ĨSOMO YA 2

Kũneena o Ũndũ Ũneenaa

2 Akolintho 2:17

KWA ŨKUVĨ: Neena o ũndũ ũneenaa, na ũyĩka ũu kuma ngoonĩ kwa nzĩa ĩkwonanyʼa ũndũ ũkwĩwʼa ĩũlũ wa kĩla ũũneenea, na ĩũlũ wa ethukĩĩsya maku.

Voya yĩla ũkwĩyũmbanyʼa na ũyĩyũmbanyʼa nesa. Voya nĩ kana wĩthĩwe ũtonya kũneena maũndũ ala me ũvoonĩ waku nesa vandũ va kwĩsũanĩa we mwene. Ĩthĩwa wĩsĩ nesa maũndũ manene ala ũkwenda kũneenea. Tũmĩa ndeto syaku mwene kũelesya maũndũ na ndũkatũngĩlĩĩle ndeto o ũndũ iandĩkĩtwe.

Ethĩwa nũkwenda kũsoma kĩndũ kuma Mbivilianĩ kana ĩvukunĩ yĩngĩ, ĩyũmbanyʼe nesa nĩ kana wĩthĩwe ũtonya kũsoma nesa. Yĩla weethĩa ndeto ineenetwe nĩ mũndũ ĩmwe kwa ĩmwe, soma ndeto isu nesa ũndũ vaĩle, ĩndĩ ndũkongeleele mautĩĩo.
Neena kuma ngoonĩ. Sũanĩa nĩkĩ ethukĩĩsya maku me na vata wa kwĩwʼa ũvoo ũla ũũneenea. Neena ũmasũanĩĩte. Na ũu ũkatuma ũũngama nesa na kũtũmĩa moko na ũthyũ waku kũkindĩlĩĩla maũndũ kwa nzĩa ĩkwonanyʼa maumĩte ngoonĩ, na nũkwendeewʼa nĩ ethukĩĩsya maku.

Kũneena o ũndũ ũneenaa ti ũndũ ũmwe na kũneena ũte na ndaĩa. Tũmĩa ũneeni ũkũeleeka na wosanĩte na ũndũ kĩthyomo kĩla ũũneena kĩtũmĩawa, nĩ kana ũvoo ũla ũũneenea ũnengwe ndaĩa.
Sisya ethukĩĩsya maku. Sisya ethukĩĩsya maku metho ethĩwa ti ũthũku kwĩka ũu. Yĩla ũkumya ũvoo, sisya mũndũ ũmwe ũmwe kwa kavinda, vandũ va kũsisya kĩkundi kyonthe, kana o kũvĩtĩlya metho andũnĩ.