Nĩkĩ kwĩ Ũthũku na Mathĩna Maingĩ?

Yĩla ũndũ mũna mũthũku weekĩka, andũ aingĩ nĩmakothaa kũkũlya, “Nĩkĩ weekĩka?” Ĩndĩ nĩtũtanaa mũno nũndũ Mbivilia nĩsũngĩĩte ĩkũlyo yĩu kwa nzĩa nzeo vyũ!

1. Nĩ kyaũ Satani weekie kyatuma kwĩthĩwa na mathĩna ĩũlũ wa nthĩ?

Satani, ũla Ndevili, nĩwaleanile na Ngai. Endaa kũsumbĩka ala angĩ, na nũndũ wa ũu, atuma andũ ma mbee, Atamu na Eva, mamũlea Ngai. Satani eekie ũu kwa kũmũkenga Eva. (Mwambĩlĩlyo 3:1-5) Atumie Eva ambĩĩa kũsũanĩa kana Yeova nĩ ta wamaimĩte maũndũ maseo. O na ĩngĩ, oonanisye kana andũ no methĩwe me atanu malea kũmwĩwʼa Ngai. Satani nĩwaneenie ũvũngũ wa mbee vyũ yĩla watavisye Eva kana ndakakwʼa. Na nũndũ wa ũu, Mbivilia ĩmwĩtĩte Satani “mũkengani na ĩthe wa ũvũngũ.”—Yoana 8:44.

2. Atamu na Eva manyuvie kwĩka ata?

Yeova nĩwoonetye Atamu na Eva ũlau mwingĩ mũno. Ameie kana no maye matunda ma mĩtĩ yonthe ĩla yaĩ mũũndanĩ ũsu ate o ma mũtĩ ũmwe. (Mwambĩlĩlyo 2:15-17) Ĩndĩ o na vailye ũu, manyuvie kũya matunda ma mũtĩ ũsu. Eva nĩwatwie “ũsyao wawʼo, aya.” Na ĩndĩ ĩtina anenga mũũme “nake aya.” (Mwambĩlĩlyo 3:6) Kwoou onthe nĩmaleile kũmwĩwʼa Ngai. Nũndũ Atamu na Eva mayaĩ na naĩ, ndwaĩ ũndũ wĩ vinya kwoo kwĩka kĩla kyaĩlĩte. Ĩndĩ nũndũ wa kũlea na ngenda kũmwĩwʼa Ngai, nĩmeekie naĩ na malea aimasumbĩka. Ũtwi ũsu nĩwamalikilye thĩnanĩ mũnene mũno.—Mwambĩlĩlyo 3:16-19.

3. Ũtwi ũla Atamu na Eva meekie ũtumĩte tũkwatwa nĩ kyaũ?

Yĩla Atamu na Eva mavĩtisye, nĩmakwatiwe nĩ naĩ, na matuma nzyawa syoo syonthe syĩthĩwa na naĩ. Mbivilia yaĩtye ũũ ĩũlũ wa Atamu: “Kwĩsĩla mũndũ ũmwe naĩ yalikile ĩũlũ wa nthĩ na kĩkwʼũ kwĩsĩla naĩ, na kwondũ wa ũu, kĩkwʼũ kyavikĩa andũ onthe.”—Alomi 5:12.

Ũmũnthĩ nĩtũkwatawa nĩ mathĩna nũndũ wa itumi syĩ kĩvathũkanyʼo. Mavinda amwe, tũthĩnaa nũndũ wa kwĩka motwi mate maseo. Mavinda angĩ, tũkwatawa nĩ mathĩna nũndũ wa motwi mate maseo ma andũ angĩ. O na nĩtũkwatawa nĩ mathĩna nũndũ wa maũndũ matataĩĩwe.—Soma Mũtavanʼya 9:11.

ĨMANYĨSYE MŨNANGO

4. Nũũ ũla ũtumaa tũthĩna?

Andũ aingĩ maĩkĩĩaa kana Ngai nĩwe ũsumbĩkĩte nthĩ ĩno. Ĩndĩ ũu nĩ wʼo? Ĩloelei VITIO.

VITIO: Nũũ Ũla Ũsumbĩkĩte Nthĩ? (1:24)

Somai Yakovo 1:13 na 1 Yoana 5:19, na ĩndĩ mũineenea ĩkũlyo yĩĩ:

• We Ngai nĩwe ũtumaa ũthũku na mathĩna methĩwa kwʼo?

5. Kwĩthĩĩtwe ata kuma Satani ambĩĩa kũsumbĩka nthĩ?

VITIO: Nĩkĩ Ngai Ũekete Mathĩna Methĩwe Kwʼo?—Kalungu ka Vitio (3:07)

Somai Mwambĩlĩlyo 3:1-6, na ĩndĩ mũineenea makũlyo aa:

• Satani akenganie ata?—Sisya mũsoa wa 4 na 5.

• Satani oonanisye ata kana Yeova nĩ ta wamaimĩte andũ kĩndũ kĩseo?

• Satani oonanisye ata kana ti nginya andũ matongoewʼe nĩ Yeova nĩ kana methĩwe me atanu?

Somai Mũtavanʼya 8:9, na ĩndĩ mũineenea ĩkũlyo yĩĩ:

• Ĩvindanĩ yĩu Yeova ũtethĩĩtwe asumbĩkĩte nthĩ ĩno, maũndũ methĩĩtwe mailye ata?

1. Mbeenĩ Atamu na Eva mayaĩ na naĩ na mekalaa nthĩnĩ wa Valatiso. Ĩndĩ nĩmamwĩthukĩĩisye Satani na malea kũmwĩwʼa Yeova

2. Ĩtina wa ũlei ũsu, andũ nĩmakwatiwe nĩ naĩ, na mambĩĩa kũthĩna, o na kũkwʼa

3. Yeova akamina naĩ, mathĩna, na kĩkwʼũ. Na o tondũ kwailye mbeenĩ, andũ mayĩthĩwa me eanĩu na mayĩkala nthĩ yĩ Valatiso

6. Yeova nũtũthĩnĩkĩaa yĩla twĩ na mathĩna

We Ngai nũlũnganaa na mathĩna maitũ? Kwasũanĩa kĩla Mũsumbĩ Ndaviti na mũtũmwa Vetelo maandĩkie. Somai Savuli 31:7 na 1 Vetelo 5:7, na ĩndĩ mũineenea ĩkũlyo yĩĩ:

• We weewʼa ata wamanya kana Yeova nũmanyaa yĩla twĩ mathĩnanĩ, na nũtũthĩnĩkĩaa mũno?

KĨLA TWEEMANYĨSYA

Satani, ũla Ndevili, o vamwe na Atamu na Eva, nĩmo matumie ũthũku wĩthĩwa vaa ĩũlũ wa nthĩ. Yeova nũthĩnĩkaa mũno yĩla twĩ mathĩnanĩ, na o mĩtũkĩ nũkũmamina onthe.

Makũlyo ma Kũsyokeleela

• Satani, ũla Ndevili, akengie Eva ata?

• Ũlei wa Atamu na Eva ũtumĩte tũkwatwa nĩ maũndũ meva?

• Nĩ kyaũ kĩũkũĩkĩĩthya kana Yeova nũthĩnĩkaa yĩla twĩ mathĩnanĩ?

MAŨNDŨ ANGĨ MA KWĨMANYĨSYA

Ĩmanyĩsye wone kĩla Mbivilia ĩwetete ĩũlũ wa naĩ.

“Naĩ Nĩ Kyaũ?” (Ũvoo wĩ kĩsesenĩ)

Soma ũmanye maũndũ maingangĩ ĩũlũ wa kĩla Satani, ũla Ndevili, wawetie mũũndanĩ wa Eteni.

“Nĩkĩ Ngai Wĩtĩkĩlĩtye Andũ Mathĩne?” (Mũsyaĩĩsya, Ĩtukũ 1, Mwei wa 1, 2014)

Soma wone mosũngĩo ma kwendeesya ma ĩkũlyo yĩmwe yĩthĩnĩtye andũ mũno.

“Nĩkĩ Ayuti Aingĩ Mooaiwe Ĩvinda ya Hitler? Nĩkĩ Ngai Ũtaasiĩĩa Ũaani Ũsu?” (Ũvoo wĩ kĩsesenĩ)

Sisya wone kĩla mũndũũme ũmwe weemanyĩisye ĩũlũ wa ũthũku ũla woonaa ũendeee.

Yu Ndyĩwʼaa ta Nĩ Nyioka (5:09)

Twĩkaa naĩ, tũkathĩna, na tũkakwʼa nĩkwĩthĩwa asyai maitũ ma mbee Atamu na Eva, nĩmaleile kũmwĩwʼa Ngai.a Ĩndĩ ũu ti kwasya kana tũi na wĩkwatyo. Yeova nĩwatũmie Mwana wake, Yesũ Klĩsto, kũũ ĩũlũ wa nthĩ nĩ kana akwʼe na aitũtangĩĩa kumana na naĩ na kĩkwʼũ. Mbivilia ĩmanyĩasya kana kĩkwʼũ kya Yesũ nĩkyo kyaĩvĩie naĩ sitũ. Kana kwa ndeto ingĩ, nĩkyo kyaĩ wovosyo witũ. Wovosyo nĩ ndĩvi ĩla mũndũ ũĩvaa nĩ kana mũndũ ũngĩ ovowʼe kana athawʼe. Yesũ aĩvie ndĩvi ĩsu kwĩsĩla thayũ wake ũla ũtaĩ na naĩ. (Soma Mathayo 20:28.) Yĩla Yesũ weeyumisye akwʼa kwa ngenda vandũ va kwĩkala tene na tene vaa ĩũlũ wa nthĩ, nĩwatũvingũĩe nzĩa nĩ kana tũtonye kũkwata ĩngĩ kĩla kyaaĩtwʼe nĩ Atamu na Eva. O na ĩngĩ Yesũ nĩwoonanisye ũtheinĩ ũndũ e na Yeova matwendete mũno wĩana. Ĩsomo yĩĩ nĩyĩũkũtetheesya wone ũndũ ũtonya kũtũngaa mũvea kwondũ wa kĩkwʼũ kya Yesũ.

1. Kĩkwʼũ kya Yesũ kĩtũtethasya ata ũmũnthĩ?

Nũndũ twĩ ene naĩ, nĩtwĩkaa maũndũ maingĩ ala matamwendeeasya Yeova. Ĩndĩ o na vailye ũu, yĩla tweelila na twamũkũlya Yeova atũekee kwĩsĩla nthembo ya Yesũ na tũitata ũndũ tũtonya tũikasyokee mavĩtyo asu ĩngĩ, nĩtũtonya kũtanĩa ngwatanĩo ya vakuvĩ vamwe na Ngai. (1 Yoana 2:1) Mbivilia yaĩtye: “Klĩsto akwie ĩvinda o yĩmwe nĩ kana avete naĩ, atakakwʼa ĩngĩ, mũndũ mũlũngalu kwondũ wa andũ mate alũngalu, nĩ kana amwĩwʼanĩthye na Ngai.”—1 Vetelo 3:18.

2. Kĩkwʼũ kya Yesũ kĩkatũtethya ata ĩvindanĩ yũkĩte?

Yeova amũtũmie Yesũ kũũ ĩũlũ wa nthĩ aumye thayũ wake ũte na naĩ “nĩ kana kĩla mũndũ ũmũĩkĩĩaa ndakanangwe, ĩndĩ akwate thayũ wa tene na tene.” (Yoana 3:16) Nũndũ wa nthembo ya Yesũ, o mĩtũkĩ Yeova nũkũmina maũndũ mathũku onthe ala maetetwe nĩ kũlea kwĩwʼa kwa Atamu. Ũu nĩ kwasya kana tweethĩwa na mũĩkĩĩo nthĩnĩ wa nthembo ya Yesũ ya wovosyo, tũkatanĩa kwĩkala tene na tene nthĩ yĩ valatiso!—Isaia 65:21-23.

ĨMANYĨSYE MŨNANGO

3. Kĩkwʼũ kya Yesũ nĩkĩtũtangĩĩaa kumana na naĩ na kĩkwʼũ

Ĩloelei VITIO, na ĩndĩ mũineenea ĩkũlyo yĩla yĩatĩĩe.

VITIO: Yesũ Akwie Nĩkĩ?—Kalungu ka 1 (2:01)

• Atamu aaisye kyaũ yĩla wanyuvie kũlea kũmwĩwʼa Ngai?

Somai Alomi 5:12, na ĩndĩ mũineenea ĩkũlyo yĩĩ:

• Naĩ ya Atamu ĩtumĩte ũkwatwa nĩ kyaũ?

Somai Yoana 3:16, na ĩndĩ mũineenea ĩkũlyo yĩĩ:

• Nĩkĩ Yeova watũmie Mwana wake kũũ nthĩ?

1. Mbeenĩ Atamu ndaĩ na naĩ, ĩndĩ yĩla waleile kũmwĩwʼa Ngai, andũ onthe nĩmakwatiwe nĩ naĩ na kĩkwʼũ

2. Yesũ aĩ mũndũ ũtaĩ na naĩ ũla wamwĩwie Ngai, na nũndũ wa ũu, andũ me na mwanya wa kwĩsa kũvetangĩwa naĩ na mayĩkala tene na tene

4. Kĩkwʼũ kya Yesũ no kĩtethye andũ onthe

Ĩloelei VITIO, na ĩndĩ mũineenea ĩkũlyo yĩla yĩatĩĩe.

VITIO: Yesũ Akwie Nĩkĩ?​—Kalungu ka 2 (2:00)

• Kĩkwʼũ kya mũndũ ũmwe kĩtonya kũtethya andũ onthe ata?

Somai 1 Timotheo 2:5, 6, na ĩndĩ mũineenea ĩkũlyo yĩĩ:

• Mbeenĩ Atamu ndaĩ na naĩ, ĩndĩ yĩla wavĩtisye andũ onthe nĩmakwatiwe nĩ naĩ na kĩkwʼũ. O nake Yesũ ndaĩ na naĩ. Ĩndĩ nĩ kwa nzĩa yĩva waumisye “wovosyo wĩanĩe” kwovosya andũ onthe?

5. Wovosyo nĩ mũthĩnzĩo Yeova ũkũnengete

Anyanya ma Yeova monaa wovosyo ne mũthĩnzĩo wa vata mũno. Kwa ngelekanyʼo, somai Akalatia 2:20, na ĩndĩ mũineenea ĩkũlyo yĩĩ:

• Mũtũmwa Vaulo oonanisye ata kana we mwene nĩwonaa wovosyo wĩ mũthĩnzĩo wa mwanya?

Yĩla Atamu weekie naĩ, we vamwe na nzyawa syake nĩmasilĩilwe kĩkwʼũ. Ĩndĩ Yeova nĩwatũmie Mwana wake akwʼe nĩ kana ũkwate mwanya wa kũtanĩa thayũ tene na tene.

Ũisoma mĩsoa ĩno ĩatĩĩe, tata kũsũanĩĩa ũndũ Yeova ũtonya kwĩthwa eewʼaa yĩla Mwana wake waendeee na kũthĩnwʼa. Somai Yoana 19:1-7, 16-18, na ĩndĩ mũineenea ĩkũlyo yĩĩ:

• We wĩwʼaa ata wasũanĩa kĩla Yeova na Yesũ meekie kwondũ waku?

KĨLA TWEEMANYĨSYA

Kĩkwʼũ kya Yesũ nĩkĩtumaa Yeova atũekea naĩ sitũ, na nĩkĩtũnengae mwanya wa kwĩsa kũtanĩa thayũ tene na tene.

Makũlyo ma Kũsyokeleela

• We Yesũ akwie nĩkĩ?

• Nĩ kwa nzĩa yĩva kĩkwʼũ kya Yesũ kyeethĩiwe kĩ wovosyo wĩanĩe kwovosya andũ onthe?

• Kĩkwʼũ kya Yesũ kĩtonya kũũtethya ata?

MAŨNDŨ ANGĨ MA KWĨMANYĨSYA

Ĩmanyĩsye wone nĩkĩ thayũ wa Yesũ ũla waumisye ũtaĩ na naĩ wĩtawa wovosyo.

“Nĩ kwa Nzĩa Yĩva Nthembo ya Yesũ Nĩ ‘Wovosyo Kwondũ wa Aingĩ’?” (Ũvoo wĩ kĩsesenĩ)

Soma ũmanye kĩla twaĩlĩte kwĩka nĩ kana tũtangĩĩwe kumana na naĩ, na kĩkwʼũ.

“Yesũ Atangĩĩaa Andũ Ata?” (Ũvoo wĩ kĩsesenĩ)

Yeova no aekee o na naĩ ila ngito?

“Mosũngĩo ma Makũlyo ma Mbivilia” (Mũsyaĩĩsya, Ĩtukũ 1, Mwei wa 5, 2013)

Soma wone ũndũ kwĩmanyĩsya ĩũlũ wa nthembo ya Klĩsto kwatetheeisye mũndũũme ũmwe avĩndũa mwĩkalĩle wake.

“Yu ndi Ngombo ya Ũngʼendu” (Ũvoo wĩ kĩsesenĩ)