Mbivilia Ĩtonya Kũũtethya Ata?

Vakuvĩ kĩla ũmwe waitũ nĩwĩkũlasya makũlyo makonetye mathĩna, kĩkwʼũ, kana o ĩvinda yũkĩte. O na ĩngĩ, nĩtwendaa kũmanya ũndũ tũtonya kũmanthĩa andũ maitũ na tũyĩthĩwa na mĩsyĩ yĩ na ũtanu. Mbivilia nĩtetheesye andũ aingĩ kũkwata mosũngĩo ma makũlyo ma vata ala mekũlasya. O na nĩmanengae ũtao wa kũmatetheesya kũthĩnĩkĩa maũndũ moo ma kĩla mũthenya. Kwoou kĩla ũmwe waitũ no atetheke aatĩĩa ũtao wa Mbivilia.

1. Nĩ makũlyo amwe meva Mbivilia ĩsũngĩĩte?

Mbivilia nĩsũngĩĩte makũlyo amwe ta aa: Syĩndũ ila syĩ thayũ syaumie va? Nĩkĩ twĩ thayũ? Nĩkĩ tũthĩnaa? Vethĩawa ata ĩtina wa mũndũ kũkwʼa? Ethĩwa kĩla mũndũ nĩwendete mũuo, nĩkĩ kwĩ makaũ maingĩ? Nthĩ ĩkeethĩwa ĩilye ata ĩvindanĩ yũkĩte? Mbivilia nĩtwĩkĩĩte vinya tũmanthe mosũngĩo ma makũlyo ta asu, na andũ milioni mbingĩ nĩmekĩte ũu na makakwata mosũngĩo ma kwendeesya mũno.

2. Mbivilia ĩtonya kũtũtetheesya ata twĩkale twĩ atanu?

Mbivilia nĩtũnengae ũtao mũseo. Kwa ngelekanyʼo, nĩtũmanyĩasya kĩla tũtonya kwĩka nĩ kana mĩsyĩ yitũ yĩthĩwe na ũtanu. Nĩtũtavasya kĩla twaĩle kwĩka yĩla tweemakĩa, na kĩla tũtonya kwĩka nĩ kana tũtanĩe wĩa. Nũũtanĩa kũmanya kĩla Mbivilia ĩmanyĩasya ĩũlũ wa maũndũ asu vamwe na maũndũ angĩ maingĩ o ũndũ tũkũendeea kwĩmanyĩsya ĩvuku yĩĩ. Ĩtina, nĩvatonyeka ũkesa kwĩtĩkĩla kana “Maandĩko onthe [ala me Mbivilianĩ] . . . nĩmaĩlĩte.”—2 Timotheo 3:16.

ĨMANYĨSYE MŨNANGO

Ĩmanyĩsye ũndũ Mbivilia ĩtetheesye andũ, ũndũ we mwene ũtonya kũtanĩa kũmĩsoma, na nĩkĩ nĩ ũndũ wa vata kũkũlya ũtetheewʼe nĩ kana ũmĩelewe.

3. Mbivilia no ĩtũtongoesye nesa

No tũelekanyʼe Mbivilia na tosi wĩ na kyeni kingĩ. Kwoou no tũmĩtũmĩe ĩtwonyʼe ũndũ tũtonya kwĩka motwi maseo na tũimanya ĩũlũ wa ĩvinda yũkĩte.

Somai Savuli 119:105, na ĩndĩ mũineenea makũlyo aa maatĩĩe:

• We mũandĩki wa savuli ĩno aĩ na woni mwaũ ĩũlũ wa Mbivilia?

• We ũmyonaa Mbivilia ata?

4. Mbivilia no ĩsũngĩe makũlyo maitũ

VITIO: Endeea Kwĩthĩwa na Wĩkwatyo! (1:48)

• Kwosana na ũndũ twoona vitionĩ, nĩ makũlyo meva mũndũ mũka ũsu weekũlasya?

• Atethekie ata ambĩĩa kwĩmanyĩsya Mbivilia?

Mbivilia nĩtwĩkĩĩte vinya tũkũlasye makũlyo. Somai Mathayo 7:7, na ĩndĩ mũineenea ĩkũlyo yĩĩ:

• Nĩ makũlyo ta meva wĩ namo, ala ũkwenda ũsũngĩwe nĩ Mbivilia?

5. No ũtanĩe kũsoma Mbivilia

VITIO: Kũsoma Mbivilia (2:05)

• Kwosana na ũndũ twoona vitionĩ, andũ asu ma mũika meĩ na woni mwaũ ĩũlũ wa kũsoma?

• Nĩkĩ yu me na woni wĩ kĩvathũkanyʼo ĩũlũ wa kũsoma Mbivilia?

Mbivilia yaĩtye kana no ĩtũmanyĩsye maũndũ matonya kũtũkiakisya na maituma twĩthĩwa na wĩkwatyo mũseo wa ĩvinda yũkĩte. Somai Alomi 15:4, na ĩndĩ mũineenea ĩkũlyo yĩĩ:

• Kũmanya kana Mbivilia nĩtwathĩte kũtũkiakisya na kũtũnenga wĩkwatyo mũseo wa ĩvinda yũkĩte kwĩtuma wĩwʼa ata?

6. No tũtetheewʼe nĩ andũ angĩ kũelewa Mbivilia

O na kau andũ aingĩ nĩmesomeaa Mbivilia me oka, nĩmonete kana kwĩmanyĩsya vamwe na andũ angĩ nĩkũtethasya mũno. Somai Meko ma Atũmwa 8:26-31, na ĩndĩ mũineenea ĩkũlyo yĩĩ:

• Tũtonya kwĩka ata nĩ kana tũelewe Mbivilia?—Sisya mũsoa wa 30, na 31.

KĨLA TWEEMANYĨSYA

Mbivilia nĩtũnengae motao ma kũtũtetheesya kũthĩnĩkĩa maũndũ maitũ ma kĩla mũthenya, nĩsũngĩaa makũlyo ma vata, nĩtũkiakiasya, na nĩtũnengete wĩkwatyo mũseo wa ĩvinda yũkĩte.

Makũlyo ma Kũsyokeleela

• Ũtao wa Mbivilia ũtonya kũtũtethya maũndũnĩ ta meva?

• Nĩ makũlyo ta meva Mbivilia ĩsũngĩĩte?

• Nĩ maũndũ meva we ũkwenda kwĩmanyĩsya Mbivilianĩ?

MAŨNDŨ ANGĨ MA KWĨMANYĨSYA

Ĩmanyĩsye wone ũndũ ũtao wa Mbivilia ũtonya kũtũtethya ũmũnthĩ.

“Mbivilia Yĩthĩawa na Ũĩ Ũtakesa Kũvĩtwa Nĩ Ĩvinda” (Mũsyaĩĩsya Na. 1 2018)

Ĩloele vitio wone ũndũ Mbivilia yatetheeisye mũndũũme ũmwe wangʼangʼanĩte na maũndũ mamũthĩnasya kuma wana wake.

Ũndũ Naalyũkile na Nambĩĩa Kwĩthĩwa na Ũtanu (2:53)

Soma wone ũtao ũla Mbivilia ĩnenganĩte ĩũlũ wa mĩsyĩ.

“Maũndũ 12 Matonya Kwaĩlya Mĩsyĩ” (Amkeni! Na. 2 2018)

Ĩloele wone ũndũ Mbivilia ĩlũngĩte woni ũtaĩle andũ aingĩ methĩawa nawʼo ĩũlũ wa nũũ ũla ũsumbĩkĩte nthĩ.

Nĩkĩ Waĩle Kwĩmanyĩsya Mbivilia?—Vitio Nima (3:14)

1. Ethĩwa andũ nĩmo maandĩkie Mbivilia, nĩkĩ vatwʼĩkaa Ngai nĩwe Mũandĩkĩthya wayo?

Mbivilia yaandĩkiwe nĩ aandĩki ta 40 vandũ va ĩvinda ya myaka ta 1,600. Yambĩĩie kũandĩkwa kuma mwaka wa 1513, mbee wa Klĩsto, nginya mwaka wa 98 ũu, ĩtina wa Klĩsto. Na aandĩki mayo maĩ kĩvathũkanyʼo mũno. Ĩndĩ o na vailye ũu, ũvoo wʼonthe ũla wĩ Mbivilianĩ nĩwosanĩte. Ũu ũtonyeka ata? Ũu watonyekie nĩkwĩthĩwa Ngai nĩwe Mũandĩkĩthya wa Mbivilia. (Soma 1 Athesalonika 2:13.) Aandĩki ma Mbivilia mayaandĩka mosũanĩo moo ene. Ĩndĩ vandũ va ũu, “maneenie kĩla kyaumie kwa Ngai kwosana na ũndũ veva mũtheu wamatongoesye.”a (2 Vetelo 1:21) Ngai atũmĩie veva wake mũtheu nĩ kana ũtongoesye aũme ala maandĩkaa mosũanĩo make.—2 Timotheo 3:16.