ĨSOMO YA 1

Kwambĩĩsya Ũneeni kwa Nzĩa Nzeo

Meko ma Atũmwa 17:22

KWA ŨKUVĨ: Ambĩĩsya ũneeni kwa nzĩa ĩkũtuma ethukĩĩsya mendeewʼa nĩ kũkwĩthukĩĩsya. Weta kĩla ũũneenea na ũyonanyʼa nĩkĩ ethukĩĩsya maku maĩle kwendeewʼa nĩkyo.

ŨNDŨ ŨTONYA KWĨKA ŨU:

Tetheesya ethukĩĩsya mendeewʼe. Nyuva ĩkũlyo, ũndũ wĩkĩkĩte, kana ũvoo wa mĩtũkĩ ũla ũtonya kwendeesya ethukĩĩsya maku.

Amba kũsũanĩa nesa maũndũ ala matonya kwendeesya ethukĩĩsya maku na kĩla kĩũmathĩnyʼa, na ĩndĩ ũyĩyũmbanyʼa kwambĩĩsya ũneeni kwosana na maũndũ asu.
Tetheesya ethukĩĩsya mamanye kĩla ũũneenea. Ĩkĩĩthya kana wambĩĩsya ũneeni kwa nzĩa ĩkũtetheesya ethukĩĩsya mamanye wĩneenea kyaũ na wĩ na kĩeleelo kĩva.
Onanyʼa nĩkĩ kĩla ũũneenea nĩ kya vata. Kĩla ũũneenea kyaĩle kwosana na mavata ma ethukĩĩsya maku. Maĩle kũmanya nesa ũndũ kĩla ũũneenea kĩtonya kũmatethya mo ene.

Yĩla ũkwĩyũmbanyʼa kumya ũvoo, ĩkũlye-ĩ, ‘Mo ana-a-asa na eĩtu-a-asa kĩkundinĩ kyakwa makomanaa na maũndũ mailye ata?’ Na ĩndĩ ũyĩyũmbanyʼa kwambĩĩsya ũvoo waku kwa nzĩa yosanĩte na maũndũ asu.