Ũtukũ ũmwe Mũsumbĩ Nevukatilesa nĩwaotie ndoto ya kũsengyʼa mũno. Ndoto ĩsu nĩyamũthĩnisye mũno weethĩa ndatonya kũkoma. Kwoou nĩweetie awe make na amea atĩĩ: ‘Ngelesyei kĩla nĩotie.’ Ĩndĩ awe asu mamwĩie: ‘Amba kũtũtavya ĩ ndoto.’ Nake Nevukatilesa amasũngĩa amea: ‘Aiee ndimũtavya. Ninywʼĩ mũũndavya ĩ ndoto, na mwalea kwĩka ũu nĩngũmũaa.’ Ĩndĩ masyokie mamwĩa: ‘Mwa amba kũtũtavya ndoto yaku, na ĩndĩ nĩtũũkũelesya kĩla kĩkwonanwʼa nĩ ndoto ĩsu.’ Nake amasũngĩa amea: ‘Nĩona inywʼonthe mũvangĩte kũngenga. Ndavyei mĩtũkĩ ndoto ĩla nĩotie!’ Namo awe asu mamũsũngĩa mũsumbĩ mamwĩa: ‘Vaiĩ mũndũ ũtonya kwĩka ũu. Ũndũ ũsu ũũtwĩa twĩke ndũtonyeka.’

Nevukatilesa athatie mũno nginya aumya mwĩao andũ onthe oĩ moawe. Andũ asu oĩ maaĩle kũawa nĩ vamwe na Ndanieli, Satalaki, Mesaki, na Aveti-neko. Ĩndĩ Ndanieli nĩwakũlilye mũsumbĩ amũnenge ĩvinda ambe kũsũanĩa ĩũlũ wa ũndũ ũsu. Yĩla wanengiwe ĩvinda, we na ala anyanyae nĩmamũvoyie Yeova mayenda amatetheesye. Yeova amasũngĩie ata?

Yeova amasũngĩie kwa kwonyʼa Ndanieli ndoto ĩla Nevukatilesa waotete na kĩla ndoto ĩsu yoonanasya. Mũthenya ũla waatĩĩe, Ndanieli nĩwaendie vala ve mũthũkũmi ũmwe wa mũsumbĩ na amwĩa atĩĩ: ‘Ndũkoae mũndũ o na ũmwe katĩ wa ala andũ oĩ. Nĩngũtavya mũsumbĩ ndoto ĩla ũnaotie na kĩla ndoto ĩsu ĩkwonanyʼa.’ Ĩtina wa ũu, mũthũkũmi ũsu nĩwamũtwaie Ndanieli vala ve Nevukatilesa. Ndanieli avika eeie mũsumbĩ atĩĩ: ‘Ngai nũkwonisye maũndũ ala makaũkwata ĩvinda yũkĩte. Ndoto ĩla ũnaotie ĩnailye ũũ: Ũnoonie mũvwʼanano mũnene wĩ na mũtwe wa thaavu, kĩthũi na moko ma vetha, kuma ĩvu nginya mau nĩ ũthuku, maaũ ma kĩaa, na nyaaĩ ivulanĩtwʼe kĩaa na yũmba. Na ĩndĩ woona ĩvia yatilwa kuma kĩĩmanĩ, na yakima mũvwʼanano ũsu maaũ. Mũvwʼanano ũsu nũnaanangĩkie vyũ watwʼĩka mũtutu na waũlũkwʼa nĩ nzeve. Ĩvia yĩu yĩnatilĩkile kuma kĩĩmanĩ yĩnatwʼĩkie kĩĩma kĩnene, na kyausũa nthĩ yonthe.’

Ĩtina wa ũu, Ndanieli eeie mũsumbĩ atĩĩ: ‘Ũũ nĩwʼo ndoto ĩsu ũnaotie ĩkwonanyʼa: Ũsumbĩ waku nĩwʼo mũtwe wa thaavu. Vetha ũnoonanasya ũsumbĩ ũla ũkasumbĩka ĩtina wa ũsumbĩ waku. Na ĩndĩ ĩtina vakooka ũsumbĩ ũilye ta ũthuku ũla ũkasumbĩka nthĩ yonthe. Ũsumbĩ ũla ũkaatĩĩa ũkethĩwa wĩ na vinya ta kĩaa. Na ĩndĩ mũthya vakeethĩwa na ũsumbĩ ũkethĩwa mũaanĩku wĩ na ilungu imwe syĩ na vinya ta kĩaa na ingĩ mbonzu ta yũmba. Nayo ĩvia yĩla wonie yatwʼĩka kĩĩma nĩ Ũsumbĩ wa Ngai. Ũsumbĩ ũsu ũkaananga mosumbĩ asu angĩ onthe na ũisumbĩka tene na tene.’

Yĩla Nevukatilesa weewie maũndũ asu nĩwatulilye ndu na akumana mbee wa Ndanieli. Na ĩndĩ amwĩa: ‘Ngai waku nĩwe ũkwonisye ndoto ĩsu. Vaiĩ Ngai ũngĩ ũilye take.’ Vandũ va Nevukatilesa kũmũaa Ndanieli, amũtwʼĩkĩthisye mũtongoi wa andũ onthe ala oĩ na mũnene wa kĩsio kya Mbaviloni. We nĩwoona ũndũ Yeova wasũngĩie mboya ya Ndanieli?

Ĩtina wa ĩvinda yĩana ũna kũvĩta kuma yĩla Mũsumbĩ Nevukatilesa waotie ndoto ya mũvwʼanano mũnene, nĩwaseũvisye mũvwʼanano mũnene wa thaavu. Nĩwaiie mũvwʼanano ũsu vandũ veetawa Ndula na ĩndĩ atavya andũ onthe ala manengetwe ndaĩa nthĩ ĩsu ala nĩ vamwe na Satalaki, Mesaki, na Aveti-neko mombane mbee wa mũvwʼanano ũsu. Na ĩndĩ mũsumbĩ aumya mwĩao asya: ‘Yĩla mũkwĩwʼa wasya wa soo, mbeve na mũtũlilũ, kumanĩai mũvwʼanano ũũ! Na mũndũ o na wĩva ũla ũte kwĩka ũu nũkwĩkwʼa ikonĩ ya mwaki.’ Mo ala Aevelania atatũ nĩmakumanĩie mũvwʼanano ũsu kana maendeeie kũmũthaitha Yeova e weka?

Ĩtina wa kumya mwĩao ũsu, mũsumbĩ aisye wathi ũkũnwe. Kĩla mũndũ nĩwakumanie na ambĩĩa kũthaitha mũvwʼanano ũsu eka Satalaki, Mesaki, na Aveti-neko. Andũ amwe maĩ vau nĩmoonie Aevelania asu mateũthaitha mũvwʼanano ũsu na ĩndĩ matavya mũsumbĩ atĩĩ: ‘Ala Aevelania atatũ nĩmaleile kũthaitha ũla mũvwʼanano waku.’ Yĩla Nevukatilesa weewie ũu, nĩwatũmanie Satalaki, Mesaki, na Aveti-neko maetwe mbee wake na ĩndĩ amea: ‘Nĩngũmũnenga mwanya ĩngĩ mũthaithe ũla mũvwʼanano. Mwalea kwĩka ũu, vate nzika nĩngũmwĩkya yĩla ikonĩ. Vaiĩ ngai ũtonya kũmũsiĩĩa ndikamwĩke ũu.’ Namo mamũsũngĩa mamwĩa: ‘O na vaiĩ vata wa kũtũnenga mwanya ĩngĩ. Ngai waitũ no atũtangĩĩe. Ĩndĩ o na aema kũtũtangĩĩa, mwa Mũsumbĩ, ithyĩ tũithaitha mũvwʼanano waku.’

Nevukatilesa eewʼa ũu nĩwathatie mũno. Na ĩndĩ eea athũkũmi make: ‘Ongelai mwaki ũsu nĩ kana ũvyũve vyũ mavinda mũonza mbee wa ũndũ ũvyũvaa.’ Ĩtina wa ũu atavya asikalĩ make ũũ: ‘Ovai aũme aa na mũimekya ikonĩ yĩu.’ Iko yĩu yaĩ ĩvyũ mũno nginya yĩla asikalĩ asu mayĩthengeeie mavĩe makwʼa o ndatĩkanĩ ĩsu. Ĩndĩ ala Aevelania atatũ nĩmalikile ikonĩ yĩu na mayaavya. Yĩla Nevukatilesa wookie na asisya ikonĩ yĩu, oonie aũme ana maitembea vo vandũ va aũme atatũ. Ũu wamũtelemilye mũno na watuma akũlya athũkũmi make atĩĩ: ‘Yo tũyĩkisye aũme atatũ ikonĩ? Ĩndĩ yu nĩona aũme ana nthĩnĩ na ũmwe woo ailye mũlaĩka!’

Ĩtina wa ũu, Nevukatilesa nĩwaendie vakuvĩ na iko yĩu na asya na wasya mũnene atĩĩ: ‘Umaalai nza inywʼĩ athũkũmi ma Ngai Ũla Wĩ Ĩũlũ wa Onthe!’ Kĩla mũndũ nĩwasengʼie mũno yĩla woonie Satalaki, Mesaki, na Aveti-neko maumaala nza me aima. Kĩkonde, nzwʼĩĩ, o na ngũa syoo iyaavya, o na mayanyungaa ta meĩ vandũ ve mwaki.

Maũndũ asu meekĩkie matumie Nevukatilesa asya: ‘Ngai wa Satalaki, Mesaki, na Aveti-neko nĩ Ngai mũnene. Nũtũmie mũlaĩka wake na amatangĩĩa. Vaiĩ ngai ũngĩ ta ũsu woo.’

O ta ala Aevelania atatũ, we nũtwʼĩte kwĩthĩwa wĩ mũĩkĩĩku kwa Yeova o na wakwatwa nĩ maũndũ mailye ata?