Ũndũ Ngai Weekie Nĩ Kana Ovosye Andũ

Ngai amwathie Avalaamu kana “ũsyao” ũla wathanĩtwe ũkaumana na nzyawa yake. Kwĩsĩla ũsyao ũsu andũ ma “mbaĩ syonthe” maĩ makwate ũathimo. (Mwambĩlĩlyo 22:18) Ĩtina wa ĩvinda, mwĩsũkũũe wa Avalaamu ũla weetawa Yakovo nĩwathamĩĩie Misili, na e kũu mũsyĩ wake nĩwanenevie mũno. Mũsyĩ ũsu wake nĩwʼo wesie kũtwʼĩka mbaĩ ya Isilaeli.

Ĩtina wa ĩvinda ĩna, nthĩ ya Misili nĩyasumbĩkiwe nĩ Valao. Mũsumbĩ ũsu aĩ mũthũku mũno na nĩwakwatie Aisilaeli ũkombo. Nũndũ wa ũu, Ngai nĩwamũnyuvie Mose na amũtwʼa mwathani nĩ kana atongoesye mbaĩ ya Isilaeli kuma Misili. Na ĩndĩ atũmĩa kyama kũaanyʼa Ũkanga Mũtune nĩ kana Aisilaeli mesĩle vo matongoewʼe nĩ Mose. Ĩtina wa ũu, Ngai nĩwanengie Aisilaeli mĩao mingĩ, vamwe na ĩla Mĩao Ĩkũmi, nĩ kana ĩmasũvĩe na ĩimatongoesya. Mĩao ĩsu nĩyawetete ĩũlũ wa kumya nthembo nĩ kana andũ maekewe naĩ syoo. Mose nĩwaveveewe nĩ Ngai atavye Aisilaeli kana Ngai akamatũmĩa mwathani ũngĩ. Mwathani ũsu nĩwe waĩ atwʼĩke ũla “ũsyao.”

Myaka mbee wa 400 ĩtina wa ũu, Ngai nĩwamwathie Mũsumbĩ Ndaviti kana “ũsyao” ũsu wathaniwe mũũndanĩ wa Eteni ũkasumbĩka ũsumbĩnĩ ũtakaanangĩka. Ũsyao ũsu nĩwʼo wesaa kũtwʼĩka Masia, Mũtangĩĩi ũla wanyuvĩtwe nĩ Ngai nĩ kana ovosye andũ na aiseũvya nthĩ yĩkale ũndũ yailyĩ mwambĩĩonĩ.

Ngai nĩwatũmĩie Ndaviti na athani angĩ kũvuanyʼa ĩũlũ wa Masia kavola kwa kavola. Mathanie kana akeethĩwa e na wĩnyivyo na tei na kana mayũa, ũsili ũte wa katĩ, na kaũ ikathela ĩla ũkethĩwa asumbĩkĩte. O na ĩngĩ ĩvindanĩ yĩu andũ makekalanyʼa nesa na maikathĩnanyʼa na nyamũ. Mowau maikethĩwa kwʼo, o na mathĩna na kĩkwʼũ nũndũ syĩndũ isu iyaĩ kĩeleelonĩ kya Ngai ayũmba nthĩ. O na andũ ala makwie makathayũũkwʼa mekale vaa nthĩ.

Ngai nĩwathanie kwĩsĩla mwathani Mika kana Masia akasyaĩwa Mbethelemu, na asyoka atũmĩa mwathani Ndanieli kwathana kana Masia o ũsu akooawa. Ĩndĩ, Ngai nĩwavangĩte kana akamũthayũũkya na aimũtwʼĩkĩthya Mũsumbĩ ĩtunĩ. Ndanieli nĩwooniwʼe woninĩ kana Ũsumbĩ wa Masia ũkaananga vyũ mosumbĩ ala angĩ onthe. We Masia nĩwesie kũka o tondũ kwathanĩtwe?

—Ũvoo ũũ wumĩtwʼe ĩvukunĩ ya Mwambĩlĩlyo, kĩlungu kya 22 nginya kya 50, vamwe na ĩvuku ya Kuma, Kũtũngĩlĩlwa Kwa Mĩao, 2 Samueli, Savuli, Isaia, Ndanieli, Mika, Nzekalia 9:9.