Yeova ti Ngai wa kĩthokoanyʼo. (1 Akolintho 14:33) Kwoou o namo ala mamũthaithaa maĩlĩte kwĩthĩwa mavangĩtwe nesa. Kyo kĩkundi kya Kĩklĩsto kĩvangĩtwe ata? Na tũtonya kwĩka ata nĩ kana kĩendeee nesa?

1. Kĩkundi kya Kĩklĩsto kĩtongoewʼe nũũ?

“Klĩsto [nĩwe] mũtwe wa kĩkundi.” (Aeveso 5:23) O na kau e ĩtunĩ, nĩwe ũtongoesye maũndũ ala mekawa nĩ athũkũmi ma Yeova nthĩ yonthe. Yesũ nũnyuvĩte “ngombo ndĩkĩĩku na mbũĩ,” ĩla nĩ kakundi kanini ka atumĩa aimu kĩ-veva, na nomo metawa Nzama Ĩla Ĩtongoesye. (Soma Mathayo 24:45-47.) O ta atũmwa na atumĩa ala maĩ Yelusaleme, ũmũnthĩ Nzama Ĩla Ĩtongoesye nĩnengae ikundi syonthe ĩũlũ wa nthĩ myolooto. (Meko ma Atũmwa 15:2) Ĩndĩ atumĩa asu ti mo atongoi ma ũseũvyo witũ. Nĩmekwatasya Yeova amatongoesye kwa kũsoma Ndeto yake, na nĩmenyivĩasya ũkũmũ wa Yesũ.

2. Atumĩa ma kĩkundi naaũ na methĩawa na kĩanda kĩva?

Atumĩa nĩ aũme Aklĩsto, ala methĩawa me aimu kĩ-veva, mamanyĩasya kuma Maandĩkonĩ, na nĩmasũvĩaa andũ ma Yeova kwa kũmatetheesya na kũmekĩa vinya. Mayĩĩvawa nĩ kana matethye wĩa woo. Vandũ va ũu, meyumasya ‘na ngenda methonĩ ma Ngai; mate kwenda kwĩyĩuna ene, ĩndĩ mekaa ũu na mea.’ (1 Vetelo 5:1, 2) Atumĩa matetheeawʼa nĩ atetheesya ma kĩkundi, ala ĩtina o namo methĩawa matonya kũtwʼĩka atũmĩa ma kĩkundi.

Nzama Ĩla Ĩtongoesye nĩnyuvaa atumĩa amwe methĩwe asyaĩĩsya ma mũthyũlũlũko. Asyaĩĩsya asu nĩmathokeaa ikundi syĩ kĩvathũkanyʼo nĩ kana masyĩkĩe vinya na mayĩinenga myolooto ya Mbivilia. O na nĩmanyuvaa ana-a-asa amwe matwʼĩke atumĩa na atetheesya ma kĩkundi, ethĩwa nĩmeanĩĩtye maũndũ ala mawetetwe Maandĩkonĩ.—1 Timotheo 3:1-10, 12; Tito 1:5-9.

3. Kĩla ũmwe wa Ngũsĩ sya Yeova ethĩawa na kĩanda kĩva?

Onthe nthĩnĩ wa kĩkundi ‘nĩmataĩaa ĩsyĩtwa ya Yeova’ kwa kũmwinĩa, kumya maelesyo yĩla me maũmbanonĩ, na maũndũ angĩ ta asu. O na nĩmakwataa ũtavanyʼa mbau kwosana na ũtonyi wa kĩla ũmwe.—Soma Savuli 148:12, 13.

ĨMANYĨSYE MŨNANGO

4. Yesũ nĩ mũtongoi wĩ tei

Ve ũndũ wa vata mũno Yesũ ũtũthoketye twĩke. Somai Mathayo 11:28-30, na ĩndĩ mũineenea ĩkũlyo yĩĩ:

• Yesũ endaa twĩwʼe ata yĩla ũtũtongoesye?

VITIO: Atumĩa Nĩmatetheeisye Ĩtina wa Kĩthingitho Kĩla Kyeethĩiwe Nepal (4:56)

Mbivilia nĩyonanĩtye ũtheinĩ ũndũ atumĩa maĩle kũtethya wĩa woo.

Somai Isaia 32:2 na 1 Vetelo 5:1-3, na ĩndĩ mũineenea makũlyo aa:

• We weewʼa ata wamanya kana atumĩa nĩmatataa kũatĩĩa ngelekanyʼo ya Yesũ kwa kũtũtetheesya twĩwʼe twĩ eanĩe?

• Atumĩa matataa kũatĩĩa ngelekanyʼo ya Yesũ kwa nzĩa ingĩ ta syĩva?

5. Atumĩa mamanyĩasya kwĩsĩla ngelekanyʼo yoo

VITIO: Atumĩa Nĩmatũtongoeasya! (7:39)

Yesũ nĩwanengie ala matongoetye nthĩnĩ wa kĩkundi myolooto ya kũatĩĩa. Somai Mathayo 23:8-12, na ĩndĩ mũineenea ĩkũlyo yĩĩ:

• Waelekanyʼa ũndũ atumĩa mekaa maũndũ maatĩĩe myolooto ya Mbivilia, na maũndũ ala wĩyoneete atongoi ma ndĩni mayĩka, nĩ kyaũ kĩũkwendeesya mũno?

1. Atumĩa nĩmaĩkĩĩthasya kana mo vamwe na mĩsyĩ yoo, nĩ alũmu kĩ-veva

2. Atumĩa nĩmasũvĩaa kĩla ũmwe nthĩnĩ wa kĩkundi

3. Atumĩa nĩmatavanasya na kĩthito

4. Atumĩa nĩmamanyĩasya. O na nĩmatetheeasya kũthesya Nyũmba ya Ũsumbĩ na maũndũ angĩ ta asu

6. Nĩtũtonya kũkwata atumĩa mbau

Mbivilia nĩtũtavĩtye nĩkĩ twaĩle kũmewʼaa atumĩa. Somai Aevelania 13:17, na ĩndĩ mũineenea makũlyo aa:

• Nĩkĩ Mbivilia ĩtwĩĩte tũmewʼae ala matongoetye na tũimenyivĩsya? We nũkwona ũndũ ũsu wosanĩte na kĩlĩko?

Somai Luka 16:10, na ĩndĩ mũineenea ĩkũlyo yĩĩ:

• Nĩkĩ nĩ ũndũ wa vata tũkamewʼaa atumĩa o na tũmaũndũnĩ tũla tũnini?

KĨLA TWEEMANYĨSYA

Yesũ nĩwe mũtwe wa kĩkundi kya Kĩklĩsto. Nĩtũtanĩaa kũkwata atumĩa mbau nũndũ nĩmatumaa twĩkala twĩ eanĩe, na matũmanyĩasya kwĩsĩla ngelekanyʼo yoo.

Makũlyo ma Kũsyokeleela

• Nũũ ũla ũtongoesye kĩkundi kya Kĩklĩsto?

• Atumĩa matethasya kĩkundi ata?

• Kĩla ũmwe wa athũkũmi ma Yeova e na kĩanda kĩva?

MAŨNDŨ ANGĨ MA KWĨMANYĨSYA

Ĩloele vitio wone maũndũ meũkũĩkĩĩthya kana Nzama Ĩla Ĩtongoesye, na atumĩa, nĩmathĩnĩkĩaa kĩkundi.

Nĩmalũlũmĩĩilye Ana-a-asa Ĩvinda ya Maluvuku (4:22)

Ĩloele vitio wone wĩa ũla ũtethawʼa nĩ asyaĩĩsya ma mũthyũlũlũko.

Maũndũ Ala Mũsyaĩĩsya wa Mũthyũlũlũko Ũkomanaa Namo (4:51)

Soma ũmanye kĩanda kya mwanya kĩla aka methĩawa nakyo kĩkundinĩ.

“Aka ma Ngũsĩ sya Yeova Nĩmamanyĩasya?” (Mũsyaĩĩsya, Ĩtukũ 1, Mwei wa 9, 2012)

Soma wone ũndũ atumĩa mekĩaa kĩthito kingĩ nĩ kana mekĩe ana-a-asa na eĩtu-a-asa vinya.

“Atumĩa Aklĩsto ‘Atethya ma Wĩa Kwondũ wa Ũtanu Witũ’” (Mũsyaĩĩsya, Ĩtukũ 1, Mwei wa 1, 2013)

1. Nĩ ũtao wĩva Mbivilia ĩnengete aũme?

Yeova nũnyuvĩte mũũme ethĩwe mũtwe wa mũsyĩ wake. (Soma Aeveso 5:23.) Yeova endaa eke motwi matonya kũtethya mũsyĩ wake. Mbivilia ĩtavĩtye aũme atĩĩ: “Endeeai kũsyenda iveti syenyu.” (Aeveso 5:25) Ũu nĩ kwasya ata? Mũndũũme wendete kĩveti kyake nũkĩkaa maũndũ maseo, yĩla me mũsyĩ kana me andũnĩ. Nũkĩsũvĩaa kĩikaũmĩwʼe nĩ ũndũ o na wĩva, na ayĩka kyonthe kĩla ũtonya nĩ kana akĩanĩĩsye mavata makyo ma kĩ-mwĩĩ na ma ngoonĩ. (1 Timotheo 5:8) Na ũndũ ũla wa vata, nũkĩtetheeasya nĩ kana kĩthĩwe na ngwatanĩo nzeo vamwe na Yeova. (Mathayo 4:4) Kwa ngelekanyʼo, no masome Mbivilia na maivoya me vamwe. Yĩla mũũme wasũvĩa mũka kwa nzĩa ya wendo, nũendeeaa kwĩthĩwa na ngwatanĩo nzeo vamwe na Yeova.—Soma 1 Vetelo 3:7.

Yesũ nĩwe Mũtwe wa kĩkundi kya Kĩklĩsto. (Aeveso 5:23) Ũmũnthĩ, e ĩtunĩ, nũtongoeasya aatĩĩi make vaa ĩũlũ wa nthĩ atũmĩĩte “ngombo ndĩkĩĩku na mbũĩ.” (Soma Mathayo 24:45.) Nũndũ Yesũ mwene nĩwe ũnyuvĩte “ngombo” ĩsu, nĩyĩthĩawa na ũkũmũ wĩana ũna. Ĩndĩ yaĩle kũendeea kwĩthĩwa yĩ ngombo ya Klĩsto na kũthũkũma ana-a-asa ma Klĩsto. Yo ngombo ĩsu nũũ? Na ĩtũsũvĩaa ata?