Nũtonya Kũtavanyʼa na Kũmanyĩsya!

Mbeenĩ Mose ndoonaa ta ũtonya kwĩanĩsya kĩanda kĩla wanengetwe nĩ Yeova. (Kuma 4:10, 13) Waaĩsa kwĩwʼa ũu mũthenya ũmwe? Nĩwĩmanyĩasya Mbivilia na Ngũsĩ sya Yeova? Nĩwĩkũlasya kana ũkesa kũtonya kũtavanyʼa nyũmba na nyũmba? Wĩ mũndũ wa mũika na nũemawa nĩ kũtavanyʼa wĩ sukulu? Kana nũtonya kwĩthĩwa wĩwʼaa wia wa kũtavanyʼa kũla kwĩthĩawa andũ aingĩ, kana kũtavanyʼa na simũ? Mũvoye Yeova aũnenge veva wake mũtheu ũũtetheesye wĩthĩwe na vinya. (1Vt 4:11) Ĩthĩwa na mũĩkĩĩo vyũ kana Yeova akaũtetheesya wĩanĩsye kĩanda kĩla ũkũnengete o na ethĩwa nĩ kĩva.​—Kuma 4:11, 12.

ĨLOELEI VITIO YĨ NA KYONGO, ĨTHĨWA NA ŨKŨMBAŨ WĨ . . . MŨTAVANYʼA NA ĨNDĨ MŨISŨNGĨA MAKŨLYO AA:

• Mwĩĩtu-a-asa Aoyama akwatiwe nĩ thĩna wĩva?

• Nĩ kyaũ kyamũtetheeisye ethĩwe na vinya na ũkũmbaũ?​—Yel 20:7-9

• Atethekie ata nũndũ wa kwongelanga ũthũkũmi wake kwa Yeova?

• Nĩ mathĩna meva ũkomanaa namo wĩ ũtavanyʼa ũtonya kwenda Yeova aũtetheesye ũmakĩlye vinya?