Mavuku Ala Monanĩtwʼe Nthĩnĩ wa Kavuku ka Ũmbano wa Mwĩkalĩle wa Aklĩsto
MATUKŨ 3-9, MWEI WA 1
MAŨNDŨ MA VATA KUMA NDETONĨ YA NGAI | ASILI 15-16
“Kũvũnyanĩa Mũndũ Nĩ Ũndũ Mũthũku Mũno!”
w12 4/15 9 ¶4
Kũvũnyanĩa Mũndũ Nĩ Ũndũ Mũthũku Waĩ kwʼo Kuma Tene!
4 Mbee, kwasũanĩa ĩũlũ wa Ndelila, ũla waĩ na ũseleke na wendetwe nĩ Samusoni, ũla waĩ Mũsili. Samusoni endaa kũtongoesya andũ ma Ngai nĩ kana makokite na Avilisiti. Yĩla eaĩi atano ma Avilisiti mamanyie kana Ndelila ndamwendete Samusoni, nĩmamũongie nĩ kana amũsesenge Samusoni amũtavye vala waumĩtye vinya ũsu waĩ nawʼo me na kĩeleelo kya kũmũmina. Nũndũ aĩ mũndũ wĩ ĩtomo, Ndelila nĩweetĩkĩlile kũongwa, ĩndĩ nĩwatatie mavinda atatũ na ndaamanya vala vinya wa Samusoni waumaa. Kwoou nĩwaendeeie kũmũthingʼĩĩsya “na ndeto syake kĩla mũthenya na kũmũthetheesya.” Ĩtina, ‘ngoo ya Samusoni nĩyanyamaie na yesa ũkwʼa.’ Kwoou Samusoni nĩwamwĩie Ndelila kana ndaaĩsa kwenzwa mũthenya o na ũmwe, na mũthenya ũla ũkenzwa vinya wake ũkathela. Yĩla wamanyie ũu, Ndelila nĩwatũmanie mũndũ ooka kũmwenza Samusoni yĩla wakomete maaũnĩ make, na ĩndĩ amũnengane kwa amaitha make mamwĩke ũndũ mekwenda. (Asi. 16:4, 5, 15-21) Ndelila eekie ũndũ mũthũku mũno! Nĩwavũnyanĩie mũndũ wamwendete mũno nũndũ wa ĩtomo.
w05 1/15 27 ¶3
Maũndũ Manene Kuma Ĩvukunĩ ya Asili
14:16, 17; 16:16. Kũthingʼĩĩsya mũndũ akwĩke ũndũ ũĩĩte, na kũmũsesenga no kwanange ngwatanĩo yenyu.—Nthimo 19:13; 21:19.
w12 4/15 11-12 ¶15-16
Kũvũnyanĩa Mũndũ Nĩ Ũndũ Mũthũku Waĩ kwʼo Kuma Tene!
15 Nĩ kwa nzĩa yĩva ala matwaanĩte matonya kũendeea kwĩthĩwa me aĩkĩĩku kwa ala matwaanĩte namo? Ndeto ya Ngai yaĩtye atĩĩ: ‘Tanĩaa kĩveti kyaku [kana mũũme waku] kya ũthoo’ na “ĩkala na ũtanu na kĩveti [kana mũũme] kĩla ũkyendete.” (Nth. 5:18; Mũta. 9:9) O ũndũ ala matwaanĩte maendeea kũkũa, no nginya maendeee kũthĩnĩkĩa ngwatanĩo yoo ya kĩ-mwĩĩ na ũndũ kĩla ũmwe ũkwĩwʼa ngoonĩ. Ũu nĩkwonanyʼa kana kĩla ũmwe nĩwaĩle kwĩthukĩĩsya ũla ũngĩ, makatũmĩa ĩvinda me vamwe, na mailũlũmĩĩlya ngwatanĩo yoo. Ũndũ ũla waĩle kwĩthĩwa wĩ wa vata kwoo nĩ kũsũvĩa mũtwaano woo na kwĩthĩwa na ngwatanĩo nzeo na Yeova. Nĩ kana meanĩsye ũndũ ũsu, ala matwaanĩte nĩmaĩle kwĩmanyĩasya Mbivilia me vamwe, makathi ũtavanyʼa me vamwe, na maivoya ĩmwe nĩ kana makwate moathimo ma Yeova.
ENDEEA KWĨTHĨWA WĨ MŨĨKĨĨKU KWA YEOVA
16 Ve amwe kĩkundinĩ meekie naĩ ngito na kwoou makanwʼa “kwa ũito nĩ kana methĩwe me alũmu mũĩkĩĩonĩ.” (Tito 1:13) Amwe, nũndũ wa mwĩkalĩle woo nĩmatengawa maume kĩkundinĩ. Na “kwa ala mamanyĩĩtwʼe nĩwʼo,” ũkanyʼo nũmatetheeasya matũngĩĩe ngwatanĩo yoo na Yeova. (Aevl. 12:11) Nao nata ethĩwa twĩ na mũndũ wa mũsyĩ kana mũnyanya wa vakuvĩ watengwa? Twaĩle kwĩthĩwa twĩ aĩkĩĩku kwa Ngai, ĩndĩ ti kwa mũndũ ũsu. Yeova ethĩawa asyaĩĩsye kana nĩtũkũatĩĩa mwĩao wake wa kũlea kwĩthĩwa na ngwatanĩo na mũndũ o na wĩva mũtenge.—Soma 1 Akolintho 5:11-13.
Ũthwii wa Kĩ-veva
w05 3/15 27 ¶6
Samusoni Nĩwasindie Nũndũ wa Vinya wa Yeova!
Samusoni nĩwatwʼĩte vyũ kwĩanĩsya kĩeleelo kyake, nakyo kyaĩ kũkita na Avilisiti. Yĩla Samusoni waendie ndũanĩ ya Ngasa kwĩkala nyũmbanĩ ya mũndũ mũka waĩ ĩlwaya, kĩeleelo kyake kyaĩ kũkita amaitha ma Ngai. Endaa kũkoma ndũanĩ ĩsu ya amaitha make ũtukũ ũsu, na veonekana kana vala wakwatie nĩ nyũmbanĩ ĩsu ya mũndũ mũka ũsu waĩ ĩlwaya. We ndaĩ na kĩeleelo kya kwĩka ũlaalai. Aumie kwa mũndũ mũka ũsu ũtukũ katĩ, na akwata mĩomo ya mbingĩlo ya ndũa na ituĩ ilĩ, na aikua asyambatya kĩĩmanĩ kĩla kyeelekele Eviloni, mũendo wa kĩlomita ta 60. Eanĩisye maũndũ asu nũndũ nĩweetĩkĩlĩtwe nĩ Yeova na aĩ na vinya kuma kwa Ngai.—Asili 16:1-3.
MATUKŨ 10-16, MWEI WA 1
MAŨNDŨ MA VATA KUMA NDETONĨ YA NGAI | ASILI 17-19
“Kũtũla Mĩao ya Ngai Kũetae Mathĩna”
it-2 390-391
Mika
1. Mika aumĩte nthĩ ya Evalaimu. Mika nĩwatũlile mwĩao wa 8 nthĩnĩ wa ĩla Mĩao Ĩkũmi (Kuma 20:15), yĩla wooyĩie inyia ilungu 1,100 sya vetha. Yĩla Mika watũngie ilungu isu sya vetha, inyia wake aisye: “Nĩ wʼo, vetha ũũ nĩngũvathĩa Yeova wĩthĩwe mũtheu wume kwʼokonĩ kwakwa kwondũ wa mwana wakwa, ũndũ wa kũseũvya mũvwʼanano mwasũvye na mũvwʼanano ũseũvĩtwʼe na syĩndũ itwekethetwʼe: na yu kwondũ wa ũu nĩngũũtũngĩa.” Ĩtina, inyia wa Mika nĩwoosie ilungu sya vetha 200 na aitwaĩa mũtwii wa vetha, ũla waseũvisye “mũvwʼanano mwasũvye na mũvwʼanano ũseũvĩtwʼe na syĩndũ matwekethetye,” na ĩtina mũvwʼanano ũsu waiwa nyũmbanĩ ya Mika. Na Mika ũla waĩ na “nyũmba ya i ngai” nĩwaseũvisye evoti na telavimu, na avatha ũmwe wa ana make atwʼĩke mũthembi wake. O na kau mũvango ũsu waĩ wa kũmũnenga Yeova ndaĩa, weekiwe kwa nzĩa ĩla ĩtaĩlĩte nũndũ nĩmatũlile mwĩao wa Ngai ũla wavatanĩte kũthaitha mĩvwʼanano (Kuma 20:4-6), na mavũthĩĩsya mũvango wa Yeova wa ĩeema ya kũmbanĩa na wa ũthembi. (Asi 17:1-6; Kũt 12:1-14) Ĩtina, Mika nĩwoosie Yonathani, mwana wa Ngelisoni, mwana wa Mose na amũtwaa nyũmbanĩ yake, na amũtwʼĩkĩthya mwanake ũsu waĩ Mũlivai mũthembi wake. (Asi 18:4, 30) Aisũanĩa kwa nzĩa ĩtaĩle Mika aisye: “Yu nĩnĩsĩ kana Yeova akambĩka nesa.” (Asi 17:7-13) Ĩndĩ Yonathani ndaĩ wa mũvea wa Aluni, na kwoou ndaaĩlĩte ũthũkũmi wa ũthembi, na ũndũ ũsu nĩwongeleeile mavĩtyo ma Mika.—Mot 3:10.
it-2 391 ¶2
Mika
Ĩtina wa ĩvinda ĩnini, Mika na aũme angĩ nĩmaatĩĩie ana ma Ndani. Yĩla mamavikĩie na makũlwʼa meenda ata, Mika aisye: “Inywʼĩ nĩmwosie ngai ila naseũvisye, na mũthembi, nenyu nĩmũendete nakwa nĩ na kĩngĩ kyaũ?” Meewʼa ũu, ana ma Ndani nĩmakanisye Mika ĩũlũ wa ndeto syake na mamwĩa ndakaendeee kũneena ĩũlũ wa ndeto sya mũthemba ũsu. Yĩla woonie kana ana ma Ndani maĩ na vinya kwĩ aũme make, Mika nĩweethyũũie na asyoka nyũmbanĩ yake. (Asi 18:22-26) Ĩtina wa ũu, ana ma Ndani nĩmaanangie vyũ ndũa ya Laisa, mamĩvĩvya na mwaki, na maaka ndũa ĩngĩ vo na mamĩta Ndani. Yonathani na ana make nĩmatwʼĩkie athembi ma ana ma Ndani, ala meeyĩũngamĩisye “mũvwʼanano mwasũvye wa Mika ũla waseũvĩtye, ĩvinda yonthe yĩla nyũmba ya Ngai [ĩeema ya kũmbanĩa] yaĩ Silo.”—Asi 18:27-31.
MATUKŨ 17-23, MWEI WA 1
MAŨNDŨ MA VATA KUMA NDETONĨ YA NGAI | ASILI 20-21
“Endeea Kũmũmantha Yeova”
w11 9/15 32 ¶2
No Wĩthĩwe Ũilyĩ ta Vineasi Yĩla Wakwatwa Nĩ Mawũmũ?
Yĩla aũme ma Ngivea ala maĩ ma Mbenyamini makomie kya vinya na mũndũ mũka waĩ ĩweto ya Mũlivai na mamũaa, mbaĩ ila ingĩ nĩsyookĩlile ikokite na andũ ma Mbenyamini. (Asi. 20:1-11) Nĩmamũvoyie Yeova amatetheesye matanamba kũthi kũkita, ĩndĩ nĩmasindiwe kelĩ, na makwata wasyo mũnene. (Asi. 20:14-25) Mo maĩ matonya kwasya kana mboya syoo iinasũngĩwa? Kwa wʼo, we Yeova nĩwendaa kwona mayosa ĩtambya nũndũ wa ĩkosa yĩla yeekĩtwe?
w05 1/15 27 ¶7
Maũndũ Manene Kuma Ĩvukunĩ ya Asili
20:17-48—Nĩkĩ Yeova weetĩkĩlilye andũ ma Mbenyamini masinde mbaĩ ila ingĩ mavinda elĩ, o na kau mo ene nĩmo maaĩlĩte ũkanyʼo? Yĩla weetĩkĩlilye mbaĩ isu syaĩ ndĩkĩĩku isindwe, Yeova endaa kũsisya kana nĩmatwʼĩte vyũ kũvetanga ũthũku nthĩ ya Isilaeli.
w11 9/15 32 ¶4
No Wĩthĩwe Ũilyĩ ta Vineasi Yĩla Wakwatwa Nĩ Mawũmũ?
Twĩĩmanyĩsya kyaũ kumana na ũndũ ũsu? Mathĩna amwe matonya kwĩthĩwa kĩkundinĩ no maendeee kwa ĩvinda yĩasa, o na atumĩa meekĩa kĩthito na mamũvoya Ngai amatetheesye. Ũndũ ta ũsu weethĩwa, nũseo atumĩa makalilikanaa ndeto ii sya Yesũ: “Endeeai kũvoya na mũkanengwa, endeeai kũmantha na mũkakwata, endeeai kũkũnanga na mũkavingũĩwa.” (Luka 11:9) Na o na mavoya na moona mboya syoo ta iteũsũngĩwa, atumĩa maĩle kwĩthĩwa na mũĩkĩĩo kana ĩvinda ya Yeova yavika, akasũngĩa mboya syoo.
MATUKŨ 24-30, MWEI WA 1
MAŨNDŨ MA VATA KUMA NDETONĨ YA NGAI | LUTHI 1-2
“Onanasya Ũseo wĩ Wendo”
Ũthwii wa Kĩ-veva
w05 3/1 27 ¶2
Maũndũ Manene Kuma Ĩvukunĩ ya Luthi
1:13, 21—We Yeova, nĩwamwĩkĩte Naomi maũndũ me ũũ na akamũthĩnyʼa? Aiee, o na Naomi ndaamwilĩĩla Ngai ũndũ o na ũmwe mũthũku. Ĩndĩ, nũndũ wa maũndũ onthe ala mamũkwatĩte, asũanĩaa Yeova ta wamũtiĩte. Aĩ na woo mwingĩ mũno na nĩwakwʼĩte ngoo. O na ĩngĩ, mĩthenyanĩ ĩsu mũndũ kwĩthĩwa na syana woonekaa wĩ ũathimo kuma kwa Ngai, ĩndĩ kwĩthĩwa ũte nasyo kwoonekaa ta kĩumo. Kwĩthĩwa ate na esũkũũe na syana ilĩ syake kũkwʼa, nĩkũtonya kwĩthĩwa kwatumie Naomi ewʼa e na kĩtumi kĩseo kya kũsũanĩa kana Yeova nĩwamũtiĩte.
MATUKŨ 31, MWEI WA 1– MATUKŨ 6, MWEI WA 2
MAŨNDŨ MA VATA KUMA NDETONĨ YA NGAI | LUTHI 3-4
“Ĩseũvĩsye Ĩsyĩtwa kwa Kũendeea Kwĩthĩwa na Mwĩkalĩle Mũseo”
w12 10/1 22 ¶4
“Mũndũ Mũka Mwaĩlu”
Yĩla Mboasi waneenie, ndeto syake nzeo na wasya wake mũuu nĩwamũkiakiisye Luthi. Aisye: “Wĩthĩwe wĩ mũathime nĩ Yeova, mwĩĩtu wakwa: nĩwonanʼya ũseo mũminũkĩlyonĩ kwĩ yĩla ya mbee, nũndũ ndwaaatĩĩa anake, o na me ngya kana athwii.” (Luthi 3:10) Ndeto “yĩla ya mbee” syonanasya ũseo wĩ wendo ũla Luthi wamwonisye Naomi yĩla wasyokanisye nake Isilaeli na amũsũvĩa. Nasyo ndeto “mũminũkĩlyonĩ” syonanasya ĩvinda yĩu Mboasi waneenaa nake. Mboasi nĩweesĩ kana mũndũ mũka wa mũika ta Luthi nĩ laisi akamantha mũũme katĩ wa anake, methĩwe maĩ ngya kana athwii. Vandũ va ũu, endaa kũmwĩka nesa Naomi o vamwe na mũũme wake ũla waĩ mũkwʼũ, kwa kũendeesya ĩsyĩtwa yake mbaĩnĩ ĩsu ya Isilaeli. Kwoou, yu ti vinya kũelewa nĩkĩ Mboasi wendeeiwʼe nĩ mũndũ mũka ũsu wa mũika ũteeyendete.
w12 10/1 23 ¶1
“Mũndũ Mũka Mwaĩlu”
No nginya Luthi ethĩwe eewie e mwĩanĩe asũanĩa ndeto ila Mboasi waneenie, yĩla waisye kana nĩweesĩkĩe nĩ andũ onthe ta “mũndũ mũka mwaĩlu”! Vate nzika, mea ala waĩ namo ma kwenda kũmũmanya Yeova na kũmũthũkũma nĩmo matumie awetwa kwa nzĩa ĩsu. O na ĩngĩ, nĩwoonanisye kana nĩwamũthĩnĩkĩaa mũno Naomi na andũ make, na eeyumya kwa ngenda ambĩĩa kũatĩĩa syĩthĩo ũtasyĩsĩ kuma mwambĩĩonĩ. Tweethĩwa na mũĩkĩĩo ta ũla waĩ na Luthi, tũkanengae ndaĩa andũ ala angĩ, nzĩa syoo sya kwĩka maũndũ, o na syĩthĩo syoo. Tweeka ũu, o naitũ no twĩthĩe andũ ala angĩ matwĩsĩ kwa nzĩa nzeo.
w12 10/1 24 ¶2
“Mũndũ Mũka Mwaĩlu”
Mboasi nĩwatwaie Luthi. Na ĩtina wa ĩvinda tũsomaa: ‘Yeova amũnenga kũya ĩvu na asyaa mwana.’ Aka ma Mbetheleemu nĩmamũathimie Naomi na mamũkatha Luthi, nũndũ wa kwĩka Naomi ũseo kwĩ ũndũ ana mũonza maĩ matonya kwĩka. Ĩtina tũsomaa kana mwana wa Luthi esie kũtwʼĩka ũmae wa Mũsumbĩ Ndaviti. (Luthi 4:11-22) Nake Ndaviti, atwʼĩka ũmae wa Yesũ Klĩsto.—Mathayo 1:1.
Ũthwii wa Kĩ-veva
w05 3/1 29 ¶3
Maũndũ Manene Kuma Ĩvukunĩ ya Luthi
4:6—Nĩ kwa nzĩa yĩva mwovosya waĩ atonya ‘kũthũkya’ kana kwasya ũtiĩwa wake nũndũ wa kwovosya? Mbee, ethĩwa mũndũ nĩwatwʼĩka ngya na ata mũũnda wake wa ũtiĩwa, mwovosya aaĩle kumya mbesa athooe mũũnda ũsu kwosana na myaka ĩla ĩtiele nĩ kana Yuvilii ĩla ĩngĩ ĩvike. (Alivai 25:25-27) Mwovosya eeka ũu nĩwe wesaa kwasya. O na ĩngĩ, ethĩwa Luthi nĩwasyaa kamwana, kamwana kau nĩko kesaa kũnengwa ũtiĩwa ũsu, na ti ũmwe wa mwovosya ũla ũthooie o na ethĩwa nĩ mũndũ wa vakuvĩ.
MATUKŨ 7-13, MWEI WA 2
MAŨNDŨ MA VATA KUMA NDETONĨ YA NGAI | 1 SAMUELI 1-2
“Mũtulũĩle Yeova Kĩla kĩ Ngoonĩ Kwĩsĩla Mboya”
w07 3/15 16 ¶4
Kĩla Kyatumie Aana Ethĩwa na Mũuo
Maũndũ aa onthe matonya kũtũmanyĩsya kyaũ? Yĩla tũũvoya ĩũlũ wa maũndũ ala meũtũthĩnyʼa, no tũmũtavye Yeova ĩũlũ wa ũndũ tũkwĩwʼa, na tũimũtulũĩla kyonthe kĩla kĩ ngoonĩ sitũ. Ethĩwa vai ũndũ tũtonya kwĩka tũmine thĩna witũ, tũmũekee Yeova thĩna ũsu. Vai nzĩa ĩngĩ nzeo tũtonya kũatĩĩa eka ĩsu.—Nthimo 3:5, 6.
Ũthwii wa Kĩ-veva
w05 3/15 21 ¶5
Maũndũ Manene Kuma Ĩvukunĩ ya Samueli wa Mbee
2:10—Nĩkĩ Aana wamũvoyie Yeova ‘anenge mũsumbĩ wake vinya’ na Isilaeli kũyaĩ mũndũ waĩ mũsumbĩ? Mĩao ya Mose nĩyawetete kana Aisilaeli makeethĩwa na mũsumbĩ. (Kũtũngĩlĩlwa Kwa Mĩao 17:14-18) Nthĩnĩ wa wathani ũla waumisye akilyĩ kũkwʼa, Yakovo aisye atĩĩ: “Ndata ya ũsumbĩ ndĩkauma kwa Yuta.” (Mwambĩlĩlyo 49:10) O na ĩngĩ, aineena ĩũlũ wa Sala—ũsũe wa Aisilaeli—Yeova aisye atĩĩ: “Asumbĩ ma andũ makauma kwake.” (Mwambĩlĩlyo 17:16) Kwoou, Aana avoyaa ĩũlũ wa mũsumbĩ ũkoka ĩvinda yũkĩte.
MATUKŨ 14-20, MWEI WA 2
MAŨNDŨ MA VATA KUMA NDETONĨ YA NGAI | 1 SAMUELI 3-5
“Yeova Nũsũanĩaa Andũ Ala Angĩ”
Ũthwii wa Kĩ-veva
w05 3/15 21 ¶6
Maũndũ Manene Kuma Ĩvukunĩ ya Samueli wa Mbee
3:3—We Samueli akomaa vala Vandũ Vatheu Vyũ? Aiee. Samueli aĩ Mũlivai wa mbaĩ ya Akoathi na mayaĩ ma mũvea wa athembi. (1 Mavinda 6:33-38) Na kwoou ndaaĩlĩte ‘kũlika asisye vala vandũ vatheu.’ (Motalo 4:17-20) Vandũ vala Samueli waĩ atonya kũlika no nza wa ĩeema ya kũmbanĩa. Na no nginya ethĩwe akomaa vau. Na veonekana kana o nake Eli akomaa o nza wa ĩeema ya kũmbanĩa. Kwoou ndeto “vala yĩla ĩsandũkũ ya Ngai yaĩ” syonanasya kĩsio kyonthe kya ĩeema ya kũmbanĩa.
MATUKŨ 21-27, MWEI WA 2
MAŨNDŨ MA VATA KUMA NDETONĨ YA NGAI | 1 SAMUELI 6-8
“Mũsumbĩ Waku Nũũ?”
it-2 163 ¶1
Ũsumbĩ wa Ngai
Aisilaeli Mayĩtya Mũsumbĩ. Vakuvĩ myaka 400 kuma Aisilaeli mauma Misili, na mbee wa myaka 800 kuma Yeova eeka ũtianĩo na Avalaamu, Aisilaeli nĩmendie manengwe mũsumbĩ wa kũmatongoeasya o tondũ mbaĩ ila ingĩ syaĩ na asumbĩ. Kwĩtya mũsumbĩ kwoonanasya kana nĩmamũleete Yeova ndakethĩwe mũsumbĩ woo. (1Sa 8:4-8) Kwa wʼo, andũ asu nĩmeeteelete kwĩthĩwa na ũsumbĩ o tondũ Ngai wathĩte Avalaamu na Yakovo, o tondũ twonie. Maĩ na itumi ingĩ sya kwĩthĩwa na wĩkwatyo ũsu nũndũ wa wathani ũla Yakovo wathanie ĩũlũ wa Yuta atanamba kũkwʼa (Mwa 49:8-10), nũndũ wa ndeto ila Yeova watavisye Aisilaeli mauma Misili (Kuma 19:3-6), nũndũ wa maũndũ ala mawetetwe nthĩnĩ wa ũtianĩo wa Mĩao (Kũt 17:14, 15), na nũndũ wa ndeto ila Ngai watumie mwathani Mbalaamu aweta (Mot 24:2-7, 17). Inyia wa Samueli, Aana, ũla waĩ mũĩkĩĩku, o nake nĩwoonanisye kana aĩ na wĩkwatyo ũsu kwĩsĩla mboya. (1Sa 2:7-10) Ĩndĩ o na ũu wĩ o vo, Yeova ndavuanĩtye vyũ ĩũlũ wa “syĩmbithĩ ntheu” syake ikonetye Ũsumbĩ ũsu, na ndawetete ĩvinda yĩla Ũsumbĩ ũsu ũkambĩĩa kũsumbĩka. Na o na ndawetete kana Ũsumbĩ ũsu ũkeethĩwa kũũ nthĩ kana nĩ ĩtunĩ. Kwoou, kwĩtya mũsumbĩ amasumbĩke moonanasya kana me na mĩtũlyo.
w11 1/1 27 ¶2
Nĩwoomĩĩisye o na Kau Nĩwatũlilwe Ngoo
Kwoona ũndũ Yeova wamũsũngĩie Samueli ĩtina wa kũvoya ĩũlũ wa ũndũ ũsu. Amwĩie: “Ĩthukĩĩsye wasya wa andũ maũndũnĩ onthe ala meũkũtavya: nũndũ maikũleete we, ĩndĩ ninyie maleete, nĩ kana ndikethĩwe mũsumbĩ ĩũlũ woo.” Ndeto isu nĩsyamũkiakiisye Samueli mũno, ĩndĩ no nginya Ngai Mwene Vinya Wʼonthe ethĩwe aũmĩiwʼe nĩ ndeto nthũku sya andũ asu. Yeova nĩweeie mwathani wake akanyʼe Aisilaeli ĩũlũ wa maũndũ ala makamakwata masumbĩkwa nĩ mũndũ. Ĩtina wa Samueli kũmatavya maũndũ asu, maendeeie kũmwĩa atĩĩ: “Aiee; ĩndĩ tũitĩa kwĩthĩwa na mũsumbĩ waitũ.” Nũndũ Samueli nĩwamwĩwʼaa Yeova, nĩwaendie na amwĩtĩkĩsya mauta mũsumbĩ ũla wanyuvĩtwe nĩ Yeova.—1 Samueli 8:7-19.
w10 1/15 30 ¶9
Nzĩa ya Yeova ya Kũsumbĩka Nĩyo Yaĩle!
9 Isitoli nĩyoonanisye ũwʼo wa ũkanyʼo ũla Yeova wakanĩtye Aisilaeli. Yĩla Aisilaeli masumbĩkiwe nĩ mũndũ, makwatiwe nĩ mathĩna maingĩ mũno, na mũno mũno yĩla mũsumbĩ ũsu weethĩwa ate mũĩkĩĩku. Twĩ na ngelekanyʼo ĩsu ya Aisilaeli kĩlĩkonĩ, ti ũndũ wa ũsengyʼa kana kwa myaka mingĩ, silikalĩ ila syĩthĩĩtwe iitongoewʼa nĩ andũ matamwĩsĩ Yeova niemetwe nĩ kũsumbĩka andũ kwa nzĩa ĩla yaĩle. Nĩwʼo kana atongoi amwe ma siasa nĩmamũvoyaa Ngai aathime kĩthito kyoo kya kũete mũuo, ĩndĩ Ngai atonya kũathima ata andũ matenyivĩasya nzĩa yake ya kũsumbĩka?—Sav. 2:10-12.
Ũthwii wa Kĩ-veva
w02 4/1 12 ¶13
Nĩkĩ Waĩle Kũvatiswa?
13 Nĩwaĩle kũalyũka ũtanamba kũvatiswa na kũtwʼĩka Ngũsĩ ya Yeova. Kũalyũka nĩ ũndũ mũndũ wĩkaa kwa ngenda atwʼa vyũ kuma ngoonĩ kana eenda kũtwʼĩka mũatĩĩi wa Klĩsto Yesũ. Mũndũ oosa ĩtambya yĩu, nũtiaa mwĩkalĩle wake mũthũku wa tene na aitwʼa kwĩka kĩla kyaĩlĩte methonĩ ma Ngai. Nthĩnĩ wa Maandĩko, ndeto ya Kĩevelania na ya Kĩkiliki, ĩla ĩkonanĩtye na kũalyũka yonanasya kũvĩndũka kana kwĩthyũũa. Kwĩka ũu kwonanasya kana nĩwamwĩthyũũĩa Ngai na watia nzĩa nthũku. (1 Asumbĩ 8:33, 34) Mũndũ aalyũka aĩle kwĩka “maũndũ ala mekwosana na wĩlilo.” (Meko ma Atũmwa 26:20) Aĩle kũtia ũthaithi wa ũvũngũ, akeka kwosana na mĩao ya Ngai, na aimũthaitha Yeova e weka. (Kũtũngĩlĩlwa Kwa Mĩao 30:2, 8-10; 1 Samueli 7:3) O na ĩngĩ, nĩwaĩle kũvĩndũa kĩsũanĩo kyake, ieleelo syake, na mwĩkalĩle wake. (Esekieli 18:31) ‘Tũalyũkaa’ yĩla twatia mwĩkalĩle mũthũku ũtamwendeeasya Ngai, na tweevwʼĩka mwĩkalĩle mweũ.—Meko ma Atũmwa 3:19; Aeveso 4:20-24; Akolosai 3:5-14.
MATUKŨ 28, MWEI WA 2– MATUKŨ 6, MWEI WA 3
MAŨNDŨ MA VATA KUMA NDETONĨ YA NGAI | 1 SAMUELI 9-11
“Saulo Ambĩĩie Kũsumbĩka e na Wĩnyivyo”
w95 12/15 10 ¶1
Aamimoni Nĩmoonanisye Ũthilĩku o na Kau Moonetwʼe Ũseo
Ĩngĩ, Aamimoni nĩmoonanisye kana maĩ athilĩku o na kau Yeova amonetye ũseo. Yeova ndaavũthĩĩsya ũthilĩku ũsu maĩ nawʼo. ‘Veva wa Ngai nĩwookie na vinya mũnene ĩũlũ wa Saulo yĩla wewie ndeto isu [sya Naasu], na ũthatu wake wakana mũno.’ Atongoewʼe nĩ veva wa Ngai, Saulo nĩwoombanisye nguthu ya aũme 330,000 ala mamakũnie Aamimoni kũvika “elĩ moo matyaaĩthĩwa vamwe.”—1 Samueli 11:6, 11.
Ũthwii wa Kĩ-veva
w05 3/15 22 ¶8
Maũndũ Manene Kuma Ĩvukunĩ ya Samueli wa Mbee
9:9—Ndeto “ũla yu wĩtawa Mwathani ĩvinda ya tene eetawa Mwoni” syoonanasya ata? Nĩvatonyeka ndeto isu ikethĩwa syoonanasya kana yĩla athani mameisye nguma ĩvindanĩ ya Samueli, na ĩvindanĩ ya asumbĩ ma Isilaeli, ndeto “mwathani” nĩyo yambĩĩe kũtũmĩwa vandũ wa ndeto “mwoni.” Samueli atalawa ta we waĩ mwathani wa mbee kuma ĩvindanĩ yĩu.—Meko ma Atũmwa 3:24.