• Nĩ Sikũkũ Syonthe Imũtanĩthasya Ngai?
    Tanĩa Thayũ Tene na Tene!—Masomo ma Mbivilia Matonya Kũũtethya

    • Somai Aeveso 5:10, na ĩndĩ mũineenea makũlyo aa:

      • Nĩ kyaũ twaĩle kũĩkĩĩthya yĩla tũũtwʼa ethĩwa nĩtũũtanĩa sikũkũ?

      • Nĩ sikũkũ ta syĩva syĩ nguma kĩsionĩ kĩla wĩkalaa?

      • We nũkwona sikũkũ isu ta imwendeeasya Yeova?

      Kwa ngelekanyʼo, waaĩkũlya we Ngai onaa ata kũtanĩa mũthenya wa kũsyawa? Mbivilia ndĩwetete mũthũkũmi o na ũmwe wa Yeova waatanĩa mũthenya wake wa kũsyawa, ĩndĩ nĩwetete mĩthenya ĩlĩ ya kũsyawa yatanĩiwe nĩ andũ elĩ matamũthaithaa. Somai Mwambĩlĩlyo 40:20-22 na Mathayo 14:6-10. Na ĩndĩ, mũineenea makũlyo aa:

      • Mĩthenya ĩsu ĩlĩ ya kũsyawa yĩ na maũndũ meva mavwʼanene?

      • Kwosana na ngelekanyʼo isu ilĩ syĩ Mbivilianĩ, we wĩona Yeova ta wĩwʼaa ata ĩũlũ wa kũtanĩa mũthenya wa kũsyawa?

      O na ĩngĩ no wĩkũlye, ‘Kwa wʼo Yeova nĩ ũũmĩaa natanĩa mũthenya wa kũsyawa kana sikũkũ ingĩ ta isu itosanĩte na Maandĩko?’ Somai Kuma 32:1-8. Na ĩndĩ mũyĩloela VITIO, na mũineenea makũlyo aa maatĩĩe:

      VITIO: Sikũkũ Ila Itamwendeeasya Ngai (5:07)

      • Nĩkĩ twaĩlĩte kwĩyĩkĩĩthya maũndũ ala Yeova wĩtĩkĩlaa?

      • Tũtonya kwĩka ũu ata?

      Ũndũ tũtonya kũmanya ethĩwa sikũkũ ndĩmwendeeasya Ngai

      • Yo yumanĩte na ũmanyĩsyo ũte Mbivilianĩ? Ĩka ũkunĩkĩli ũmanye yumanĩte na kyaũ.

      • Nĩkumasya andũ, ngwatanĩo, kana ĩkakumya nthĩ? Tũmũkumasya Yeova mbee wa syĩndũ syonthe na tũĩkĩĩaa kana no we e weka ũtonya kũmina mathĩna ma nthĩ ĩno.

      • Syĩthĩo syayo nileanaa na myolooto ya Mbivilia? Twĩenda kũendeea kwĩthĩwa twĩ atheu mwĩkalĩlenĩ.

  • Nyuva Maũndũ ma Kwĩtanĩthya Ala Mamwendeeasya Yeova
    Tanĩa Thayũ Tene na Tene!—Masomo ma Mbivilia Matonya Kũũtethya
    • Ĩsomo ya 53. Mũndũ na mũka na kelĩtu koo maiya popcorn maendeee kũsisya televiseni.

      ĨSOMO YA 53

      Nyuva Maũndũ ma Kwĩtanĩthya Ala Mamwendeeasya Yeova

      Yeova nĩ “Ngai mũtanu.” (1 Timotheo 1:11) Endaa twĩkale twĩ atanu na tũitanĩa thayũ. Na nũtanaa yĩla twamantha ĩvinda ya kũthyũmũa ĩtina wa kũthũkũma nĩ kana twĩtanĩthye. Ĩsomonĩ yĩĩ, nĩtũkwona ũndũ tũtonya kũtũmĩa ĩvinda yitũ ya kũthyũmũa kwa nzĩa sya kwendeesya na iũmũtanĩthya Yeova.

      1. Twaĩlĩte kũlilikana kyaũ yĩla tũũnyuva ũndũ wa kwĩtanĩthya?

      Nĩ ũndũ wĩva wendete kwĩka yĩla ũthyũmũĩte? Amwe mendete kũtũmĩa ĩvinda yoo ya kũthyũmũa me o mũsyĩ kwoo maisoma ĩvuku, mayĩthukĩĩsya wathi, mayĩloela sinema, kana kũsisya syĩndũ Indanetinĩ. Namo angĩ mendete o kũtindanyʼa na anyanya moo, kũthi kũthambĩa kana kũthaũka ĩthaũ ĩna. O na ethĩwa twendete kwĩka ata, nĩtwaĩle kũĩkĩĩthya kana maũndũ ala twanyuva kwĩtanĩthya namo nĩ ala “metĩkĩlĩkaa kwa Mwĩaĩi.” (Aeveso 5:10) Nĩ ũndũ wa vata tũelewe ũndũ ũsu nũndũ maũndũ maingĩ ma kwĩtanĩthya ũmũnthĩ mausũĩte maũndũ ala Yeova ũmenete. Maũndũ ta ũngʼendu, ũlaalai, kana kũneenanyʼa na maveva. (Soma Savuli 11:5.) Nĩ kyaũ kĩtonya kũtũtetheesya twĩke motwi ma ũĩ yĩla tũũnyuva maũndũ ma kwĩtanĩthya?

      Twanyuva anyanya ala mamwendete Yeova, makatumaa tũnyuva maũndũ ma kwĩtanĩthya ala maĩlĩte. O tondũ tũnoonie ĩsomonĩ ya 48, ũla ‘ũendaa na andũ oĩ akeethĩwa mũĩ.’ Ĩndĩ tweethĩwa na kĩmanyĩo kya kũtindanasya na ala matendete myolooto ya Ngai, ‘tũkathĩna.’—Nthimo 13:20.

      2. Nĩkĩ nĩ ũndũ wa vata kũthimaa ĩvinda yĩla tũtũmĩaa kwĩtanĩthya?

      O na ethĩwa ũndũ ũla tũkwĩtanĩthya nawʼo ndũũtũla mĩao ya Yeova, nĩtwaĩle kwĩthĩwa twĩ metho tũikatũmĩe ĩvinda yingĩ tũyĩtanĩthya. Ĩndĩ twaema kwĩka ũu, nĩtũtonya kũkosa ĩvinda ĩtoetye ya kwĩka maũndũ ala ma vata. Mbivilia ĩtwĩkĩĩte vinya tũtũmĩae “ĩvinda [yitũ] nesa.”—Soma Aeveso 5:15, 16.

      ĨMANYĨSYE MŨNANGO

      Ĩmanyĩsye wone ũndũ ũtonya kwĩka motwi maseo ĩũlũ wa maũndũ ma kwĩtanĩthya.

      3. Ĩvathane na maũndũ mataĩle ma kwĩtanĩthya

      Nĩkĩ twaĩle kwĩthĩwa twĩ metho mũno yĩla tũũnyuva maũndũ ma kwĩtanĩthya? Ĩloelei VITIO, na ĩndĩ mũineenea makũlyo ala maatĩĩe.

      VITIO: Naĩle Kwĩtanĩthya na Maũndũ Meva? (4:39)

      • Mathaũ ala maĩ Lomi ĩvindanĩ ya tene mavwʼanene ata na ala mekwʼo ũmũnthĩ?

      • Kwosana na ũndũ twoona vitionĩ, Danny amanyie kyaũ ĩũlũ wa maũndũ ma kwĩtanĩthya?

      Somai Alomi 12:9, na ĩndĩ mũineenea ĩkũlyo yĩĩ:

      • Mũsoa ũũ ũtonya kũũtetheesya ata yĩla ũũnyuva maũndũ ma kwĩtanĩthya?

      Nĩ maũndũ ta meva Yeova ũmenete? Somai Nthimo 6:16, 17 na Akalatia 5:19-21. Ĩtina wa kũsoma kĩla ĩandĩko, neeneai ĩkũlyo yĩĩ:

      • Nĩ maũndũ meva katĩ wa ala mawetwa mĩsoanĩ ĩno, methĩawa maũndũnĩ maingĩ ma kwĩtanĩthya ala mekwʼo ũmũnthĩ?

      Ũndũ ũtonya kũnyuva maũndũ ma kwĩtanĩthya kwa ũĩ

      Ĩkũlye atĩĩ:

      • Ũndũ ũũ nũtonya kwĩthĩwa na maũndũ amwe katĩ wa ala Yeova ũmenete?

      • Nĩwĩthĩwa ũituma ndeka maũndũ ala ma vata vyũ?

      • Nũũtuma nĩthĩwa na ngwatanĩo ya vakuvĩ na ala matamwendete Yeova?

      Nũseo kũleana vyũ na ũndũ o na wĩva ũla ũtonya kũtũlikya thĩnanĩ. Kĩu nĩkyo kĩtumi twaĩle kwĩvathana vyũ na ũndũ o na wĩva wa kwĩtanĩthya ũla twĩ na nzika kana nũtonya kwĩthĩwa ũte mũseo kwitũ

      Mũndũ ũtwaĩte ngalĩ esĩle ũtee vyũ lelũnĩ wĩsĩle kĩĩmanĩ. Ngalĩko ya ĩtina yĩoneka yaambĩĩa kũsiũũka.

      4. Tũmĩa ĩvinda yaku nesa

      Ĩloelei VITIO, na ĩndĩ mũineenea ĩkũlyo yĩĩ yĩatĩĩe:

      VITIO: Ũtũmĩaa Ĩvinda Yaku Ata? (2:45)

      • O na kau mwana-a-asa ũsu twoona vitionĩ ndeũsiasya ũndũ mũthũku, wʼo thĩna wake wĩĩ mwaũ?

      Somai Avilivi 1:10, na ĩndĩ mũineenea ĩkũlyo yĩĩ:

      • Mũsoa ũũ ũtonya kũtũtethya ata kũtwʼa twĩtũmĩa ĩvinda yĩana ata kwĩtanĩthya?

      5. Nyuva maũndũ maseo ma kwĩtanĩthya

      O na kau maũndũ amwe ma kwĩtanĩthya maimwendeeasya Yeova, ve angĩ maingĩ maseo mamwendeeasya. Somai Mũtavanʼya 8:15 na Avilivi 4:8, na ĩndĩ mũineenea ĩkũlyo yĩĩ:

      • We nĩ ũndũ wĩva mũseo wendete kwĩtanĩthya nawʼo?

      Visa: Andũ ma yĩika yĩ kĩvathũkanyʼo mayĩtanĩthya na maũndũ maseo. 1. Kelĩtu keũsola kaendeee kwĩthukĩĩsya wathi. 2. Imwana itatũ iithaũka mũvĩla wa basketball. 3. Tũmwana twĩlĩ tũtwaĩte isululu. 4. Kamwana kekũseũvya kakalĩ ka kũthaũka. 5. Mũndũũme ũkũkũna kĩthembe. 6. Kamwana keũthaũka ĩthaũ ya vitio ke na ĩthe wako. 7. Mũndũ mũka ũkũkũna visa.

      Ve maũndũ maingĩ maseo ũtonya kwĩtanĩthya namo

      ANDŨ AMWE MAASYA: “Nyie ndikwona ve ũthũku kwĩloela sinema syĩkwonanyʼa maũndũ ta ũngʼendu, ũlaalai, kana kũneenanyʼa na maveva, nũndũ maũndũ asu ti mo ngwĩka.”

      • We ũtonya kwasya ata?

      KĨLA TWEEMANYĨSYA

      Yeova endaa tũnyuve na tũyĩtanĩthya na maũndũ ala maseo.

      Makũlyo ma Kũsyokeleela

      • Nĩ maũndũ meva ma kwĩtanĩthya Aklĩsto maĩle kwĩvathana namo?

      • Nĩkĩ twaĩle kwĩthĩwa twĩ metho ĩũlũ wa ĩvinda yĩla tũũtũmĩa kwĩtanĩthya?

      • We nũkwenda kwĩtanĩthya na maũndũ ala mamwendeeasya Yeova? Nĩkĩ wasũngĩa ũu?

      Ũndũ wa Kwĩka

      MAŨNDŨ ANGĨ MA KWĨMANYĨSYA

      Soma wone nũũ wĩ na kĩanda kya kũũnyuvĩa kĩla ũkwĩtanĩthya nakyo.

      “Syo Ngũsĩ sya Yeova Nivataa Aatĩĩi Masyo Sinema Imwe, Mavuku Amwe, Kana Mbathi Imwe?” (Ũvoo wĩ kĩsesenĩ)

      Soma wone ũndũ ũtonya kwĩka ũtwi mũseo yĩla ũũnyuva ũndũ wa kwĩtanĩthya.

      “Wĩtanĩthasya na Maũndũ Ala Maĩlĩte?” (Mũsyaĩĩsya, Matukũ 15, Mwei wa 10, 2011)

      Ngewanĩ yĩ na kyongo, “O na Nĩnasindie Kĩmena Kĩla Naĩ Nakyo,” soma wone nĩkĩ mũndũũme ũmwe waekanie na maũndũ ala weetanĩthasya namo.

      “Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 2, 2010)

      Ĩloele vitio wone ũndũ mũndũ mũka ũmwe ũkwĩka ũtwi wa ũĩ ĩũlũ wa kwĩloela sinema ĩkwonanyʼa maũndũ makonetye maveva mavuku.

      Ndũketanĩthye na Maũndũ Makonanĩtye na Kũneenanyʼa na Maveva (2:02)