We no Ũĩkĩĩe Ndĩni Maũndũnĩ Makonetye Kaũ?

Mũndũũme wĩtawa Alberto wathũkũmie na ita sya kaũ kwa vakuvĩ myaka ĩkũmi easya ũũ: “Mũthembi witũ atũathimaa akyasya, ‘Ngai e vamwe nenyu.’ Ũu watumie nĩsilya, ‘Nĩendete kũaana, nayo Mbivilia yaasya “ndũkoae.”’”

Nake Ray athũkũmaa na ita sya kaũ sya kĩwʼũnĩ ĩvindanĩ ya Kaũ wa Kelĩ wa Nthĩ Yonthe. Mũthenya ũmwe akũlilye vasita woo ũũ: “Ũlikaa vaa melinĩ kũtũvoyea nĩ kana tũsinde. Ĩndĩ amaitha maitũ tyo mavoyaa nĩ kana matũsinde-ĩ?” Vasita ũsu asũngĩie ayasya kana nzĩa sya Mwĩaĩi nisaanĩtye.

Ethĩwa ũsũngĩo wa vasita ũsu nĩwaũsaanĩsya, ndwĩ weka.

MBIVILIA ĨMANYĨASYA ATA?

Yesũ aisye mwĩao mũnene katĩ wa ĩla mĩao ya Ngai nĩ ũũ: “Mwende [mũtũi] waku o tondũ wĩyendete mwene.” (Maliko 12:31) Ĩkũlyo nĩ, we Yesũ oonanasya kana twaĩle kwenda mũtũi witũ kwosana na vala umĩte? Aiee. Eeie amanyĩwʼa make atĩĩ: ‘Kwondũ wa ũu andũ onthe makamanya kana mwĩ amanyĩwʼa makwa, ethĩwa mwĩthĩwa na wendo inywʼĩ kwa inywʼĩ.’ (Yoana 13:34, 35) Maĩ methĩwe mendanĩte mũno vyũ ũkethĩa ũsu nĩwʼo ũvano wa kũmanya nĩmo amanyĩwʼa ma Yesũ. Nĩ kavaa maumye thayũ woo kwondũ wa ala angĩ, kũte kũmoaa.

Aklĩsto ma mbee nĩmaatĩĩaa ndeto isu sya Yesũ. Ĩvuku yĩtawa The Encyclopedia of Religion yaĩtye ũũ: “Atongoi ma mbee ma ĩkanisa ta Tertullian na Origen, maisye kana Aklĩsto nĩmavatĩtwe kũaa, na ũu nĩwamasiĩĩaa kũtwʼĩka asikalĩ nthĩnĩ wa ita sya Lomi.”

NGŨSĨ SYA YEOVA SYĨKAA ATA?

Nũndũ Ngũsĩ sya Yeova nĩ ta syĩ kĩla nthĩ, mavinda angĩ syĩsaa kwĩyĩthĩa syĩ katĩ wa nthĩ ilĩ syĩkũkita. Ĩndĩ o na vailyĩ ũu, syĩkĩaa kĩthito kingĩ syĩendee kwonanyʼa wendo.

Kwa ngelekanyʼo, mwaka wa 1994 kwaĩ kaũ katĩ wa mbaĩ ya Hutu na ya Tutsi nthĩ ya Rwanda, ĩndĩ Ngũsĩ sya Yeova iyaakwata mbau ngalĩko o na yĩva kaũnĩ ũsu. Ngũsĩ sya mbaĩ ĩmwe nĩsyavithaa Ngũsĩ sya mbaĩ ĩla ĩngĩ, o na kũtwʼĩka mavinda maingĩ ũu watumaa thayũ wasyo wĩthĩwa mũisyonĩ. Ĩvinda yĩmwe ana-a-asa elĩ ma mbaĩ ya Hutu nĩmavithie ana-a-asa ma mbaĩ ya Tutsi. Ĩla mamanyĩkie, kĩkundi kya asikalĩ kĩtawa Hutu Interahamwe kyameie, “No mũkusaa nũndũ wa kũvonokya andũ ma mbaĩ ya Tutsi.” Ũndũ wa kũmakya nĩ kana ana-a-asa asu elĩ ma mbaĩ ya Hutu nĩmooaiwe.—Yoana 15:13.

We wĩona ata: Ũndũ Ngũsĩ sya Yeova syĩkaa nĩwosanĩte na ndeto sya Yesũ ĩũlũ wa kwenda angĩ nginya ũkeyumya ũkwʼe kwondũ woo?