ĨSOMO YA 7

Kũtũmĩa Maũndũ ma Wʼo na ma Kũĩkĩĩka

Luka 1:3

KWA ŨKUVĨ: Tũmĩa ũvoo wa wʼo na ũtonya kũĩkĩĩka nĩ kana ũtetheesye ethukĩĩsya maku meke ũtwi waĩle.

Tũmĩa ũvoo ũtonya kũĩkĩĩka. Maũndũ ala ũũneenea methĩwe maumĩte Ndetonĩ ya Ngai, na ethĩwa nĩvatonyeka ũimĩsoma ĩmwe kwa ĩmwe. Ethĩwa nũũneenea maũndũ ma saenzi, matangaso, ũndũ wĩkĩkĩte, kana ũndũ ũngĩ ũũkwata mbau kĩla ũũneenea, ĩka ũkunĩkĩli yĩla ũkwĩyũmbanyʼa nĩ kenda ũmanye kana ũndũ ũsu nĩ wa wʼo na ti mũvĩte nĩ ĩvinda.
Tũmĩa nesa ũvoo ũla wakwata. Elesya ĩandĩko kwosana na mĩsoa ĩla ĩthyũlũlũkĩte, na kwosana na Mbivilia na mavuku ma “ngombo ndĩkĩĩku na mbũĩ.” (Mt. 24:45) Ethĩwa wĩtũmĩa ũvoo kuma kũndũ kũngĩ eka Mbivilianĩ, ndũkavĩndũe ũvoo ũsu kana ũwete kĩndũ kĩtosanĩte na kĩeleelo kya mũandĩki.

Ndũkongeleele mautĩĩo yĩla ũũweta maũndũ kana ũtalo wa kĩndũ kĩna. Kwa ngelekanyʼo, ndũkasye “andũ aingĩ” vandũ va kwasya “andũ amwe,” na ndũkasye “kĩla ĩvinda” vandũ va kwasya “mavinda amwe.”
Tetheesya ethukĩĩsya masũanĩe ũvoo ũsu. Wasoma ĩandĩko kana waweta ũvoo wumĩte vandũ vana, kũlya makũlyo kwa ũĩ na wĩ na ndaĩa, kana ũnengane ngelekanyʼo nĩ kana ũtetheesye ethukĩĩsya maku meke ũtwi.