“Nĩtwamwona Ũla Masia”!

Myaka 400 ĩtina wa ĩvuku ya mũthya kũandĩkwa nthĩnĩ wa Maandĩko ma Kĩevelania ala nĩmo ũtianĩo mũkũũ, wathani ũla Mika wathanĩte ĩũlũ wa Masia nĩweanĩie. Athanĩte kana Yesũ akasyaĩwa Mbethelemu, na nĩvo wesie kũsyaĩwa. Myaka 30 ĩtina wa wathani ũsu wa Mika kwĩanĩa, kĩlungu kya mbee kya wathani wa Ndanieli ĩũlũ wa kũka kwa Masia nĩkyeanĩie. Kyeanĩie mwaka wa 29 ĩla Yesũ wavatisiwe, na Ngai amwĩtĩkĩsya veva mũtheu. Ĩvinda yĩu nĩwʼo Yesũ watwʼĩkie Masia, kana ũla Ũsyao wathanĩtwe.

Yesũ ndaananga saa ĩtina wa kũvatiswa, ĩndĩ ambĩĩie kũthi “akĩtavanʼya na kũnyaĩĩkya ũvoo mũseo wa ũsumbĩ wa Ngai.” (Luka 8:1) Na o tondũ kwathanĩtwe Yesũ aĩ mũseo ki, eewʼĩaa andũ tei na kũmathĩnĩkĩa kuma ngoonĩ. Amanyĩasya maũndũ matethya, na nĩwendete andũ ala wamanyĩasya. O na nĩwavoasya andũ “mawonzu ma mĩthemba yonthe,” na kwondũ wa ũu aĩkĩĩthya kana Ngai aĩ vamwe nake. (Mathayo 4:23) Andũ ma mĩthemba yonthe nĩmamũatĩĩie Yesũ na maĩ matonya kwasya o tondũ mũmanyĩwʼa ũmwe wake waisye, “Nĩtwamwona ũla Masia”!—Yoana 1:41.

Yesũ nĩwathanie kana Ũsumbĩ wake ũtanambĩĩa kũsumbĩka, kũkaumĩla makaũ, itetemo sya nthĩ, na mathĩna angĩ maingĩ. Nĩweekĩie andũ onthe vinya maendee ‘kũsyaĩĩsya.’—Maliko 13:37.

Yesũ ndaĩ na naĩ o na vanini na amwĩwʼaa Ngai ĩvinda yonthe, ĩndĩ amaitha make nĩmesie kũmũaa. Kĩkwʼũ kyu kyake nĩkyaĩvĩie nesa vyũ naĩ ĩla Atamu na Eva meekie, na kwondũ wa ũu atuma andũ methĩwa ĩngĩ na wĩkwatyo wa kwĩsa kwĩkala tene na tene kũũ nthĩ yĩ valatiso.

Ĩla Yesũ wakwie nĩweanĩisye wathani. O ta ũu, nake Ngai nĩweanĩisye wathani kwa kũmũthayũũkya e na mwĩĩ wa veva ĩtina wa mĩthenya ĩtatũ. Ĩtina wa kũthayũũkwʼa nĩvo ĩndĩ Yesũ waumĩlĩile amanyĩwʼa mbee wa 500. Na ĩndĩ atanamba kwambata ĩtunĩ, nĩwameaĩe aatĩĩi make matavye andũ ma “mbaĩ syonthe” ũvoo mũseo ĩũlũ wake na ĩũlũ wa Ũsumbĩ wake. (Mathayo 28:19) Mo nĩmeanĩisye wĩa ũsu?

—Ũvoo ũũ wumĩtwʼe ĩvukunĩ ya Mathayo, Maliko, Luka, Yoana, 1 Akolintho.