Ĩthĩwa wĩ Mũĩkĩĩku Maũndũnĩ Onthe

Kĩla mũndũ nĩwendete kwĩthĩwa na anyanya aĩkĩĩku. O nake Yeova nĩwendaa anyanya make methĩwe mailye ũu. Ĩndĩ ti ũndũ wĩ laisi nũndũ ũmũnthĩ andũ aingĩ ti aĩkĩĩku. Tũtonya kũtetheka ata twaendeea kwĩthĩwa twĩ aĩkĩĩku maũndũnĩ onthe?

1. Nĩ ũndũ wĩva wa vata vyũ ũla ũtumaa twĩthĩwa twĩ aĩkĩĩku?

Yĩla tweethĩwa twĩ aĩkĩĩku kwa andũ ala angĩ, twonasya Yeova kana nĩtũmwendete na nĩtũmũnengete ndaĩa. Manya kana Yeova nĩwĩsĩ mesilya maitũ onthe o na meko maitũ. (Aevelania 4:13) Nĩwonaa yĩla twanyuva kwĩthĩwa twĩ aĩkĩĩku na ũndũ ũsu nũtumaa atana. Ndeto yake yasyaa atĩĩ: “Ũla wĩ ngũlũ nĩ ũthatyo kwa Yeova; Ĩndĩ ũnyanya wake nĩ wake na ũla mũlũngalu.”—Nthimo 3:32.

2. Tũtonya kwonanyʼa ũĩkĩĩku ata maũndũnĩ maitũ ma kĩla mũthenya?

Yeova nĩwendaa ‘tũneenae wʼo kĩla mũndũ na mũtũi wake.’ (Nzekalia 8:16, 17) Ũu wonanasya ata? Twĩthĩwe twĩneena na andũ maitũ ma mũsyĩ, ala tũthũkũmaa namo, ana-a-asa na eĩtu-a-asa, kana athũkũmi ma silikalĩ, tũyaĩlĩte kũkengana kana kũnengane ũvoo ũte wa wʼo. Andũ aĩkĩĩku mayũyĩaa ala angĩ kana kũmavena kwa nzĩa ya ũkengani. (Soma Nthimo 24:28 na Aeveso 4:28.) O na nĩmaĩvaa koti ũla maĩlĩte kũĩva. (Alomi 13:5-7) Nzĩanĩ isu na ingĩ mbingĩ, nĩtũendeeaa “kwĩthĩwa twĩ aĩkĩĩku maũndũnĩ onthe.”—Aevelania 13:18.

3. Tũtonya kũtetheka ata twaendeea kwĩthĩwa twĩ aĩkĩĩku?

Yĩla tweethĩwa twĩ aĩkĩĩku, andũ ala angĩ nĩmatũĩkĩĩaa vyũ. Nĩtũtumaa angĩ kĩkundinĩ mewʼa me eanĩe, na tũyĩthĩwa tũilye ta andũ ma mũsyĩ ũmwe wĩ wendo. O na nĩtũtanĩaa wasya mũtheu wa ngoo. Ũĩkĩĩku witũ no ‘wanakavye momanyĩsyo ma Ngai, Mũtangĩĩi waitũ,’ na ũikusya angĩ moke ũthaithinĩ wa wʼo.—Tito 2:10.

ĨMANYĨSYE MŨNANGO

4. Ũĩkĩĩku nũmũtanĩthasya Yeova

Somai Savuli 44:21 na Malaki 3:16, na ĩndĩ mũineenea makũlyo aa:

• Wĩĩsilya nĩkĩ ũte ũndũ wa ũĩ kũsũanĩa kana no tũvithe ũla wʼo?

• Wĩona Yeova ewʼaa ata yĩla twanyuva kũneena ũla wʼo, o na ethĩwa ti laisi kwĩka ũu?

5. Ĩthĩawa wĩ mũĩkĩĩku mavinda onthe

VITIO: Maũndũ Ala Maetae Ũtanu—Wasya Mũtheu wa Ngoo (2:32)

Somai Aevelania 13:18, na ĩndĩ mũineenea ũndũ tũtonya kwonanyʼa ũĩkĩĩku . . .

• mĩsyĩnĩ yaitũ.

• wĩanĩ kana sukulu.

• maũndũnĩ angĩ.

6. Ũĩkĩĩku nũtũtethasya

Mavindanĩ amwe, ũĩkĩĩku nũtonya kwoneka ta ũtonya kũlikya mũndũ mathĩnanĩ. Ĩndĩ kũneena ũla wʼo, ũsu nĩwʼo ũndũ ũla mũseo vyũ mũndũ waĩlĩte kwĩka. Somai Savuli 34:12-16, na ĩndĩ mũineenea ĩkũlyo yĩĩ:

• Ũĩkĩĩku ũtonya ũkũtethya ata?

1. Aũme na aka ala aĩkĩĩku nĩmalũlũmĩĩlasya mũtwaano woo

2. Athũkũmi aĩkĩĩku nĩmethĩawa maĩkĩĩwe nĩ ala mamaandĩkĩte

3. Andũ ala aĩkĩĩku mayĩthĩawa na mathĩna na anene ma silikalĩ

KĨLA TWEEMANYĨSYA

Yeova endaa anyanyae methĩwe me aĩkĩĩku maũndũnĩ onthe ala meũneena na ala mekwĩka.

Makũlyo ma Kũsyokeleela

• Tũtonya kwonanyʼa ũĩkĩĩku maũndũnĩ ta meva?

• Nĩkĩ ũte ũndũ wa ũĩ kũsũanĩa kana no tũvithe ũla wʼo?

• Nĩkĩ ũkwenda kwĩthĩwa wĩ mũĩkĩĩku mavindanĩ onthe?

MAŨNDŨ ANGĨ MA KWĨMANYĨSYA

Asyai matonya kũtetheesya syana syoo ata syĩthĩawe syĩ ndĩkĩĩku?

Neenaa Ũla Wʼo (1:44)

Nĩkĩ nĩ ũndũ wa vata kwĩanĩasya kĩla twaathana?

Ĩanĩasya Kĩla Waathana na Ũkakwata Moathimo (9:09)

Soma wone ethĩwa no nginya tũĩvae koti, o na ethĩwa wĩtũmĩwa kwa nzĩa ĩla ĩtaĩlĩte.

“No Nginya Ũĩve Koti?” (Mũsyaĩĩsya, Ĩtukũ 1, Mwei wa 9, 2011)

Nĩ kyaũ kyatetheeisye mũndũũme ũmwe ũla ũtaĩ mũĩkĩĩku wĩanĩ wake ambĩĩa kwĩthĩwa e mũĩkĩĩku?

“Nĩnamanyie Kana Yeova E Tei na Nũekeaa” (Mũsyaĩĩsya, Ĩtukũ 1, Mwei wa 5, 2015)