Yeova Ambonaa Ata?
1 Wĩsiasya kĩoonĩ mavinda meana ata? Aingĩ maitũ twĩsiasya kĩla mũthenya nũndũ ũu nũtũtetheeasya kwona kũla twaĩle kũseũvya. O ta ũu, Mbivilia ĩelekanĩtwʼe na kĩoo. Twamĩsoma kĩla mũthenya nĩtonya kũtũtetheesya kũmanya kĩla kĩ ngoonĩ sitũ nũndũ Yeova asiasya ngoonĩ. (1 Sam. 16:7; Yak. 1:22-24) Ndeto ya Ngai nĩtonya “kũmanya mosũanĩo na kwenda kwa ngoo.” (Aevl. 4:12) Kũsoma Mbivilia na kũvindĩĩsya maũndũ ala twasoma kĩla mũthenya kũtonya kũtũtetheesya ata kwona kũla twaĩlĩte kũlũnga nĩ kana twĩthĩwe na mawumĩlo maseo ũtavanyʼanĩ?—Sav. 1:1-3.
2 Tũmĩa Mbivilia ta Kĩoo: Ngelekanyʼo sya athũkũmi aĩkĩĩku ma Yeova ila syĩ Mbivilianĩ nitũtetheeasya kũmanya ndaĩa ila imwendeeasya Yeova. Kwa ngelekanyʼo, Ndaviti aĩ na kĩthito kingĩ mũno kũkitĩa syĩtwa ya Ngai. (1 Sam. 17:45, 46) Isaia nĩweeyumisye kwa ũkũmbaũ kũtavanyʼa kĩsionĩ kyaĩ kyũmũ. (Isa. 6:8, 9) Vandũ va kwona wĩa wa kũtavanyʼa wĩ mũio mũito, Yesũ nĩwaũtanĩaa na nĩweewʼaa e mwĩanĩe nũndũ aĩ na wendo mwingĩ kũla kwĩ Ĩthe wake wa ĩtunĩ. (Yoa. 4: 34) Aklĩsto ma ĩvinda ya atũmwa maĩ na kĩthito wĩanĩ wa kũtavanyʼa, nĩmamwĩkwatĩtye Yeova, na nĩmatwʼĩte vyũ kũlea kũsyoka na ĩtina. (Meko 5:41, 42; 2 Ako. 4:1; 2 Tim. 4:17) Kũvindĩĩsya ngelekanyʼo ta isu nĩkũtonya kũtũtetheesya kwĩthiana twĩ na kĩeleelo kya kũseũvangya ũthũkũmi witũ kwa Yeova.
3 Ĩka Moalyũku: Vai vata wa kwĩsisya kĩoonĩ na tũilea kũlũnga kũla twoona kwĩ na thĩna. Nĩtũtonya kũmũvoya Yeova atũtetheesye twĩkunĩkĩle nesa vyũ na aitũtetheesya twĩke moalyũku. (Sav. 139:23, 24; Luka 11:13) Nũndũ ĩvinda yĩla yĩtiele nĩ ĩnini na mathayũ me mũisyonĩ, tũyaĩlĩte kũkũĩĩsya kũlũnga kũla twoona kwĩ na thĩna.—1 Ako. 7:29; 1 Tim. 4:16.
4 Ũndũ ũla wa vata vyũ nĩ ũndũ Yeova ũtwonaa tũilyĩ ngoonĩ, ĩndĩ ti ũndũ twonekaa ĩla andũ matũsisya. (1 Vet. 3:3, 4) Mũndũ ũla wĩsiasya Ndetonĩ ya Ngai na ailũnga kũla woona kwĩ na thĩna ĩtina ethĩawa ailyĩ ata? Ethĩawa ‘ate mwĩwi ũla wũlawa ĩndĩ e mwĩki ũla wĩkaa, mũndũ ũsu akaathimwa [kana, akatana] mawĩanĩ ala wĩkaa.’ (Yak. 1:25) Kwoou, nũndũ ‘twonanasya ta kĩoo ũkumyo wa Mwĩai,’ tũkeethĩwa twĩ atavanyʼa atanu na me na mawumĩlo maseo.—2 Ako. 3:18, The Holy Bible in Current Kikamba Language.