Kwĩthĩwa na Woni Waĩle Ĩũlũ wa Mĩtuo ya Kũthatya ya Ũla Ũtwaanĩte Nake

• Wendaa kwĩthĩwa na ũthasyo wa kwĩka maũndũ yĩla ũkwenda, ĩndĩ ũla ũtwaanĩte nake endaa kũvangĩĩa kĩla kaũndũ.

• Wĩ mũkilu na ndũlikanaa na andũ mũno, ĩndĩ ũla ũtwaanĩte nake nĩ mũneenu na endete kũlikana na andũ mũno.

We nĩwĩwʼaa ũithatwʼa nĩ mũtuo mũna wa ũla ũtwaanĩte nake? Kũtindĩanĩa nawʼo no kwanange mũtwaano wenyu. O na Mbivilia yaĩtye kana “ũla ũtindaa aineena ũndũ, ataanasya anyanya anene.”—Nthimo 17:9.

Vandũ va kũeka mũtuo mũna wa kũthatya ũtume ũemanwa na ũla ũtwaanĩte nake, noĩthwa ũtonya kwĩmanyĩsya kwonaa mũtuo ũsu kwa nzĩa nzeango.

Kĩlungunĩ kĩĩ

• Kwĩthĩwa na woni waĩle ĩũlũ wa mĩtuo ya kũthatya ya ũla ũtwaanĩte nake

• Kĩla andũ angĩ me mũtwaanonĩ maasya

• Ũndũ mũtonya kũneenea maũndũ

Kwĩthĩwa na woni waĩle ĩũlũ wa mĩtuo ya kũthatya ya ũla ũtwaanĩte nake

Mũtuo ũla ũũthatasya wa ũla ũtwaanĩte nake nũtonya kwĩthĩwa ũkonanĩtye na nguma ĩngĩ yake ĩkwendeeasya. Kwasũanĩa ngelekanyʼo ii itatũ:

“Mavinda maingĩ mũemewa ekaa maũndũ kavola o na yĩla ũkwĩyũmbanyʼa athi vandũ. Ĩndĩ mũtuo ũsu nũtumaa ethĩwa na wũmĩĩsyo—o na nyie mwene nũmbũmĩĩasya. Mavinda amwe nĩnĩthataa noona ayĩka maũndũ kavola, ĩndĩ o na vailye ũu, kwa nzĩa na, ũsu nĩ ũndũ ũmwe ũtumaa nĩmwenda.”—Chelsea.

“Kĩveti kyakwa kyendaa kũvangĩthya kĩla kaũndũ; kyendaa kwona maũndũ onthe maithi nesa, na kĩu mavinda amwe nĩkĩtumaa nĩthata. Ĩndĩ o na vailye ũu, kwenda kũvangĩthya kĩla kaũndũ nĩkũtumaa kĩthĩwa kĩyũmbanĩtye maũndũnĩ onthe.”—Christopher.

“Mũemewa no oneke ta ũte kwendeewʼa nĩ maũndũ, na kĩu nĩkĩtumaa nĩthata. Ĩndĩ o na vailye ũu, kwĩthĩwa ate kũsembea kwĩka maũndũ nĩ nguma ĩmwe yatumie nendeewʼa nĩ we. Nĩnendeeawʼa mũno nĩ ũtonyi wake wa kwĩkala auĩtye o na yĩla maũndũ meeta.”—Danielle.

O tondũ Chelsea, Christopher, na Danielle meemanyĩisye, kaingĩ wĩthĩaa mawonzu ma ũla ũtwaanĩte nake nĩmakonanĩtye na ũseo wake. Na yĩla vekala ũu, ndwĩsa kũvetanga mawonzu na ũilea kũvetanga moseo, o tondũ ũyĩkya silingi ũtesa kwĩkya ngalĩko ĩmwe na ũitia ĩla ĩngĩ.

Vate nzika, mĩtuo ĩmwe ya kũthatya ndĩthĩawa ĩkonanĩtye na nguma nzeo. Kwa ngelekanyʼo, Mbivilia nĩyĩtĩkĩlĩte kana andũ amwe nĩmethĩawa na ‘ũthatu.’ (Nthimo 29:22) Yĩla vekala ũu, mũndũ ũsu nĩwaĩlĩte kwĩkĩa kĩthito avetange “kĩla mũthemba wa woo mwai, ũthatu, ũthilĩku, ĩteta, [na] kũumana.”a—Aeveso 4:31.

Ĩndĩ ethĩwa mũtuo mũna wĩkaa o kũũthatya, atĩĩa ũtao ũũ wa Mbivilia: “Endeeai kũmĩanĩsya . . . ethĩwa mũndũ o na wĩva e na ũndũ na ũngĩ.”—Akolosai 3:13.

Kwongela kĩu, tata kũmantha nguma nzeo ĩla ĩkonanĩtye na mũtuo ũsu—ĩla ĩtonya kwĩthĩwa yatumie wendeewʼa nĩ ũla ũtwaanĩte nake. Mũndũũme ũmwe ũtwaanĩte wĩtawa Joseph aĩtye atĩĩ, “Kũsũanĩĩa mũno ĩũlũ wa mũtuo wa kũthatya wa ũla ũtwaanĩte nake nĩ ũndũ ũmwe na kwona mĩthya myũĩ ya kavila ka diamond na ũilea kwendeewʼa nĩ wanake wako.”

Ũndũ mũtonya kũneenea maũndũ

Mbee, kĩla ũmwe no ekũlye makũlyo aa e weka. Na ĩndĩ mũineenea mosũngĩo mamo mwĩ vamwe.

• Ũla ũtwaanĩte nake nĩwĩthĩwa na mũtuo mũna wonaa ũiete mathĩna mũtwaanonĩ wenyu? Ethĩwa wĩ vo, nĩ wĩva?

• Mũtuo ũsu nĩ mũthũku mũno, kana wĩkaa o kũũthatya?

• Ve nguma nzeo wĩthĩawa nayo ĩkonanĩtye na mũtuo ũsu? Ethĩwa yĩ vo, nĩ yĩva, na nĩkĩ wonaa nguma ĩsu yĩ ya vata?