• Ũndũ Tũtonya Kwĩka Motwi Maseo
    Tanĩa Thayũ Tene na Tene!—Masomo ma Mbivilia Matonya Kũũtethya

    • 5. Nenga ndaĩa wasya wa ngoo wa andũ ala angĩ

      Andũ me kĩvathũkanyʼo nĩmatonya kwĩka motwi matavwʼanene. Tũtonya kwonanyʼa ata kana nĩtũnengete ndaĩa wasya wa ngoo wa ala angĩ? Kwasũanĩa maũndũ aa elĩ matonya kwĩkĩka:

      Ũndũ wa 1: Mwĩĩtu-a-asa wendete kwĩvaka syĩndũ sya kwĩyanakavya nũtonya kũthamĩĩa kĩkundinĩ kĩ na eĩtu-a-asa mewʼaa maũmĩa moona mũndũ wĩvakĩte syĩndũ isu.

      Somai Alomi 15:1 na 1 Akolintho 10:23, 24, na ĩndĩ mũineenea makũlyo aa:

      • Kwosana na mĩsoa ĩsu, mwĩĩtu-a-asa ũsu atonya kwĩka ata? We ũtonya kwĩka ata ũkeyĩthĩa wĩ na mũndũ wasya wake wa ngoo ũũmũvata kwĩka ũndũ mũna, ĩndĩ wasya waku wa ngoo nũũkwĩtĩkĩlya kũwĩka?

      Ũndũ wa 2: Kwasũanĩa mwana-a-asa wĩsĩ nesa kana Mbivilia ndĩvatanĩte kũnywʼa ũkĩ kwa kĩthimo, ĩndĩ aitwʼa kana ndakanywʼa ũkĩ o na vanini. Na yu mũthenya ũmwe aithokwʼa nĩ ana-a-asa maketanĩthye na ayona mainywʼa ũkĩ.

      Somai Mũtavanʼya 7:16 na Alomi 14:1, 10, na ĩndĩ mũineenea makũlyo aa:

      • Kwosana na mĩsoa ĩsu, mwana-a-asa ũsu atonya kwĩka ata? We ũtonya kwĩka ata woona mũndũ ũngĩ ayĩka ũndũ mũna ũla wasya waku wa ngoo ũtakwĩtĩkĩlasya kũwĩka?

      Nĩ maũndũ meva matonya ũkũtetheesya kwĩka motwi maseo?

      Mũndũ mũka ũkũvoya.

      1. Mũkũlye Yeova aũtetheesye ũmanye kĩla waĩlĩte kwĩka. —Yakovo 1:5.

      O mũndũ mũka ũsu ayĩka ũkunĩkĩli atũmĩĩte Mbivilia, mavuku maitũ ala maeleetye ĩũlũ wa Mbivilia, na kombyũta.

      2. Ĩka ũkunĩkĩli Mbivilianĩ na mavukunĩ maitũ ala me na ũvoo umĩte Mbivilianĩ nĩ kana ũkwate myolooto ĩtonya ũkũtetheesya. O na no ũkũlye Mũklĩsto mũimu kĩ-veva aũnenge ũtao.

      O mũndũ mũka ũsu aendeee kũvindĩĩsya.

      3. Sũanĩa kĩla kĩtonya kũetwe nĩ ũtwi waku. Ũtonya kũtuma we mwene wĩwʼa ata kana andũ ala angĩ?

  • Ũndũ Twaĩle Kwĩyanakavya na Kwĩkĩa Ngũa
    Tanĩa Thayũ Tene na Tene!—Masomo ma Mbivilia Matonya Kũũtethya

    • Ithyonthe nĩtwĩthĩawa na mawoni me kĩvathũkanyʼo ĩũlũ wa ngũa ila tũkwĩkĩa na ũndũ tũkwĩyanakavya. Ethĩwa tũkaatĩĩaa myolooto ya Mbivilia, tũikanyuvaa o kĩla ithyĩ twĩwʼaa twendete kwĩkĩa ĩndĩ kĩla kĩmwendeeasya Yeova. Eka tũneenee myolooto ĩmwe.

      1. Nĩ myolooto yĩva yaĩle kũtũtongoesya yĩla tũũnyuva ngũa ila tũkwĩkĩa kana ũndũ tũkwĩyanakavya?

      Twaĩlĩte kũnyuva “ngũa ila syaĩlĩte, [twĩ] na ndaĩa na kĩlĩko kĩanĩu,” na mavinda onthe tũyĩthĩawa twĩ atheu nĩ kana angĩ mone ‘nĩtũmũkĩaa Ngai.’ (1 Timotheo 2:9, 10) Kwasũanĩa myolooto ĩno ĩna: (1) Ngũa sitũ syaĩle kwĩthĩwa “syaĩlĩte.” O tondũ wonete maũmbanonĩ maitũ ma kĩkundi, athũkũmi ma Yeova mekĩaa ngũa syĩ kĩvathũkanyʼo, ĩndĩ mwĩkĩĩle witũ na ũndũ tũseũvasya nzwʼĩĩ sitũ twonanasya kana nĩtũmũnengete ndaĩa Ngai ũla tũthaithaa. (2) Kwĩkĩa ngũa twĩ na “ndaĩa” kwonanasya kana tũyaĩle kwĩkĩa ngũa itonya kũtuma angĩ makwatwa nĩ mesilya kana mawendi mataĩle, kana kũtuma matũketeea mũno. (3) Twonanasya twĩ na “kĩlĩko kĩanĩu” kwa kũlea kũatĩanĩa na kĩla mũtindo wa ngũa waumĩla. (4) Mavinda onthe mwĩkĩĩle witũ wa ngũa waĩle kwonanyʼa kana ‘nĩtũmũkĩaa Ngai,’ na angĩ mayona kana tũthaithaa Ngai ũla wa wʼo.—1 Akolintho 10:31.

      2. Mwĩkĩĩle witũ wa ngũa ũtonya kũtuma ana-a-asa na eĩtu-a-asa maitũ mewʼa ata?

      O na kau twĩ na ũthasyo wa kwĩnyuvĩa kĩla tũkwĩkĩa, nĩtwaĩle kũsũanĩa ũndũ andũ ala angĩ matonya kwĩwʼa nũndũ wa mwĩkĩĩle witũ wa ngũa. Nĩtwaĩle kũtata ũndũ tũtonya tũikalulutĩkye mũndũ o na wĩva. Vandũ va ũu, kĩla ũmwe witũ aĩle kwĩkĩa kĩthito “amwendeesye mũtũi wake kwa kũmwĩka ũseo, nĩ kana amwĩkĩe vinya.”—Soma Alomi 15:1, 2.

      3. Mwĩkĩĩle witũ wa ngũa ũtonya ata kũtuma angĩ mendeewʼa nĩ ũthaithi wa wʼo?

      Nĩtũtataa ũndũ tũtonya twĩkĩe ngũa nesa mavinda onthe, ĩndĩ nĩtwĩthĩawa twĩ metho mũnango yĩla tũũnyuva ngũa ila tũkwĩkĩa tũithi maũmbanonĩ ma kĩkundi, kana ũtavanyʼanĩ. Tũyendaa andũ melelũkwʼe nĩ mwĩkĩĩle witũ wa ngũa, na nũndũ wa ũu mailea kwĩthukĩĩsya ũvoo wa vata ũla tũmatwaĩe. Vandũ va ũu, twĩenda mwĩkĩĩle witũ ũtume andũ mendeewʼa nĩ Ngai ũla tũthũkũmaa na ‘ũyanakavya momanyĩsyo ma Ngai, Mũtangĩĩi waitũ.’—Tito 2:10.

      ĨMANYĨSYE MŨNANGO

      Ĩmanyĩsye wone ũndũ tũtonya kũĩkĩĩthya kana twĩĩkĩa ngũa na kwĩyanakavya kwa nzĩa ĩla ĩtwaĩlĩte twĩ Aklĩsto.

      Aũme elĩ maũngye mbee wa mũsili wa makoani. Mũndũũme ũmwe ekĩĩte suti, na ũla ũngĩ ekĩĩte o mũvuuto wa jeans mũtembũkangu, t-shirt, na akekĩa ngovia.

      Mwĩkĩĩle witũ wa ngũa na kwĩyanakavya, no syonanyʼe ethĩwa nĩtũnengete ndaĩa ala me na ũkũmũ. O na kau Yeova nĩwonaa kĩla kĩ ngoonĩ sitũ, nĩtwaĩle kwonanyʼa kana nĩtũmũnengete ndaĩa kwĩsĩla mwĩkĩĩle witũ wa ngũa na kwĩyanakavya

      4. Kwĩyanakavya na kwĩkĩa ngũa nesa kwonanasya kana nĩtũmũnengete Yeova ndaĩa

      Nĩ ũndũ wĩva wa vata vyũ ũla ũtumaa twenda kwĩyanakavya na kwĩkĩa ngũa nesa? Somai Ũvuanyʼo 4:11, na ĩndĩ mũineenea makũlyo aa maatĩĩe:

      • Kũmanya kana twĩtanĩawʼa na Yeova kwaĩle kũtuma twĩkĩa ngũa ata?

      • We nũkwona ne ũndũ wa vata kũthĩnĩkĩa ũndũ tũkwĩkĩa ngũa na kwĩyanakavya yĩla tũũthi maũmbanonĩ kana ũtavanyʼanĩ? Nĩkĩ wasũngĩa ũu?

      5. Ũndũ tũtonya kwĩka motwi maseo ĩũlũ wa mwĩkĩĩle witũ wa ngũa na kwĩyanakavya

      Ĩloelei VITIO.

      VITIO: “Ĩkai Maũndũ Onthe Kwondũ wa Kũmũtaĩa Ngai” (10:18)

      O na ethĩwa ngũa sitũ nĩ sya thooa mũnene kana mũnini, nĩsyaĩle kwĩthĩwa syĩ ntheu na syaĩlĩte kwosana na maũndũ ala tũkwĩka. Somai 1 Akolintho 10:24 na 1 Timotheo 2:9, 10. Na ĩndĩ, mũineenea nĩkĩ tũtaĩle kwĩkĩa ngũa . . .

      • ite ntheu na itailye nesa.

      • itũkwete mũno, syĩkwonanyʼa ũndũ mwĩĩ witũ ũilye, kana iũtuma angĩ makwatwa nĩ mesilya kana mawendi mataĩle.

      O na kau Aklĩsto mai ungu wa Mĩao ya Mose, no ĩmatetheesye kũelewa ũndũ Yeova wonaa maũndũ. Somai Kũtũngĩlĩlwa Kwa Mĩao 22:5, na ĩndĩ mũineenea ĩkũlyo yĩĩ:

      • Nĩkĩ twaĩle kwĩvathana na mĩkĩĩle ya ngũa ĩla ĩtumaa aũme moneka mailye ta aka, namo aka moneka mailye ta aũme?

      Somai 1 Akolintho 10:32, 33 na 1 Yoana 2:15, 16, na ĩndĩ mũineenea makũlyo aa:

      • Nĩkĩ twaĩle kũsũanĩa ethĩwa kwĩyanakavya, kana mwĩkĩĩle witũ wa ngũa nũũlulutĩkya andũ kĩsionĩ kĩla twĩkalaa kana kĩkundinĩ?

      • Kĩsionĩ kĩla wĩkalaa andũ mendete kwĩyanakavya na kwĩkĩa ngũa siilye ata?

      • We nũkwona mĩthemba ĩmwe ya ngũa isu ta ĩtonya kwĩthĩwa ĩtaĩlĩte kwa Mũklĩsto? Nĩkĩ wasũngĩa ũu?

      No tũnyuve kwĩkĩa mĩthemba yĩ kĩvathũkanyʼo ya ngũa na tũiendeea kũmwendeesya Yeova

      Aũme na aka ma yĩika yĩ kĩvathũkanyʼo, na maumĩte kũndũ kwĩ kĩvathũkanyʼo, maseũvĩtye nzwʼĩĩ kwa nzĩa syĩ kĩvathũkanyʼo, na makekĩa ngũa syaĩlĩte Aklĩsto.

      ANDŨ AMWE MAASYA: “Nĩ na ũthasyo wa kwĩkĩa ũndũ ngwenda, na vaiĩ mũndũ waĩlĩte kũngũlya.”

      • We nũkwĩtĩkĩlana na ũndũ ũsu? Nĩkĩ wasũngĩa ũu?

      KĨLA TWEEMANYĨSYA

      Yĩla tweekĩa ngũa na tweeyanakavya nesa, twonanasya kana nĩtũmũnengete Yeova ndaĩa o vamwe na andũ ala angĩ.

      Makũlyo ma Kũsyokeleela

      • Nĩkĩ mwĩkĩĩle witũ wa ngũa na kwĩyanakavya ne maũndũ ma vata mũno kwa Yeova?

      • Nĩ myolooto ta yĩva yaĩle kũtũtongoesya yĩla tũũnyuva ngũa ila tũkwĩkĩa kana ũndũ tũkwĩyanakavya?

      • Mwĩkĩĩle witũ wa ngũa ũtonya kũtuma ala angĩ methĩwa na woni ũilye ata ĩũlũ wa ũthaithi wa wʼo?

      Ũndũ wa Kwĩka

      MAŨNDŨ ANGĨ MA KWĨMANYĨSYA

      Sũanĩa andũ ala angĩ makwonaa ata nũndũ wa mwĩkĩĩle waku wa ngũa.

      “Andũ Mambonaa Nĩilye Ata?” (Ũvoo wĩ kĩsesenĩ)

      Soma wone nĩkĩ nĩ ũndũ wa vata kwamba kũsũanĩa mũno ũtanatwʼa ethĩwa nũkwĩvana mwĩĩnĩ.

      “Mbivilia Yaĩtye Ata Ĩũlũ wa Kwĩvana Mwĩĩnĩ?” (Ũvoo wĩ kĩsesenĩ)

      Soma wone myolooto mingangĩ ĩla ĩtonya kũtũtetheesya yĩla tũkwĩka motwi.

      “Mwĩkĩĩle Waku wa Ngũa Nũmũtaĩaa Ngai?” (Mũsyaĩĩsya, Mwei wa 9, 2016)

      Mũndũ mũka ũmwe, ũla wendaa kũmwendeesya Ngai, eemanyĩisye ata kwĩtĩkĩlana na ũndũ ala angĩ manyuva kwĩkĩa ngũa?

      “Nĩnathĩnĩkaa Noona Ũndũ Andũ Angĩ Mekwĩkĩa Ngũa na Kwĩyanakavya” (Amkeni!, Matukũ 22, Mwei wa 12, 2003)