Yesũ Nĩwamanyĩisye Maũndũ ma Vata Ĩũlũ wa Ũlau na Mboya

Yesũ nĩwaendie mũsyĩ kwa eĩtu elĩ masyaanĩwʼe, ũmwe eetawa Matha na ũla ũngĩ Meli. Mekalaa ndũanĩ ya Vethania ĩla yaĩ ngalĩko ya wumĩlonĩ wa syũa wa Kĩĩma kya Mĩthata, kĩlomita ta itatũ kuma Yelusaleme. (Yoana 11:18) Eĩtu asu na mwana-a-inyia Lasalo maĩ anyanyae ma Yesũ na kwoou nĩmamũthokisye nesa.

Waĩ ũndũ wa mwanya mũno kũthokewa nĩ Masia. Matha nĩwendaa kũmũthokya Yesũ nesa vyũ, na kwoou athi ikonĩ nĩ kana aue lĩu mũseo mũno. Aendeee kũua, mwĩĩtu-a-inyia Meli ekalĩte maaũnĩ ma Yesũ aendeee kũmwĩthukĩĩsya. Ĩtina wa ĩvinda ĩnini, Matha nĩwookie vala ve Yesũ na amwĩa atĩĩ: “Mwĩaĩi, we no ũkwona kana mwĩĩtu-a-ia andekanĩisye na wĩa ndethye nĩ nyioka? Mwĩe oke andetheesye.”—Luka 10:40.

Vandũ va kwambĩĩa kũmumanyʼa Meli, Yesũ nĩwanengie Matha ũtao mũseo nũndũ athĩnĩkĩaa maũndũ ma kĩ-mwĩĩ mũno. Amwĩie atĩĩ: “Matha, Matha, nũkwĩmakĩa na kũthĩnĩka ĩũlũ wa maũndũ maingĩ. Ĩndĩ no maũndũ manini mekwendeka, kana ũndũ o ũmwe. Meli anyuvie ũndũ mũseo, na ndakavenwa.” (Luka 10:41, 42) Vate nzika, Yesũ nĩwatetheeisye Matha amanya kana ti ũndũ wa vata kũtũmĩa ĩvinda yingĩ mũno ayĩua lĩu mwingĩ wĩ kĩvathũkanyʼo. Kĩla kyendekaa no lĩu andũ matonya kũya makavũna.

Matha auaa lĩu e na kĩeleelo kĩseo nũndũ endaa kwonanyʼa ũlau. Ĩndĩ kwĩthĩnyʼa mũno ayĩua kwatumie asya maũndũ ma vata ala Mwana wa Ngai wamanyĩasya! Yesũ nĩwakindĩlĩĩile kana Meli nĩweekie ũtwi mũseo ũla waĩ ũmũtethye kwa ĩvinda yĩasa na ũyĩthĩwa ne ĩsomo kwitũ.

Ĩtina wa ĩvinda, Yesũ nĩwamanyĩisye amanyĩwʼa make ũndũ ũngĩ wĩ kĩvathũkanyʼo ĩndĩ wa vata mũno. Mũmanyĩwʼa ũmwe amwĩie atĩĩ: “Mwĩaĩi tũmanyĩsye kũvoya, o tondũ Yoana wamanyĩisye amanyĩwʼa make kũvoya.” (Luka 11:1) Nĩvavĩtĩte ta mwaka ũmwe na nusu kuma Yesũ amanyĩsya andũ ũndũ maĩle kũvoya yĩla watavanasya nthĩnĩ wa ũla Ũtavanyʼa wa Kĩĩmanĩ. (Mathayo 6:9-13) Ĩndĩ mũmanyĩwʼa ũsu nũtonya kwĩthĩwa ataĩ vo Yesũ aimanyĩsya maũndũ asu, na kwoou asyokeleela maũndũ manene ala wamanyĩisye ĩũlũ wa mboya. Ĩtina wa ũu, nĩwatavisye andũ ngelekanyʼo nĩ kana akindĩlĩĩle vata wa kũvoya na kĩthingʼĩĩsyo.

Yesũ aisye atĩĩ: “Twasye ũmwe wenyu e na mũnyanyae, na aithi kwake ũtukũ katĩ, na aimwĩa, ‘Mũnyanyawa, ngovethye mĩkate ĩtatũ, nũndũ mũnyanyawa ũmwe nĩwooka kwakwa e kyalonĩ na ndi na kĩndũ kya kũmũnenga.’ Ĩndĩ ũsu aisũngĩa e nthĩnĩ, na aimwĩa: ‘Eka kũnthĩnyʼa. Mũango nũvingiwe, na nyie na syana syakwa nĩtũkomete. Na ndyamba kũkĩla ngakũnenga kĩndũ.’ Nĩngũmwĩa, o na ethĩwa ndeũkĩla amũnenge kĩndũ nũndũ wa kwĩthĩwa nĩ mũnyanyae, ĩndĩ nũndũ wa kĩthingʼĩĩsyo kyake ndalea kũkĩla amũnenge kyonthe kĩla ũkwenda.”—Luka 11:5-8.

Ndeto sya Yesũ iyoonanasya kana Yeova ndethĩawa ayenda kũsũngĩa mboya sitũ yĩla twamũvoya na kĩthingʼĩĩsyo, tondũ ũla mũndũ waamũkawʼa ũtukũ ũtendaa kũamũka atetheesye mũnyanyae. Vandũ va ũu, Yesũ oonanisye kana ethĩwa mũnyanya ũteyũmbanĩtye kũtethya nũkũamũka nũndũ wa kũthingʼĩĩwʼa, o ta ũu, Ĩthe witũ wa ĩtunĩ ndalea kũsũngĩa athũkũmi make aĩkĩĩku yĩla mamũvoya na kĩthingʼĩĩsyo na kuma ngoonĩ! Yesũ aendeeie kwasya atĩĩ: “Nĩngũmwĩa, endeeai kũvoya na mũkanengwa; endeeai kũmantha na mũkakwata; endeeai kũkũnanga na mũkavingũĩwa. Nũndũ kĩla mũndũ ũvoyaa nũnengawe, na kĩla mũndũ ũmanthaa nũkwataa, na kĩla mũndũ ũkũnangaa nũvingũĩawa.”—Luka 11:9, 10.

Nĩ kana Yesũ aumĩlye ũndũ ũsu nesa vyũ, anenganie ngelekanyʼo ya mwana na ĩthe. Akũlilye atĩĩ: “Nĩ ĩthe wĩva katĩ wenyu, yĩla mwana wake wamwĩtya ĩkũyũ, ũmũnengae nzoka vandũ va ĩkũyũ? Kana yĩla wamwĩtya ĩtumbĩ, ũmũnengae kĩngʼauĩ? Ethĩwa ĩndĩ inywʼĩ, o na kau mwĩ athũku, nĩmwĩsĩ kũnenga syana syenyu mĩthĩnzĩo mĩseo, ti mbee mũno Ĩthe wenyu ũla wĩ ĩtunĩ kũmanenga veva mũtheu ala mamwĩtasya!” (Luka 11:11-13) Ũndũ ũsu wĩtũĩkĩĩthya nesa vyũ kana Ĩthe witũ ethĩawa eyũmbanĩtye vyũ kwĩthukĩĩsya na kũsũngĩa mboya sitũ!