Twaumie Va?

O kwa ũkuvĩ, ĩvuku ya Mwambĩlĩlyo yĩla nĩyo ĩvuku ya mbee ya Mbivilia, nĩyĩeleetye vala nthĩ na matu syaumie. Yaĩtye: “Mwambĩlĩlyonĩ Ngai nĩwatwʼĩkĩthisye matu na nthĩ.” (Mwambĩlĩlyo 1:1) Ĩtina wa Ngai kũmba mĩtĩ na nyamũ nĩwʼo woombie andũ elĩ ma mbee, Atamu na Eva. Andũ asu maĩ kĩvathũkanyʼo na nyamũ nũndũ moombiwe me na ũtonyi wa kwonanyʼa wendo, ũlũngalu, kwĩthĩwa na ũtanu, ũthasyo wa kwĩnyuvĩa maũndũ, na ndaĩa ingĩ ta isu sya Ngai. Na nũndũ wa ũu maĩ matonya kũsilĩlwa kwosana na meko moo. Keka nĩmeewie mĩao ya Ngai, methĩwa meanĩisye kĩeleelo kyake kya andũ masyaane mausũsye nthĩ na mayĩkala me na mũuo na mate na naĩ tene na tene.

Ĩndĩ ve kyũmbe kĩmwe kya veva, kana mũlaĩka ũmwe ũla watwie kũtũmĩa andũ asu naĩ. Mũlaĩka ũsu nĩ Satani, na ũalyũlo wa ĩsyĩtwa yĩu yake nĩ “Mũvinganĩsya.” Satani atũmĩie nzoka kũmũkenga Eva atĩ ndakesa kwona naĩ o na alea kũmwĩwʼa Ngai. Atamu na Eva nĩmamwĩwie Satani, na nũndũ wa ũu maananga ũnyanya woo na Mũmbi woo. Takethĩwa ti ũu methĩwa mekalile tene na tene, ĩndĩ nũndũ wa kwĩka ũtwi mũthũku, nĩmakwie na matũtiĩa naĩ na kĩkwʼũ.

Asyai asu maitũ ma mbee mamina kwĩka naĩ oou, Ngai nĩwawetie mũvango wake wa kũlũnga maũndũ nĩ kana wĩthĩe nzyawa sya Atamu nitonya kwĩsa kwĩkala tene na tene. Ngai nĩwathanie kana ve “ũsyao” ũkaumĩla. “Ũsyao” ũsu waĩ wĩthĩwe ne mũndũ wa mwanya vyũ ũla waĩ anange Satani vyũ na aimina mathĩna onthe ala maetiwe nĩ Satani, Atamu, na Eva. (Mwambĩlĩlyo 3:15) Nũũ wesaa kũtwʼĩka “ũsyao” ũsu? Yaĩ no nginya andũ meteele meyonee.

Ĩndĩ ũsyao ũsu ũtambĩte kumĩla, Satani nĩwatatie mũno kwananga kĩeleelo kya Ngai. Andũ athũku nĩmaendeeie kwongeleka. Nĩvo ĩndĩ Ngai watwie kwananga ala athũku na mbua mbingĩ. Nĩwamwĩaĩe Noa aseũvye ngalawa ĩla yailyĩ ĩsandũkũ ĩnene, nĩ kana etangĩĩe, atangĩĩe mũsyĩ wake, vamwe na nyamũ syonthe ila wanengetwe mwĩao wa kũilikya ngalawanĩ.

Mwaka ũmwe ĩtina wa mbua kwambĩĩa kua, Noa na mũsyĩ wake nĩmaumie ngalawanĩ na meethĩa nthĩ yĩ ntheu vyũ. Ĩndĩ ũla “ũsyao” wawetetwe ndwaĩ ũnaumĩla.

—Ũvoo ũũ wumĩtwʼe ĩvukunĩ ya Mwambĩlĩlyo, kĩlungu kya 1 nginya kya 11; Yuta 6, 14, 15; Ũvuanʼyo 12:9.