3. (a) Yesũ aĩ na woni mwaũ ĩũlũ wa siasa sya ĩvinda yake? (b) Nĩkĩ tũtonya kwasya kana aatĩĩi ma Yesũ etĩkĩwʼa mauta nĩ andũ maũngamĩte vandũ vake? (Sisya maelesyo ma kwongeleela.)

³ Vandũ va kwĩlikya siasanĩ ĩla syaendeee ĩvindanĩ yake, Yesũ aendeeie kũtavanyʼa ĩũlũ wa Ũsumbĩ wa Ngai. Ũsumbĩ ũsu nĩ silikalĩ ya ĩtunĩ ĩla waĩ ethĩwe e Mũsumbĩ wayo. (Ndanieli 7:13, 14; Luka 4:43; 17:20, 21) Kwoou, ĩla waĩ mbee wa Vontio Vilato, Ngavana Mũlomi, Yesũ aĩ atonya kwasya, “Ũsumbĩ wakwa ti wa nthĩ ĩno.” (Yoana 18:36) Aatĩĩi ala aĩkĩĩku ma Klĩsto nĩmaatĩĩaa ngelekanyʼo yake kwa kwĩthĩwa me aĩkĩĩku kwake na Ũsumbĩ wake, na kwa kũtavanyʼa ĩũlũ wa Ũsumbĩ ũsu. (Mathayo 24:14) Mũtũmwa Vaulo aandĩkie atĩĩ: “[Nũndũ] twĩ atũmwa kwondũ wa Klĩsto [kana “andũ maũngamĩte vandũ va Klĩsto,” NWT], nĩtũũmwĩsũva kwondũ wa Klisto, mwĩwʼanĩthwʼe na Ngai.”a—2 Akolintho 5:20.

4. Aklĩsto onthe ma wʼo monanasya ata kana nĩ aĩkĩĩku kwa Ũsumbĩ wa Ngai? (Sisya ĩsandũkũ ĩthangũnĩ ya 52.)

⁴ Andũ ala matũmawa nĩ nthĩ yoo makaũngame vandũ vayo me nthĩ ya ũeninĩ, mailikĩlĩĩlaa maũndũ ma kĩ-nthĩnĩ ma nthĩ ĩsu matũmĩtwe, o na mayĩlikasya siasanĩ syayo. Vandũ va ũu, mathĩnĩkĩaa mavata ma silikalĩ ya nthĩ ĩla ĩmatũmĩte. Ũu nowʼo aatĩĩi ma wʼo etĩkĩwʼa mauta ma Klĩsto mekaa, nũndũ ‘kwoo nĩ ĩtunĩ.’ (Avilivi 3:20) Aklĩsto asu etĩkĩwʼa mauta nĩmatavanasya na kĩthito ĩũlũ wa Ũsumbĩ, na nũndũ wa ũu nĩmatetheesye andũ milioni mbingĩ ma “malondu angĩ” ma Klĩsto ‘mewʼanĩthwʼe na Ngai.’ (Yoana 10:16; Mathayo 25:31-40) Malondu asu angĩ nĩmamakwataa mbau ana-a-asa ma Yesũ etĩkĩwʼa mauta. Ikundi isu syelĩ nĩ ĩĩthya yĩmwe, na itavanasya ĩũlũ wa Ũsumbĩ wa Masia, ite kũlika o na vanini siasanĩ sya nthĩ.—Soma Isaia 2:2-4.