15. Nĩkĩ Yesũ wĩtĩtwe “ũsyao wa mbee”?

¹⁵ Yesũ nĩwe waĩ wa mbee kũthayũũkwʼa athi ĩtunĩ e na mwĩĩ wa veva, na ũthayũũkyo ũsu wake nĩwʼo wa vata vyũ. (Meko 26:23) Ĩndĩ ti we e weka wathaniwe kana akathayũũkwʼa athi ĩtunĩ. Yesũ nĩwaĩkĩĩthisye ala atũmwa make aĩkĩĩku kana makasumbĩka nake ĩtunĩ. (Luka 22:28-30) Ĩndĩ nĩ kana makwate ĩtuvi yoo maĩ no nginya mambe kũkwʼa. Na ĩndĩ o ta Klĩsto, maithayũũkwʼa na mwĩĩ wa veva. Vaulo aandĩkie asya kana ‘Klĩsto nĩwathayũũkiwʼe kuma kwa akwʼũ, ũsyao wa mbee wa ala makomete.’ Vaulo asyokie oonanyʼa kana ve angĩ makathayũũkwʼa mathi ĩtunĩ. Aandĩkie ũũ: ‘Kĩla mũndũ vandũ vake mwene: Klĩsto ũsyao wa mbee; na ĩtina nĩ ala ma Klĩsto, yĩla wĩũka [kana “ĩvinda ya kwĩthĩwa vo kwake,” NWT].’—1 Ako. 15:20, 23.

16. Nĩ kyaũ kĩtũtetheeasya kũmanya ũthayũũkyo wa ala maendaa ĩtunĩ wambĩĩe ĩndĩĩ?

¹⁶ Ndeto isu syĩtũtetheesya kũkwatya nĩ ta ĩndĩĩ ala ma kũthi ĩtunĩ maĩ mambĩĩe kũthayũũkwʼa. Ũthayũũkyo ũsu waĩ wambĩĩe ‘ĩvindanĩ ya kwĩthĩwa vo kwake.’ Kwa ĩvinda ĩasa Ngũsĩ sya Yeova nitũmĩĩte Maandĩko nĩ kenda syonanyʼe kana kuma mwaka wa 1914 twĩthĩĩtwe tũyĩkala ‘ĩvindanĩ ya kwĩthĩwa vo’ kwa Yesũ. Tũtwĩe o ĩvindanĩ yĩu na mũthya wa nthĩ ĩno nthũku wĩ vakuvĩ mũno.

17, 18. Kũkeethĩwa ata kwa etĩkĩwʼa mauta amwe ĩvindanĩ ya kwĩthĩwa vo kwa Klĩsto?

¹⁷ Ve maũndũ angĩ Mbivilia ĩtũtavĩtye ĩũlũ wa ũthayũũkyo wa ĩtunĩ. Ĩtwĩĩte ũũ: ‘Tũikwenda mũlee kũmanya ũvoo wa ala makomaa; nũndũ ethĩwa nĩtũkwĩtĩkĩla kana Yesũ nĩwakwie na athayũũka ĩngĩ, o ta ũu nao ala makomete nthĩnĩ wa Yesũ, Ngai akamaete vamwe nake. Ithyĩ ala twĩ thayũ, ala tũkatiala kũvika kũka [kana “ĩvinda ya kwĩthĩwa vo,” NWT] kwa Mwĩaĩi, tũikamatongoesya nongi ala makomie. Nĩkwĩthĩwa Mwĩaĩi mwene akatheea kuma ĩtunĩ, na wasya mũtũlu, na ala makwie nthĩnĩ wa Klĩsto makathayũũka mbee; na ĩndĩ ĩtina ithyĩ ala twĩ thayũ ala twatialile, tũkavulwʼa [kana “tũkooswa,” NWT] vamwe nao mathweonĩ, kũmũthaũa Mwĩaĩi yayayanĩ: na ũu tũkeethĩwa vamwe na Mwĩaĩi tene na tene.’—1 Ath. 4:13-17.

¹⁸ Ala maendaa ĩtunĩ mambĩĩe kũthayũũkwʼa kavinda kanini kuma “ĩvinda ya kwĩthĩwa vo” kwa Klĩsto yambĩĩa. Etĩkĩwʼa mauta ala makethĩwa kũũ nthĩ ĩvindanĩ ya ũla thĩna mũnene, ‘makooswa’ mathweonĩ. Ũu nĩ kwasya ata? Ndeto isu syĩonanyʼa kana ‘maikakoma’ kĩkwʼũnĩ, kana kwa ndeto ingĩ, maikekala mũno me akwʼũ. Onthe ‘makaalyũkwʼa, kavinda kanini, kũvenyʼa na kũsalukya, ũivuvwa soo wa mũminũkĩlyo.’—1 Ako. 15:51, 52; Mt. 24:31.

20. Nĩkĩ tũtonya kwĩthĩwa na mũĩkĩĩo kana kũkeethĩwa na mũvango mũseo wa kũthayũũkya akwʼũ?

²⁰ Mbivilia yaĩtye kana ala mathayũũkawʼa na kũthi ĩtunĩ mathayũũkawʼa “kĩla mũndũ vandũ vake mwene.” (1 Ako. 15:23) Kwoou no twĩthĩwe na mũĩkĩĩo kana o nakwʼo kũũ nthĩ kũkeethĩwa na mũvango mũseo wa kũthayũũkya ala akwʼũ. Ũsu nĩ ũndũ mũseo mũno tweteele. Kĩu no kĩtume twĩkũlya makũlyo ta, ‘Mo ala makethĩwa manakwie o mĩtũkĩ nĩmo makamba kũthayũũkwʼa Ũsumbĩki wa Myaka Ngili wa Klĩsto wambĩĩa na maithokwʼa nĩ ala mamesĩ? Mo ala aũme ma tene maĩ mũĩkĩĩo mũlũmu na maĩ na ũtũĩka wa kũtongoesya nĩmo makamba kũthayũũkwʼa nĩ kana matetheesye kũvanga andũ ma Ngai nthĩnĩ wa nthĩ nzaũ? Kũkeethĩwa kũilyĩ ata kwa ala mataamũthũkũma Yeova? Makathayũũkwʼa ĩndĩĩ na makathayũũkĩa va?’ Ve makũlyo maingĩ tũtonya kwĩkũlya. Ĩndĩ tũineena ũla wʼo, vo ve kĩtumi kĩseo kya kũtinda tũisũanĩa maũndũ asu oyu? Tyo kavaa tũkeka kweteela twĩĩyonea ithyĩ ene ũndũ maũndũ makathi? No twĩthĩwe na mũĩkĩĩo kana tũkatanĩa mũno kwona ũndũ Yeova ũkatwaĩĩsya maũndũ.