Nthũ ya Klĩsto Nũũ?

NŨNDŨ ndeto “nthũ ya Klĩsto” nĩtũmĩĩtwe kwa ĩvinda ĩasa vakuvĩ syĩndũnĩ syonthe, kwa ngelekany’o, masyĩtwanĩ ma asumbĩ, o na vitionĩ na syĩndũnĩ ingĩ no twĩkũlye: Yo nthũ ya Klĩsto nũũ? Yo ndeto ĩsu nĩtũkonetye ũmũnthĩ? Vate nzika, vandũ vala vaseo vyũ va kwambĩĩa kũmantha kĩla kyonanaw’a nĩ ndeto nthũ ya Klĩsto nĩ Mbivilianĩ, nũndũ ĩtũmĩĩtwe vo mavinda atano.

KŨVUANW’A KWA NTHŨ YA KLĨSTO

Mũtũmwa Yoana nowe e weka katĩ wa aandĩki ma Mbivilia watũmĩie ndeto “nthũ ya Klĩsto.” Aeleisye ata ĩũlũ wa nthũ ya Klĩsto? Kwoona ndeto ii syĩ nthĩnĩ wa valũa wake wa mbee: “Syana nini, nĩ saa wa mũminũkĩlyo: na tondũ mweewie kana nthũ ya Klĩsto nĩnĩkũka, o na yu nthũ sya Klĩsto nĩsyaingĩvie; na ũndũ wa ũu nĩtwĩsĩ kana nĩ saa wa mũminũkĩlyo. Nĩmeeyumisye kwitũ, ĩndĩ matyaĩ maitũ . . . Ũla wĩ ũvũngũ nũũ, ate o ũla ũnũũlea kana Yesũ nĩwe Klĩsto? Ũsu nĩwe nthũ ya Klĩsto, ũla ũkaĩaa Asa na Mwana.”—1 Yoana 2:18, 19, 22.

Twĩĩmanyĩsya kyaũ kumana na ndeto isu? Mũtũmwa Yoana awetie “nthũ sya Klĩsto,” kwonany’a kana nthũ ya Klĩsto ti ndeto yonanasya mũndũ ũmwe, ĩndĩ nĩ kĩkundi kya andũ. Ikundi sya andũ ila nĩsyo nthũ ya Klĩsto, inyaĩĩkasya ũvũngũ, ikalea kana Yesũ nĩwe Klĩsto, kana Masia, na ikatata kũvithany’a kĩvathũkany’o kĩla kĩ vo katĩ wa Ngai na Mwana wake, Yesũ Klĩsto. Andũ ala ne nthũ sya Klĩsto meyĩtaa Klĩsto, kana maketw’a matũmĩtwe nĩ Klĩsto, ĩndĩ nũndũ “nĩmeeyumisye kwitũ” nĩmatiie momanyĩsyo ma w’o ma Mbivilia. O na ĩngĩ, andũ asu maĩ o kw’o ĩvinda yĩla Yoana waandĩkaa valũa wake, “saa wa mũminũkĩlyo” na nĩvatonyeka ũkethĩa aneeneaa mũminũkĩlyo wa atũmwa.

Yoana aandĩkie ũndũ ũngĩ mwaũ ĩũlũ wa nthũ ya Klĩsto? Aumisye ũkany’o ũũ aineena ĩũlũ wa athani ma ũvũngũ: “Kĩla veva wumbũlaa kana Yesũ Klĩsto nĩwokie e na mwĩĩ nĩ wa Ngai: Na kĩla veva ũtaumbũlaa Yesũ, ti wa Ngai: na ũsu nĩw’o veva wa ĩla nthũ ya Klĩsto, ũndũ mweewie kana ũkooka; o na yu wĩ kũũ nthĩ.” (1 Yoana 4:2, 3) Na ĩndĩ, valũanĩ wake wa kelĩ Yoana atũngĩlĩĩla ũndũ ũsu kwa kwasya atĩĩ: “Akengani aingĩ nĩmaumĩlĩte kũũ nthĩ, na nĩ ala mataumbũlaa kana Yesũ Klĩsto nĩwokie na mwĩĩ. Ũsu nĩ mũkengani na nthũ ya Klisto.” (2 Yoana 7) Vate nzika, Yoana nĩwaeleetwe nesa kana nthũ ya Klĩsto nĩ andũ onthe ala manyaĩĩkasya na ngenda ũvũngũ ĩũlũ wa Yesũ Klĩsto na momanyĩsyo make.

“ATHANI MA ŨVŨNGŨ” NA “ŨLA MŨNDŨ WA NAĨ”

Ĩvinda yĩasa mbee wa Yoana kũandĩka ĩũlũ wa akengani asu ma ndĩni, Yesũ aĩ anengie aatĩĩi make ũtao ũũ: “Ĩsũvĩei athani ma ũvũngũ, ala mokaa kũla mũĩ mevw’ĩkĩte ngũa sya malondu, ĩndĩ nthĩnĩ nĩ nzũi mbai.” (Mathayo 7:15) O nake mũtũmwa Vaulo nĩwakanisye Aklĩsto ma Thesalonika kwa ndeto ii: “Mũndũ o na wĩva ndakamũkenge na ũndũ o na wĩva: nũndũ mũthenya ũsu [wa Yeova] ndũkoka, ũalyũko ũtambĩte kũka, na ũla mũndũ wa naĩ kũvuanw’a, mwana wa wanangĩko.”—2 Athesalonika 2:3.

Kwoou, ĩvinda ya atũmwa, athani ma ũvũngũ na akaĩi ma mũĩkĩĩo maĩ kw’o, me na kĩeleelo kya kwonzya kĩkundi kya Kĩklĩsto. Andũ onthe ala manyaĩĩkasya na makamanyĩsya ũvũngũ ĩũlũ wa Klĩsto na momanyĩsyo make nĩ “nthũ ya Klĩsto” o tondũ Yoana wawetie. Vaulo nĩwoonanisye ũndũ Yeova wonaa andũ asu ĩla waisye kana mo nĩ “mwana wa wanangĩko.”

ĨSŨVĨANE NA MAWĨA MA NTHŨ YA KLĨSTO

Nao nata ũmũnthĩ? Ikundi sya andũ ala nĩ nthũ ya Klĩsto nĩmavĩngaa Klĩsto na momanyĩsyo make ũmũnthĩ. Manyaĩĩkasya na ngenda ũvũngũ mayenda andũ maikamanye nesa ũw’o ĩũlũ wa Asa, Yeova Ngai, na Mwana wake, Yesũ Klĩsto. Kwoou, ve vata wa kwĩsũvĩana na ũvũngũ ta ũsu wa andũ ma ndĩni. Ekai twone ngelekany’o ilĩ sya ũvũngũ ũla manyaĩĩkasya.

Kwa ĩvinda ya myaka mingĩ, ndĩni syĩthĩĩtwe iinyaĩĩkya ũmanyĩsyo wa Ũtatũ iyasya kana Asa na Mwana nĩ kĩndũ kĩmwe. Kwoou, nthũ ya Klĩsto ĩmanyĩasya ũndũ ũtaeleeka na ĩkavithany’a ũw’o wa kana Yeova Ngai na Yesũ Klĩsto me kĩvathũkany’o. Ũmanyĩsyo ũsu ũtaeleeka ũtumĩte andũ me na ngoo nzeo mataatĩĩa ngelekany’o ya Yesũ Klĩsto na matamũthengeea Ngai, o na kau Mbivilia ĩmekĩĩte vinya meke ũu.—1 Akolintho 11:1; Yakovo 4:8.

Ũndũ ũngĩ ũtumĩte andũ methĩwa mate kũkwatya kĩvathũkany’o katĩ wa Yeova na Yesũ nĩ kana ndĩni mbingĩ itũmĩaa Mbivilia ila syumĩtye ĩsyĩtwa ya Ngai, Yeova, vala yaĩle kwĩthĩwa yĩĩ. Mekaa ũu o na kau Maandĩkonĩ ma mbee ma Mbivilia ĩsyĩtwa Yeova yĩtũmĩĩtwe mavinda ta 7,000. Kwĩka ũu kũtumĩte maũndũ methĩwa mailyĩ ata? Kũtumĩte wĩthĩwa wĩ ũndũ wĩ vinya andũ kũelewa nesa ũw’o ĩũlũ wa Ngai.

Kĩvathũkany’o na ũu, kũmanya ĩsyĩtwa ya Ngai, Yeova, nĩkũtetheesye andũ aingĩ me ngoo nzeo makamũthengeea Ngai. Ũu nĩw’o kweethĩiwe kwa Richard, ũla waĩtye ũũ aililikana ũneenany’a ũla waĩ naw’o na ngũsĩ ilĩ sya Yeova: “Mambonisye Mbivilianĩ kana ĩsyĩtwa ya Ngai wa w’o nĩ Yeova. Neewie mũyo mũno ĩla namanyie kana Ngai e ĩsyĩtwa. Ndyaĩ naaĩw’a ũndũ ũsu.” Kuma ĩvinda yĩu, Richard nĩwavĩndũie mwĩkalĩle wake nĩ kenda ekale kwosana na motao ma Mbivilia, na aimwendeesya Yeova. Aendeee na kwasya: “Kũmanya ĩsyĩtwa ya Ngai nĩkũndetheesye kwĩthĩwa na ngwatanĩo nzeo vamwe nake.”

Kwa ĩvinda ya myaka mingĩ, nthũ ya Klĩsto nĩtumĩte andũ milioni mbingĩ methĩwa me kĩvindunĩ kya kĩ-veva. Ĩndĩ kwa kwĩmanyĩsya Ndeto ya Ngai, Mbivilia, twĩthĩawa tũtonya kũmanya nthũ ya Klĩsto nũũ, na tũkathaw’a kumana na momanyĩsyo ma ũvũngũ ma ndĩni, ala nthũ ya Klĩsto ĩmanyĩasya.—Yoana 17:17.