto ũngĩ wĩ thayũ akeka ũu kwondũ wake.—Mũta. 9:5, 10; Yoa. 4:1; 1 Ako. 1:14-16.
Kwoou, ndeto sya Vaulo syoonanasya ata?
Akolintho amwe maasya kana akwʼũ maikathayũũkwʼa. (1 Ako. 15:12) Ĩndĩ Vaulo nĩwamalũngile. Amaeleisye kana ‘kĩla mũthenya eethĩawa mũisyonĩ wa kũawa.’ Ĩndĩ o na kũtwʼĩka nĩwakwatawa nĩ mĩisyo, nĩweesĩ ki kana, o ta Yesũ, ĩtina wa kũkwʼa akathayũũkwʼa e kyũmbe kya veva kĩ vinya.—1 Ako. 15:30-32, 42-44.
Aklĩsto asu ma Kolintho maaĩle kũelewa kana nũndũ mo nĩ etĩkĩwʼa mauta, makakomanaa na mĩisyo kĩla mũthenya, na maikalea kũkwʼa nĩ kana mathayũũkwʼe. Kwoou yĩla ‘mavatisiwe nthĩnĩ wa Klĩsto Yesũ,’ meethĩiwe ‘mavatiswa nthĩnĩ wa kĩkwʼũ kyake.’ (Alo. 6:3) Kĩu kyoonanasya kana o ta Yesũ, no nginya makomane na mĩisyo na maikwʼa nĩ kana mathayũũkwʼe na maithi ĩtunĩ.
Myaka mbee wa ĩlĩ ĩtina wa Yesũ kũvatiswa na kĩwʼũ, eeie atũmwa make elĩ atĩĩ: “Ũvatiso ũũ ngũvatiswa, mũkavatiswa.” (Mko. 10:38, 39) Yesũ ndaneeneaa ũvatiso wa kĩwʼũ, ĩndĩ aneeneaa kũvatiswa ‘nthĩnĩ wa kĩkwʼũ kyake.’ Kwoou oonanasya kana kũendeea kwĩthĩwa e mũĩkĩĩku kwa Ngai nĩkwesaa kũtuma oawa. Nake Vaulo aandĩkie kana etĩkĩwʼa mauta ‘makathĩna vamwe [na Yesũ] nĩ kana methĩwe matonya kũkumwʼa vamwe nake.’ (Alo. 8:16, 17; 2 Ako. 4:17) Kwoou, yaĩ no nginya o namo makwʼe nĩ kana mathayũũkwʼe na maithi ĩtunĩ.
Kwoou, kwosana na maũndũ asu twaneenea, no twasye tũte na nzika kana ndeto sya Vaulo mũsoanĩ ũsu syaĩlĩte kũalyũlwa atĩĩ: “Ethĩwa ũu tiwʼo vailye, matonya kwĩka ata andũ ala meũvatiswa nĩ kana methĩwe akwʼũ? Nĩkĩ mavatisawa nĩ kana methĩwe akwʼũ, ethĩwa ala akwʼũ maikathayũũkwʼa nongi?”