KĨLUNGU KYA 37
Yo Nĩnaĩle Kũvatiswa?
Ĩkĩa ũvano wonanyʼe ethĩwa nĩ wʼo kana ti wʼo:
Kĩla Mũklĩsto nĩwaĩle kũvatiswa.
□ Nĩ wʼo
□ Ti wʼo
Kĩeleelo kĩnene kya kũvatiswa nĩ kũũsũvĩa ndũkalike naĩnĩ.
□ Nĩ wʼo
□ Ti wʼo
Ũvatiso nũtumaa wĩthĩwa na wĩkwatyo wa kwĩsa kũtangĩĩwa.
□ Nĩ wʼo
□ Ti wʼo
Ethĩwa ndwĩ mũvatise, Ngai ndaũtalĩlaa mavĩtyo nũndũ wa maũndũ ala wĩkaa.
□ Nĩ wʼo
□ Ti wʼo
Ethĩwa anyanyau nĩmaendeee kũvatiswa, ũu wĩonanyʼa kana o naku nĩwĩanĩĩe kũvatiswa.
□ Nĩ wʼo
□ Ti wʼo
ETHĨWA nĩwĩkalaa kwosana na myolooto ya Ngai, nũendeee kwaĩlangya ũnyanya waku nake, na nũneenaa na ala angĩ ĩũlũ wa mũĩkĩĩo waku, ti ũndũ wa ũsengyʼo kwĩthĩwa ũisũanĩa ĩũlũ wa kũvatiswa. Ĩndĩ ũtonya kũmanya ata kana nĩwĩyũmbanĩtye kwosa ĩtambya yĩu? Nĩ kana tũkwate ũsũngĩo wa ĩkũlyo yĩu eka tũneenee maũndũ ala me vau ĩũlũ me na ũsũngĩo wa nĩ wʼo, kana ti wʼo.
● Kĩla Mũklĩsto nĩwaĩle kũvatiswa.
Nĩ wʼo. Yesũ eeĩaĩe amanyĩwʼa make mavatiswe. (Mathayo 28:19, 20) O nake Yesũ nĩweeyumisye na ngenda avatiswa. Nĩ kana ũatĩĩe Klĩsto, nĩwaĩle kũvatiswa o ĩla wĩ mũimu nesa ũkethĩa no wĩke ũtwi ũsu na wĩ na wendi wa kwĩka ũu.
● Kĩeleelo kĩnene kya kũvatiswa nĩ kũũsũvĩa ndũkalike naĩnĩ.
Ti wʼo. Ũvatiso nĩ wonanyʼo wa ũtheinĩ kana nĩwĩyumĩtye kũmũthũkũma Yeova. Kwĩyumya kwaku ti ũndũ ũmwe na kĩndũ wĩwʼanĩte na mũndũ kĩla kĩũsiĩĩaa ndũkeke maũndũ mana ũkwenda kwĩka ũvithĩte. Vandũ va ũu wĩyumasya kwa Yeova nũndũ nũkwenda kũatĩĩa myolooto yake.
● Ũvatiso nũtumaa wĩthĩwa na wĩkwatyo wa kwĩsa kũtangĩĩwa.
Nĩ wʼo. Mbivilia yaĩtye kana ũvatiso nĩ ĩtambya ya vata mũndũ waĩle kwosa nĩ kenda etangĩĩwa. (1 Vetelo 3:21) Ĩndĩ ũu ti kwasya kana ũvatiso nĩ ta inisualenzi ĩla mũndũ ũthooaa nĩ kana esũvĩe ũndũ ũkwatwa nĩ mũisyo. Ũvatisawa nũndũ nũmwendete Yeova na nũkwenda kũmũthũkũma na ngoo yaku yonthe tene na tene.—Maliko 12:29, 30.
● Ethĩwa ndwĩ mũvatise, Ngai ndaũtalĩlaa mavĩtyo nũndũ wa maũndũ ala wĩkaa.
Ti wʼo. Yakovo 4:17 yaĩtye atĩĩ: “Ethĩwa mũndũ nĩwĩsĩ kwĩka ũla waĩle na ndawĩkaa, ethĩawa ayĩka naĩ,” ethĩwe nĩ mũvatise kana ti mũvatise. Kwoou ethĩwa nĩwĩsĩ kĩla kyaĩle na wĩ mũimu ũndũ ũtonya kũsũanĩa kwa ũito ĩũlũ wa thayũ waku, nĩvatonyeka yĩĩ ĩkethĩwa no yo ĩvinda yĩla yaĩlĩte ya kũneenea ũndũ ũsu vamwe na mũsyai kana Mũklĩsto ũngĩ mũimu kĩ-veva. Kwa nzĩa ĩsu no ũmanye ũndũ ũtonya kwĩka maendeeo ũvatiswe.
● Ethĩwa anyanyau nĩmaendeee kũvatiswa, ũu wĩonanyʼa kana o naku nĩwĩanĩĩe kũvatiswa.
Ti wʼo. Ethĩwa nũkwenda kũvatiswa, waĩle kwosa ĩtambya yĩu wĩ na ngoo ya kwenda. (Savuli 110:3) Waĩlĩte kũvatiswa ethĩwa nũeleetwe nesa kwĩthĩwa Ngũsĩ ya Yeova kwonanasya ata, na ethĩwa nĩwĩyũmbanĩtye kwĩanĩsya maũndũ ala mekwendeka.—Mũtavanʼya 5:4, 5.
Ũvatiso Nĩ Ĩtambya Yĩalyũlaa Thayũ wa Mũndũ
Ũvatiso nĩ ĩtambya yĩalyũlaa thayũ wa mũndũ na nĩyĩtumaa akwata moathimo maingĩ. Ĩndĩ o na vailyĩ ũu, nĩ ĩtambya yĩito nũndũ mũndũ nĩwendekaa ekale kwosana na kwĩyumya kwake kwa Yeova.
We nĩwĩyũmbanĩtye kwĩyumya ũmũthũkũme Yeova? Ethĩwa vailyĩ ũu, wĩ na kĩtumi kĩseo kya kwĩthĩwa wĩ mũtanu. Woosa ĩtambya yĩu ũkakwata kĩanda kya mwanya mũno kwĩ kĩanda kĩngĩ o na kĩva, nakyo nĩ kũmũthũkũma Yeova na ngoo yonthe na kwĩthĩwa na mwĩkalĩle ũkwonanyʼa kana nĩwĩyumĩtye kwake.—Mathayo 22:36, 37.
Ĩmanyĩsye ũndũ ũtonya kwĩyĩkĩĩa mĩvango nĩ kana ũtũmĩe thayũ waku nesa.
ĨANDĨKO YA VATA
“Mũnengane mĩĩ yenyu yĩthĩwe nthembo yĩ thayũ, ntheu na yĩtĩkĩlĩka kwa Ngai, nawʼo nĩ ũthũkũmi mũtheu vamwe na ũtonyi wenyu wa kũsũanĩa.”—Alomi 12:1.
KAŨNDŨ ŨTONYA KWĨKA
Tetheewʼa nĩ asyai maku kũmantha mũndũ kĩkundinĩ kyaku ũtonya kũũtetheesya wĩke maendeeo nginya ũvatiso.—Meko ma Atũmwa 16:1-3.
WE NĨWĨSĨ . . . ?
Ĩtambya ya ũvatiso nĩ ya vata mũno nũndũ nĩ kĩlungu kya “ũvano” ũla ũkatuma ũtangĩĩwa.—Esekieli 9:4-6.
MAŨNDŨ ALA ŨTONYA KWĨKA!
Nĩ kana nĩke maendeeo kũvikĩĩa ũvatiso, nĩngwongelanga ũmanyi wakwa nthĩnĩ wa momanyĩsyo aa maatĩĩe ma Mbivilia: ․․․․․
Kĩla ngwenda kũkũlya asyai makwa ĩũlũ wa ũvatiso nĩ ․․․․․
WE WĨ NA WONI MWAŨ?
● Nĩkĩ ũvatiso nĩ ĩtambya yaĩle kwoswa kwa ũito?
● Nĩ kyaũ kĩtonya kũtuma mũndũ wa mũika ekalaatĩla kwosa ĩtambya ya kũvatiswa?
● Nĩ kyaũ kĩtonya kũtuma mũndũ wa mũika akĩa kwĩyumya na kũvatiswa?
[Maelesyo Makuvĩ]
“Kũmanya kana naĩ mũvatise nĩkwandetheeisye kwĩka motwi maseo na kwandetheesya kwĩvathana na maũndũ matonya kũndikya mũisyonĩ.”—Holly
[Ĩsandũkũ/Visa]
Makũlyo Ala Makũlawʼa Mavinda Maingĩ Ĩũlũ wa Ũvatiso
Ũvatiso wonanasya kyaũ? Kũindwa kĩwʼũnĩ na kũkĩlwʼa kwonanasya kana mũndũ nĩwaeka kwĩka kwenda kwake mwene, kũla nĩ ũndũ ũmwe na kũtia mwĩkalĩle wa tene ũla ũneethĩawa nawʼo, na kwĩthĩwa na mwĩkalĩle mweũ nĩ kenda eke kwenda kwa Yeova.
Kwĩyumya ũmũthũkũme Yeova kwonanasya ata? Kwonanasya kwĩlea we mwene na ũimwatha Ngai kwĩkaa kwenda kwake mbee wa maũndũ ala angĩ onthe. (Mathayo 16:24) Kwoou nĩ ũndũ waĩle ũkeyumya kwa Yeova kwĩsĩla mboya ĩvinda ĩna ũtanamba kũvatiswa.
Waĩle kwĩthĩwa ũitũmĩa thayũ waku ata ũtanamba kũvatiswa? Waĩle kwĩthĩwa ũyĩkala kwosana na Ndeto ya Ngai na ũineenaa na andũ ala angĩ ĩũlũ wa mũĩkĩĩo waku. Waĩle kũmũvoyaa Ngai na kwĩmanyĩsya Ndeto yake nĩ kana wĩthĩwe na ũnyanya vamwe nake. Waĩle kwĩthĩwa ũimũthũkũma Yeova nũndũ nĩwanyuvie kwĩka ũu, ĩndĩ ti aĩ nũndũ nũũthingʼĩĩwʼa wĩke ũu nĩ andũ ala angĩ.
Yo ve myaka ĩla waĩle kwĩthĩwa nayo nĩ kenda ũvatiswe? Myaka tiwʼo ũndũ ũla wa vata. Ĩndĩ nĩwaĩlĩte kwĩthĩwa wĩ na myaka yĩanĩtye, kana kwa ndeto ingĩ wĩ mũimu ũndũ ũtonya kũelewa kwĩyumya nĩ kwĩka ata.
Nao nata ethĩwa nũkwenda kũvatiswa ĩndĩ asyai maku mekwĩa wambe kweteela? Nĩvatonyeka ũkethĩa meenda wĩthĩwe na ũmanyi mwingangĩ ĩũlũ wa ũndũ Mũklĩsto waĩlĩte kwĩyĩkalya. Osa kwa ũito ũtao woo, na ũitũmĩa ĩvinda yĩu kũlũlũmĩĩlya ũnyanya waku na Yeova.—1 Samueli 2:26.
[Ĩsandũkũ]
Kĩlungu Kya Makũlyo
We no Wĩthĩwe Ũisũanĩa Kũvatiswa?
Tũmĩa makũlyo na maũndũ angĩ ala me vaa ĩtheo nĩ kenda maũtetheesye kũmanya ethĩwa nĩwĩkĩte maendeeo matonya kũtuma ũvatiswa. Ũtanamba kũandĩka mosũngĩo maku, ĩkĩĩthya nĩwasoma maandĩko ala manenganĩtwe.
Yu tũĩ, nĩ kwa nzĩa syĩva ũendeee kwonanyʼa kana nũmwĩkwatĩtye Yeova?—Savuli 71:5. ․․․․․
Wonanĩtye ata kana ũtonyi waku wa kũsũanĩa nũmanyĩĩtwʼe kũvathũkanyʼa ũseo na ũthũku?—Aevelania 5:14. ․․․․․
We ũvoyaa mavinda meana ata? ․․․․․
Nĩ maũndũ meva ũwetaa mboyanĩ syaku, na maũndũ asu mavuanasya kyaũ ĩũlũ wa ũndũ ũmwendete Yeova?—Savuli 17:6. ․․․․․
Andĩka vaa ĩtheo mĩvango ĩkonetye mboya ĩla ũtonya kwĩyĩkĩĩa. ․․․․․
We nĩwĩmanyĩasya Mbivilia ũteũtĩĩa?—Yosua 1:8. ․․․․․
Nĩ maũndũ meva wĩkaa ĩla ũkwĩmanyĩsya we mwene? ․․․․․
Andĩka vaa ĩtheo mĩvango mĩna ĩkonetye kwĩmanyĩsya kwaku mwene, ĩla ũkwenda kwĩanĩsya. ․․․․․
Ũtavanyʼa waku nĩwĩthĩawa na mawumĩlo maseo? (Kwa ngelekanyʼo: No ũelesye ala angĩ momanyĩsyo ma mũsingi ma Mbivilia? Nũmasyokeaa ala mekwendeewʼa? We nĩwĩkĩĩte kĩthito nĩ kana ũkwate mũmanyĩwʼa wa Mbivilia?)
□ Ĩĩ □ Aiee
We nũendaa ũtavanyʼanĩ o na ethĩwa asyai maku mayĩũthi?—Meko ma Atũmwa 5:42.
□ Ĩĩ □ Aiee
Andĩka vaa ĩtheo mĩvango ĩkonetye ũtavanyʼa ĩla ũkwenda kwĩanĩsya.—2 Timotheo 2:15. ․․․․․
We nũendaa maũmbanonĩ ma Kĩklĩsto ũteũtĩĩa kana ũendaa mavinda amwe?—Aevelania 10:25. ․․․․․
We wumasya maelesyo ata ĩla wĩ maũmbanonĩ? ․․․․․
We nũendaa maũmbanonĩ ĩla asyai maku mateũthi (ethĩwa nĩmaũnengete mwanya wa kwĩka ũu)?
□ Ĩĩ □ Aiee
We no wasye kana kwa wʼo nũtanĩaa kwĩka kwenda kwa Ngai?—Savuli 40:8.
□ Ĩĩ □ Aiee
We no ũwete mavinda mana ũleete kũthingʼĩĩwʼa nĩ andũ ma mũika waku wĩke kĩla kĩtaĩle?—Alomi 12:2. ․․․․․
Ũvangĩte kwĩka ata nĩ kana ũmwende Yeova mũnango?—Yuta 20, 21. ․․․․․
We no ũendeee kũmũthũkũma Yeova o na ethĩwa asyai maku na anyanyau nĩmaekete kwĩka ũu?—Mathayo 10:36, 37.
□ Ĩĩ □ Aiee
[Visa]
O ta mũtwaano, ũvatiso nĩ ĩtambya yĩalyũlaa thayũ wa mũndũ, na kwoou yaĩlĩte kwoswa kwa ũito.