Ve Wĩkwatyo Kwondũ wa Andũ Makwa Ala Makwie Tene?

MYAKA mĩvũthũ mĩvĩtu, ĩkaseti yĩmwe ya Korea (The Chosun Ilbo), yaĩ na kyongo kĩmwe kya ũsengy’o. Kyongo kyu kyakũlĩtye atĩĩ: “Shim Cheong Mũseo, Ũla Ũtaamwĩsĩ Yesũ—Aendie Ĩianĩ ya Mwaki?”

Kyongo kyu kyaĩ kya ũsengy’a nũndũ Shim Cheong awetetwe ngewanĩ sya tene sya nthĩ ya Korea ta mwĩĩtu mũseo ũla waumisye thayũ wake nĩ kana atetheesye ĩthe wake ũla waĩ kĩlalinda. Kwa ĩvinda ya myaka mingĩ ethĩĩtwe aikathwa mũno. O na kũvika ũmũnthĩ nthĩ ya Korea, Shim Cheong atalawa ta ngelekany’o nzeo ya mwĩĩtu weeyumĩtye mũno.

Andũ aingĩ monaa wĩ ũndũ ũtaĩle o na vanini kwa mũndũ ta ũsu waseũvĩte ũu kũthĩnĩw’a ĩianĩ ya mwaki, aĩ nũndũ ndaĩ Mũklĩsto mũvatise. O na ĩngĩ, nĩ ũseo kũmanya kana maũndũ asu makonetye mwĩĩtu ũsu meekĩkie tene mũno o na ũvoo ĩũlũ wa Klĩsto ũtesĩkĩe ũtũinĩ kwoo.

Ũvoo ũsu waĩ ĩkasetinĩ yĩu waĩ na kĩlungu kya ũneenany’a na mũtongoi wa ndĩni. Akũlilw’e kana andũ ala makwie matamwĩsĩ Yesũ Klĩsto makavĩvĩw’a ĩianĩ ya mwaki. Asũngĩie ata? “Ithyĩ tũyĩsĩ. Ĩndĩ twonaa Ngai nĩwe wĩsĩ kĩeleelo kĩla wĩ nakyo [kwa andũ ta asu].”

KŨVATISWA NĨ KWA LASIMA NĨ KANA MŨNDŨ ETANGĨĨWA

Ĩvuku yĩmwe (The New Catholic Encyclopedia) yaĩtye atĩĩ: “No nginya mũndũ avatiswe nĩ kenda etangĩĩwa. O nake Klĩsto aisye vai mũndũ ũtonya kũlika Ũsumbĩnĩ wa Ngai ate o asyaiwe ĩngĩ na manzĩ na Veva Mũtheu (Yoa 3.5).” Nũndũ wa ũu, andũ amwe maĩkĩĩaa kana andũ ala makw’a mate avatise mekaw’a ĩianĩ ya mwaki, kana makathĩnw’a kwa nzĩa ĩngĩ.

Ĩndĩ ve andũ angĩ aingĩ monaa mũĩkĩĩo ta ũsu wĩ wa ũtumanu. Kwĩ andũ milioni mbingĩ makwie matemanyĩĩtye Mbivilia. Mo andũ asu maĩle kũthĩnw’a tene na tene? Yo Mbivilia ĩmanyĩasya ata ĩũlũ wa ũndũ ũsu?

WĨKWATYO ŨLA ŨWETETWE MBIVILIANĨ

Mbivilia nĩyonanĩtye nesa vyũ kana Ngai ndesa kũlwa nĩ andũ ala makwie matamwĩsĩ. O na ĩandĩko ya Meko ma Atũmwa 17:30 yĩtũĩkĩĩthĩtye ũũ: “Ĩndĩ mavinda ma ũlea ũmanya, Ngai etw’a ta ũteona.” Kwoou Mbivilia yonanĩtye ve wĩkwatyo mwaũ kwa andũ ala makwie matanamba kũkwata mwanya wa kwĩmanyĩsya ĩũlũ wa Ngai?

No tũkwate ũsũngĩo ndetonĩ ila Yesũ watavisye kĩla kĩng’endilĩ mambĩtwe ĩmwe. Mũndũ ũsu eeie Yesũ atĩĩ: “Wĩndilikana yĩla wĩvika ũsumbĩnĩ waku.” Yesũ amwĩie ata? “Nĩ w’o nĩngũkwĩa ũmũnthĩ, ũkeethĩwa vamwe nakwa Nthĩ Nzaũ.”—Luka 23:39-43, NWT.

Syo ndeto isu syĩonany’a kana Yesũ athie mũndũ ũsu thayũ wa ĩtunĩ? Aiee. Mũndũ ũsu ndaĩ aaĩsa ‘kũsyawa ĩngĩ’ na manzĩ na veva, na ũu waĩ ũndũ wa lasima nĩ kana mũndũ alike Ũsumbĩnĩ wa ĩtu. (Yoana 3:3-6, The Holy Bible in Current Kikamba Language) Vandũ va ũu, Yesũ athie kĩng’endilĩ kĩu thayũ ĩngĩ nthĩnĩ wa Nthĩ Nzaũ. Nũndũ mũndũ ũsu aĩ Mũyuti, nĩvatonyeka ũkethĩa nĩweesĩ Nthĩ Nzaũ nũndũ wa maũndũ ala mawetetwe ĩvukunĩ ya mbee ya Mbivilia ĩũlũ wa mũũnda wa Eteni. (Mwambĩlĩlyo 2:8) Ndeto sya Yesũ nĩsyamũnengie wĩkwatyo wa kana akathayũũkw’a ekale ĩũlũ wa nthĩ yĩ nzaũ.

Mbivilia nĩtwathĩte kana kũkeethĩwa “ũthayũũkyo wa ala alũngalu, na ala mate alũngalu.” (Meko ma Atũmwa 24:15) Andũ ala mataamanya kwenda kwa Ngai nĩmo metĩtwe “ala mate alũngalu.” Yesũ akathayũũkya kĩla kĩng’endilĩ kĩtaĩ kĩlũngalu kyaneenie nake, vamwe na andũ milioni mbingĩ kana mbilioni mbingĩ, ala makwie matambĩte kwĩmanyĩsya ĩũlũ wa kwenda kwa Ngai. Ĩtina wa ũu, makamanyĩw’a ĩũlũ wa kwenda kwa Ngai, na makeethĩwa na mwanya wa kwonany’a kana nĩmamwendete Ngai kwa kũkwata mĩao yake.

ĨLA ALA MATE ALŨNGALU METHAYŨŨKW’A

Yo ĩla ala mate alũngalu methayũũkw’a, makasilĩlwa kwĩanana na maũndũ ala meekie matanamba kũkw’a? Aiee. Nĩkĩ? Nũndũ ĩandĩko ya Alomi 6:7 yaĩtye atĩĩ: “Ũla wakwie nũtalĩtwe ta ũte na naĩ.” Ala mate alũngalu makeethĩwa maĩvĩĩte naĩ syoo kwĩsĩla kĩkw’ũ kyoo. Kwoou makasilĩlwa kwosana na maũndũ ala makeka mathayũũkw’a, ĩndĩ ti kwĩanana na maũndũ ala meekie ĩla mateesĩ kwenda kwa Ngai. Makatetheka ata?

Ĩtina wa ũthayũũkyo, ala mate alũngalu makeethĩwa na mwanya wa kwĩmanyĩsya mĩao ya Ngai, ĩla ĩkavuanw’a kwĩsĩla kũvuwa kwa ala mavuku ma ngelekany’o. Makasilĩlwa “kwĩanana na meko moo” na ũu nĩ kwasya kana makasilĩlwa kwosana na ethĩwa makakwata mĩao ya Ngai kana maikamĩkwata. (Ũvuan’yo 20:12, 13) Aingĩ ma ala mate alũngalu nĩ ĩndĩ makethĩwa makwata mwanya woo wa mbee wa kwĩmanyĩsya na kwĩka kwenda kwa Ngai, nĩ kana methĩwe matonya kũkwata thayũ ũtathela ĩũlũ wa nthĩ.

Ũmanyĩsyo ũsu wa Mbivilia nũtetheesye andũ aingĩ mambĩĩe kũmũĩkĩĩa Ngai ĩngĩ. Yeong Sug nĩ ũmwe wa ala matethekete. Eanie e Mũkatholeki wĩyumĩtye vyũ. O na andũ amwe ma mũsyĩ woo maĩ avea. Nũndũ nĩwendaa kũtw’ĩka sisita, nĩwaendie kwĩkala vala masisita mekalaa. Ĩndĩ, ĩtina nĩwesie kuma vo nũndũ ndaaendeew’a nĩ maũndũ ala woonie mayĩkwa. Ũndũ ũngĩ nĩ kana ndaaendeew’a nĩ ũmanyĩsyo wa kana andũ makavĩvĩw’a ĩianĩ ya mwaki nũndũ oonaa kwĩka ũu kũte ũndũ wa wendo na kũte ũsili wa katĩ.

Ĩndĩ ĩtina Ngũsĩ ĩmwe ya Yeova nĩyamwonisye Yeong Sug ndeto ii syĩ nthĩ wa Mbivilia: “Nũndũ ala me thayũ mesĩ makakw’a; ĩndĩ ala akw’ũ matyĩsĩ ũndũ o na wĩva, o na mati na ĩtũvi ĩngĩ: nũndũ kũlilikanwa kwoo nĩkũlaa.” (Mũtavan’ya 9:5) Ngũsĩ ĩsu nĩyamũtetheeisye aelewa kana andũ ala make makwie tene mai ĩianĩ ya mwaki. Vandũ va ũu, nĩwamanyie kana makomete me akw’ũ, meteele kũthayũũkw’a.

Nũndũ Yeong Sug nĩwamanyie kana andũ aingĩ mayaaĩw’a ũw’o wa Mbivilia, nĩwatwie kwĩanĩsya ndeto ii sya Yesũ syĩ ĩandĩkonĩ ya Mathayo 24:14: “Na ũvoo ũũ mũseo wa ũsumbĩ ũkatavanw’a nthĩ yonthe wĩthĩwe ũkũsĩ kwa mbaĩ syonthe; na ĩndĩ mũminũkĩlyo ũkyũka.” Ũmũnthĩ ũũ atavanasya ĩũlũ wa ũvoo mũseo na aitetheesya andũ methĩwe na wĩkwatyo mũseo vyũ ũla wĩ Mbivilianĩ.

“NGAI TI MWENDEESYA WA ANDŨ”

Mbivilia ĩtũtavasya atĩĩ: “Ngai ti mwendeesya wa andũ; ĩndĩ mbaĩnĩ syonthe ũla ũmũkĩaa we, na kwĩka ũlũngalu, nĩwĩtĩkalawa nĩwe.” (Meko ma Atũmwa 10:34, 35) Ũsu nĩw’o ũsili wa katĩ ũla tũtonya kwenda kuma kwa Ngai nũndũ “nĩwendete ũlũngalu na ũsili wa katĩ.”—Savuli 33:5.