Ũndũ Tũtonya Kwĩthĩwa Atavanyʼa Aseo—Kũtavanyʼa Isionĩ sya Viasala

Nĩkĩ Nĩ Ũndũ wa Vata: Nũndũ andũ aingĩ mathũkũmaa masaa maingĩ, mavinda maingĩ nzĩa ĩla nzeo ya kũmavikĩa nĩ kũmatavya ũvoo mũseo me vala mathũkũmĩaa. Mũndũ no atanĩe kũtavanyʼa isionĩ sya viasala na aikwata mosyao maseo nũndũ andũ aingĩ methĩawa isionĩ isu, na athũkũmi nĩmanengae ndaĩa andũ ala mekwona ta makasitoma moo. Nĩ kana atavanyʼa makwate mosyao maseo, maĩle kwĩthĩwa na woni mũseo na mayĩthĩwa na ũmanyi na ũĩ, vamwe na kwĩkĩa ngũa nesa. (2 Ako. 6:3) Kwoou mũsyaĩĩsya wa ũthũkũmi aĩle kwĩthĩwa e metho nĩ kana amanye mavinda ala isio sya viasala itavanawʼa, na ala maitavanasya.

Ũtonya Kwĩka Ũu Ata?:

Twatũmĩa ĩvinda yingĩ vamwe na mũthũkũmi, no kwĩthĩwa ĩvinda yĩngĩ tũtaketĩkĩlwʼa tũneene nake.
Ĩthĩwa wĩ mũtanu na wĩ na ũnyanya. No ũtũmĩe ndeto ta ii, “Twĩthokeaa andũ kũla mathũkũmĩaa nũndũ nĩ vinya kũmethĩa mĩsyĩ kwoo.” Neena nake o kwa ũkuvĩ, na ũimũtiĩa tulakiti, makaseti, kana o mavuku angĩ. Nĩ kana andũ maikone ta twĩ andũ ma viasala, nĩ ũseo tũikamatavye ĩũlũ wa mũvango wa kumya mĩvothi ate o ĩla makũlya ũndũ wĩa witũ ũendeeawʼa.
Ve kũndũ kũmwe ũtonya kwĩtya lũũsa nĩ kana ũtie mavuku vala athũkũmi mekalaa saa sya kũya kana sya kũthyũmũa.
Kwa ngelekanyʼo, ethĩwa mũthũkũmi eneena na kasitoma na nũkwatene, eteela nginya ĩla ũkũmina nĩ kana ũneene nake.

Tata Kwĩka Ũndũ Ũũ Mweinĩ Ũũ: