Ve mũsumbĩ wa Silia, weetawa Mbeni-aatati. Mũsumbĩ ũsu nĩwathĩnasya Isilaeli. Ĩndĩ mwathani Elisa nĩwamũtavasya mũsumbĩ wa Isilaeli ĩũlũ wa mĩvango ya Mbeni-aatati, na kwoou mũsumbĩ ũsu wa Isilaeli aĩ atonya kwĩvitha. Yĩla Mbeni-aatati wamanyie ũndũ ũsu nĩwavangie kũmũkwata Elisa. Mũsumbĩ ũsu nĩwamanyie kana Elisa aĩ ndũanĩ ya Ndothani, na kwoou atũma asikalĩ make makamũkwate.

Asilia nĩmaendie ndũanĩ ya Ndothani ũtukũ. Mũthenya ũla waatĩĩe kwakya, mũthũkũmi wa Elisa nĩwaumaalile na oona ndũa ĩthyũlũlũkĩtwe nĩ asikalĩ aingĩ mũno. Nĩwakwatiwe nĩ wia na asya atĩĩ: ‘Elisa, twĩĩka ata?’ Nake Elisa amwĩa: ‘Ala me vamwe naitũ nĩ aingĩ kwĩ ala me namo.’ Ĩtina wa Elisa kũneena ndeto o isu oou, Yeova nĩwatumie mũthũkũmi wa Elisa ona mbalasi na makasya ma kaũ me na mwaki mausĩe iĩmanĩ syonthe ila syathyũlũlũkĩte ndũa ĩsu.

Yĩla asikalĩ ma Silia matatie kũmũkwata, Elisa avoyie Yeova asya: ‘Yeova, mavinge metho.’ O ndatĩkanĩ ĩsu, o na kũtwʼĩka asikalĩ asu no meene nthĩ, mayamanyaa vala maĩ. Elisa ameie atĩĩ: ‘Ĩĩ ti yo ndũa ĩla mũndũ ũla mũũmantha wĩkalaa. Mbatĩĩei na nĩngũmwonyʼa vala wĩkalaa.’ Na ĩndĩ asikalĩ asu mamũatĩĩa Elisa nginya Samalia, vala mũsumbĩ wa Isilaeli wekalaa.

Asilia mesie kũmanya vala maĩ me aselee. Na ĩndĩ mũsumbĩ wa Isilaeli akũlya Elisa atĩĩ: ‘Nĩmoae?’ We Elisa nĩwatũmĩie kamwanya kau kwĩyĩĩvanĩsya nũndũ asikalĩ asu nĩmendaa kũmũaa? Aiee. Elisa amwĩie: ‘Ndũkamoae. Ĩndĩ manenge lĩu, na ũimaeka mathi.’ Na kwoou mũsumbĩ amanenga lĩu mwingĩ na mũseo maya na ĩndĩ amea menũke.

Yeseveli aĩ na mwĩĩtu weetawa Athalia, ũla waĩ mũthũku o take. Athalia atwaĩtwe nĩ mũsumbĩ wa Yuta. Yĩla mũũme wakwie, mwanae nĩwambĩĩie kũsumbĩka. Ĩndĩ yĩla mwanae wakwie, Athalia eetwʼĩkĩthisye mũsumbĩ wa Yuta. Nĩwatatie kũmina mũsyĩ ũla asumbĩ maĩ maume, kwa kũaa mũndũ o na wĩva ũla waĩ atonya kũtwʼĩka mũsumbĩ vandũ vake, o na nĩwooaie esũkũũe make. Na nũndũ wa ũu andũ onthe nĩmamũkĩaa.

Mũthembi Mũnene Yeoiata na mũka wake, Yeoseva, nĩmeesĩ kana kĩla Athalia ũkwĩka nĩ kĩthũku mũno. Nĩmeekĩie thayũ woo mũisyonĩ kwa kũvitha kamwĩsũkũũe kamwe ka Athalia, kala keetawa Yeoasi. Makatwaie ĩkalũnĩ na makasũvĩĩaa vau.

Yĩla Yeoasi waĩ na myaka mũonza, Yeoiata oombanisye anene onthe na Alivai na amea atĩĩ: ‘Sungai mĩomo ya ĩkalũ, na mũiketĩkĩle mũndũ o na ũmwe alike.’ Na ĩndĩ Yeoiata amũtwʼĩkĩthya Yeoasi mũsumbĩ wa Yuta na amwĩkĩa ngovia ya ũsumbĩ. Yĩla andũ moonie ũu masya: ‘Mũsumbĩ ekale thayũ ĩvinda yĩasa!’

Yĩla Athalia weewie andũ mailonzanyʼa nĩwasembie aendete ĩkalũnĩ. Na ĩndĩ oona mũsumbĩ mweũ, aneena na wasya mũnene asya: ‘Nĩ ũlei! Nĩ ũlei!’ Yĩla anene ala maũngamĩte mũomonĩ wa ĩkalũ mamwonie, mamũkwatie, mamũtwaa vaasanga na ĩkalũ, na mamũaa. Nao nata andũ ma mbaĩ ĩsu ala maanangĩtwe nĩ mwĩkalĩle wake mũthũku?

Yeoiata nĩwatetheeisye andũ ma mbaĩ ĩsu meke ũtianĩo na Yeova. Mamwathie Yeova kana makamũthaithaa e weka. Asyokie amea manange vyũ ithembeo sya Mbaali na ngai sya mĩvwʼanano. Nĩwanyuvie athembi na Alivai mathũkũme ĩkalũnĩ nĩ kana wĩthĩe andũ no mathaithĩe ĩngĩ vo. O na nĩwanengie andũ wĩa wa kũsunga ĩkalũ nĩ kana masiĩĩe mũndũ ũte mũtheu ndakalike ĩkalũnĩ. Na ĩndĩ Yeoiata na anene mamũtwaa Yeoasi nyũmbanĩ ya ũsumbĩ na ekalĩla kĩvĩla kya mũsumbĩ. Andũ ma Yuta nĩmatanie. Yu maĩ matonya kũmũthaitha Yeova nesa, nũndũ Athalia ndaĩ vo na nĩmaekete ũthaithi wa Mbaali. Nĩwoona ũndũ Yeoiata watethisye andũ aingĩ nũndũ aĩ na ũkũmbaũ?