We no Ũĩkĩĩe Ndĩni Maũndũnĩ Makonetye Mwĩkalĩle?

Sylvia, ũla ũthũkũmanaa na maũndũ ma ũiiti, easya ũũ: “Nasomaa sukulu ĩmwe na andũ maendaa kanisa mũno.” Aendee kwasya: “Ĩndĩ andũ o asu nĩmoyaa mũtiani na nĩmatũmĩaa ndawa sya kũmila. Ndĩni ndyaamatethya o na vanini kũalyũla mwĩkalĩle woo.”

Mũndũ ũmwe wĩtawa Lionel aĩtye ũũ: “Andũ ala nĩthũkũmaa namo nĩ akengani na makũnaa simũ wĩanĩ mayasya nĩ awau mate awau. Nĩ andũ ma ndĩni, ĩndĩ ndĩni isu iimatethasya. Ndĩni kwoo no ta mũio wa nyũmba mataũtũmĩaa, mekĩte kwia wĩloelawe.”

Ndĩni ndĩtetheeasya andũ aingĩ ũmũnthĩ methĩwe na mwĩkalĩle mũseo. Aingĩ “me na mũvwʼano wa kĩkĩo kwa Ngai” ĩndĩ “nĩmakaĩĩte vinya wakyo.” (2 Timotheo 3:5) Atongoi ma ndĩni syoo nĩmaemetwe nĩ kũmonyʼa ngelekanyʼo nzeo, na makaemwa nĩ kũmanenga ũtao wa Maandĩko ĩũlũ wa ũndũ matonya kwĩthĩwa na mwĩkalĩle mũseo. Kwondũ wa ũu, ti ũndũ wa ũsengyʼo kwĩwʼa aingĩ mayasya Ngai ndonaa ta ũndũ o na meethĩwa na mwĩkalĩle ũilyĩ ata.

MBIVILIA ĨMANYĨASYA ATA?

Mbivilia yonanasya kana Ngai no atane kana akewʼa woo, na kana mwĩkalĩle witũ nĩ wa vata kwake. Ĩla mbaĩ ya Isilaeli yamũvĩtĩisye Ngai, ‘nĩyamwĩwʼĩthisye woo.’ (Savuli 78:40) Ĩndĩ nĩkwĩthĩawa “ũtanu ĩtunĩ” ĩla mũndũ waalyũla mwĩkalĩle wake mũthũku. (Luka 15:7) Ĩla mũndũ wamũmanya Ĩthe witũ wa ĩtunĩ nesa, ũu nũtumaa wendo wake kũmwelekela Ngai wongeleka na ũituma enda kĩla Ngai wendete na aimena kĩla Ngai ũmenete.—Amosi 5:15.

NGŨSĨ SYA YEOVA SYĨKAA ATA?

Ĩkaseti yĩmwe yĩtawa Deseret News ya Salt Lake City, Utah, Amelika, yaĩtye kana Ngũsĩ sya Yeova “nimatetheeasya andũ methĩwe na mĩsyĩ myaĩlu, methĩwe andũ mekwatwʼa, na aĩkĩĩku.” Ĩkaseti yĩu yĩendee kwasya: “Athaithi ma ndĩni ĩsu methĩawa na mwĩkalĩle mũseo vyũ. Maĩkĩĩa kana kũnywʼa sikala, kũnywʼa ũkĩ mũno, kũtũmĩa ndawa sya kũmila, kũtha kalata, ũlaalai, na aũme kũkoma na aũme kana aka kũkoma na aka nĩ maũndũ matonya kũtuma andũ mataendeea nesa kĩ-veva.”

Kwĩmanyĩsya ĩũlũ wa Ngai kũtethetye Ngũsĩ ata? Sylvia, ũla wawetwa mwambĩĩonĩ, aĩtye, “Ũlũsani ti ũndũ mũeni mũveanĩ wa maũndũ ma ũiiti.” O na ĩngĩ aĩtye, “Nĩ laisi kũatĩĩa mwĩmbĩsĩ. Ĩndĩ kũmanya ũndũ Yeovaa wĩwʼaa andũ meethĩwa me alũsani, nĩkũndetheeasya kwĩka ũla waĩle. Nĩ mũtanu na nĩ mwĩanĩe.” Sylvia nĩwĩsĩ nesa ki kana kũatĩĩa kĩla ndĩni yake ĩmanyĩasya nĩkũmũtethetye mũno.