Nĩkĩ Nũseo Ũkamanya Kĩla Kĩ Mbivilianĩ?

Mbivilia nĩyo ĩvuku yĩla yendetwe mũno vyũ. Nĩkĩ? Ũndũ wa mbee, yĩthĩawa ĩwetete maũndũ matũkonetye. Yĩeleetye ĩũlũ wa ũndũ andũ ma tene mekalanasya na andũ angĩ, na ũndũ ũnyanya woo na Ngai wailyĩ. Ũvoo ũsu ũtũmanyĩasya maũndũ matũtethya. Mbivilia yĩeleetye maũndũ ta asu ĩtũmĩĩte ndeto syĩ laisi, na itonya kũalyũlwa ithyomonĩ mbingĩ na ikaeleeka nĩ andũ me kũndũ kwĩ kĩvathũkanyʼo na ĩvinda o na yĩva. Myolooto ya Mbivilia yĩthĩawa yĩ myaĩlu ĩvinda yonthe.

Ũndũ ũla wa vata mũno nĩ kana o na kau Mbivilia nĩyĩeleetye ĩũlũ wa Ngai, nĩyonanĩtye nesa ki kana nĩ ĩvuku kuma kwa Ngai. Nĩwetete ĩsyĩtwa ya Ngai, ĩkatũtavya we nĩ wa mũthemba mwaũ, na ĩkaweta kĩeleelo kyake kya kũmba nthĩ na andũ. O na nĩyĩeleetye ũndũ kwa ĩvinda ĩasa kwĩthĩĩtwe na ngusanĩsyo katĩ wa ũseo na ũthũku, na ũndũ ũthũku wʼonthe ũkilyĩ kũvetwa. Kwoou, wasoma Mbivilia wĩ na wendi wa kũmanya, ũkeethĩwa na mũĩkĩĩo na wĩkwatyo.

Vaiĩ ĩvuku yĩngĩ yĩeleetye maũndũ ala maeleetwʼe nĩ Mbivilia. Kwa ngelekanyʼo, Mbivilia nĩsũngĩĩte makũlyo amwe ta aa:

• Twaumie va, na nĩkĩ tũthĩnaa?

• Ngai eekie ata nĩ kana ovosye andũ?

• Nĩ maũndũ meva Yesũ wĩkĩte kwondũ witũ?

• Ve wĩkwatyo mwaũ kwondũ wa andũ na nthĩ ĩno?

Wĩona ata ũkosa kamwanya kanini ũkasoma kĩlungu kĩla kĩatĩĩe nĩ kana ũmanye nĩ ũvoo mwaũ wĩ Mbivilianĩ?