7, 8. Ũneeni witũ ũtonya kũtuma Yeova awosa ata ũthaithi na ũthũkũmi witũ?

⁷ Ũndũ wa katatũ ũla ũtumaa twĩthĩwa twĩ metho ũneeninĩ witũ nĩ kana, Yeova akatũsilĩla nũndũ wa ndeto sitũ. Ũneeni witũ nũtonya kwananga kana ũkalũlũmĩĩlya ũnyanya witũ na andũ ala angĩ. O na no wanange kana ũkalũlũmĩĩlya ngwatanĩo yitũ na Yeova. Ĩandĩko ya Yakovo 1:26 yaĩtye ũũ: “Ethĩwa mũndũ o na wĩva eyonaa mwene ta ũmũkĩaa Ngai, na ndeũsiĩĩa ũĩmĩ wake ĩndĩ ekenga ngoo yake, kũmũkĩa Ngai kwa mũndũ [ũsu] nĩ kwa mana.”b O tondũ tũnoonie kĩlungunĩ kĩla kĩvĩtu, ũneeni witũ nũkonanĩtye mũno na ũthaithi witũ. Ethĩwa tũisiĩĩaa ũĩmĩ witũ, ĩndĩ tũneenaa ndeto nthũku na syĩ na sumu, ũthũkũmi witũ wʼonthe kwa Ngai no wĩthĩwe wĩ wa mana. Kũmanya ũu nĩkwaĩle kũtuma tũsũanĩa kwa ũito ndeto ila tũũtũmĩa.—Yakovo 3:8-10.