We Nũtũlaa Ngai Mũtĩ?

“NĨKĨ no inyie? Nĩkĩ Ngai weetĩkĩlile ũndũ ũũ ũngwate?” Asu nĩ makũlyo mathĩnasya mũndũũme wĩtawa Sidnei, wĩ myaka 24, wa nthĩ ya Brazil. Ĩtina wa kũũmĩa mũno e mũsiũũkonĩ (waterslide), weethĩie no nginya akasukumawa na kĩvĩla kya ndĩa.

Mathĩna ala maumanaa na maũndũ ta kũũmĩa, mowau, kũkw’ĩĩwa nĩ mũndũ tũmwendete, mĩisyo, kana kaũ, no matume andũ mambĩĩa kũtũla Ngai mũtĩ. Na ũu ti ũndũ wa ũsengy’a. Nĩkĩ? Nũndũ o na ĩvinda ya tene mũndũũme ũmwe weetawa Yovu nĩwakwatiwe nĩ maũndũ maingĩ mathũku maatĩanĩe. Na ũu nĩwatumie amũtũla Ngai mũtĩ kwa kũlea kũmanya ayasya atĩĩ: “Nĩkwĩkaĩlaa, na ndũnzũngĩaa: Nĩũngamaa, naku nũngeteeaa. Nũalyũkĩte wĩthĩwe mwai kwakwa; nũnthĩnasya na vinya wa kw’oko kwaku.”—Yovu 30:20, 21.

Yovu ndeesĩ vala mathĩna asu maumĩte, o na ndeesĩ nĩkĩ mamũkwatie na nĩkĩ meetĩkĩlĩtw’e mamũkwate. Ũndũ wa kũtanĩthya nĩ kana Mbivilia nĩtũeleetye nĩkĩ tũkwatawa nĩ maũndũ mathũku, na ĩkatwony’a ũndũ tũtonya kwĩka ĩla matũkwata.

YO NĨ KWENDA KWA NGAI ANDŨ MATHĨNAE?

Mbivilia yaĩtye ũũ ĩũlũ wa Ngai: “Wĩa wake nĩ mwĩanĩu; nũndũ nzĩa syake syonthe nĩ ndũngalu: Ngai wa kĩthito na ũte na naĩ, Nake nĩ wa w’o na mũlũngalu.” (Kũtũngĩlĩlwa Kwa Mĩao 32:4) Na nũndũ ũu nĩw’o vailyĩ, yo no twasye kana Ngai wa “w’o na mũlũngalu” no ende andũ mathĩne kana akatũmĩa mĩisyo nĩ kana amakany’e kana amathesye?

Kĩvathũkany’o na ũu, Mbivilia ĩtũtavasya atĩĩ: “Mũndũ o na wĩva atatwa ndakasye, Nĩngũtatwa nĩ Ngai; nũndũ Ngai ndatonya kũtatwa nĩ ũthũku, o nake mwene ndatataa mũndũ.” (Yakovo 1:13) O na ĩngĩ, Mbivilia ĩtũmanyĩasya kana Ngai anengie mũndũ mwambĩlĩĩlyo mũseo vyũ. Anengie andũ ma mbee, Atamu na Eva, vandũ vaseo va kwĩkala, syĩndũ syonthe ila maĩ na vata nasyo, na amanenga wĩa mũseo wa kũtethya. Ngai ameie atĩĩ: “Ongelekai, mwingĩve, musũsye nthĩ, na kũmĩkĩlya vinya.” Vate nzika, Atamu na Eva mayaĩ na kĩtumi o na kĩmwe kya kũlea kũmwĩw’a Ngai nũndũ maĩ eanĩe.—Mwambĩlĩlyo 1:28.

Ĩndĩ ũmũnthĩ maũndũ me kĩvathũkany’o vyũ na ũndũ mailyĩ mwambĩĩonĩ. Maũndũ ala methĩĩtwe mayĩkĩka kwa ĩvinda yĩasa monanĩtye kana mathĩna ala makwataa andũ mekĩte kwingĩvĩĩa. Na ũu wosanĩte nesa vyũ na ndeto ii syĩ Mbivilianĩ: “Syũmbe syonthe ilumaa na kwaũnyw’a nĩ woo vamwe kũvika o na yu.” (Alomi 8:22) Nĩkĩ maũndũ methĩĩtwe mailyĩ ũu?

NĨKĨ ANDŨ MATHĨNAA?

Nĩ kana tũmanye nĩkĩ andũ mathĩnaa no nginya tũsyoke ĩtina nginya vala mathĩna mambĩĩie. Matongoew’e nĩ mũlaĩka ũla wamũleile Ngai, ũla wesie kwĩtwa Satani, ũla Ndevili, Atamu na Eva nĩmaleile kũatĩĩa mwĩao ũla Ngai wamanengete. Mwĩao ũsu woonanaw’a nĩ ndeto ila Yeova wamatavisye, kana mayaaĩle kũya ũsyao wa “mũtĩ wa kũmanyĩthya ũseo na ũthũku.” Ndevili atavisye Eva kana malea kũmwĩw’a Ngai maikakw’a, na kwa nzĩa ĩsu oonany’a kana Ngai aneenaa ũvũngũ. O na ĩngĩ, Satani oonanisye kana Ngai ndendaa andũ mayĩthĩwa na ũthasyo wa kwĩnyuvĩa ũseo na ũthũku. (Mwambĩlĩlyo 2:17; 3:1-6) Satani oonanisye kana mũndũ aĩ atonya kũendeea nesa atasumbĩkĩtwe nĩ Ngai. Maũndũ asu onthe maumĩlilye ĩkũlyo ya vata mũno. Ĩkũlyo yĩu nĩ, We Ngai nĩwaĩle kũsumbĩka?

O na ĩngĩ Ndevili nĩwaumĩlilye ũndũ ũngĩ. Aisye kana andũ maithũkũmaa Ngai nũndũ nĩmamwendete. Ndevili atavisye Ngai ũũ ĩũlũ wa mũthũkũmi wake mũĩkĩĩku Yovu: “Ndwĩkĩĩte wiio kũmũthyũlũlũka, o na nyũmba yake, na kyonthe kĩla wĩ nakyo, ngalĩ syonthe? . . . Ĩndĩ tambũũkya kw’oko kwaku yu, noikiita kyonthe kĩla wĩ nakyo, nake akakũuma ũthyũnĩ waku.” (Yovu 1:10, 11) O na kau Satani aneenaa ĩũlũ wa Yovu, ndeto syake syoonanisye kana andũ maimũthũkũmaa Yeova nũndũ nĩmamwendete.

ĨTAMBYA YĨLA NGAI WOOSIE

Ngai aaĩle kwĩka ata nĩ kana aĩkĩĩthye kana maũndũ asu Satani waumĩlilye maĩ ma ũvũngũ? Nũndũ Ngai ethĩawa e mũĩ ĩvinda yonthe, nĩweesĩ ũndũ ũtonya kwĩka nĩ kana andũ mamanye ũw’o wa maũndũ nesa. (Alomi 11:33) Nĩwatwie kũeka andũ mesumbĩke kwa ĩvinda nĩ kana mamanye nũũ ũla waĩlĩte kũsumbĩka.

Maũndũ mathũku ala maendeee ĩũlũ wa nthĩ meonany’a kana mũndũ nũemetwe vyũ nĩ kwĩsumbĩka. O vamwe na kũemwa nĩ kũete mũuo na ũtanu, silikalĩ sya nthĩ nĩsyanangĩte nthĩ vyũ. Na ũu wonanĩtye nesa vyũ ũw’o wa ndeto ii syĩ Mbivilianĩ: “Kũtongoesya matambya make kũti nthĩnĩ wa mũndũ ũla ũendaa.” (Yelemia 10:23) Nzĩa ya Ngai ya kũsumbĩka noyo ĩtonya kũete mũuo wa tene na tene, ũtanu, na ĩituma andũ maendeea nesa nũndũ kĩu nĩkyo kĩeleelo kyake.—Isaia 45:18.

Ngai akeanĩsya ata kĩeleelo kyake ĩũlũ wa andũ? Lilikana kana Yesũ amanyĩisye aatĩĩi make mavoyae ũũ: “Ũsumbĩ waku wũke. Kwenda kwaku kwĩke kũũ nthĩ o ta kũya ĩtunĩ.” (Mathayo 6:10) Vate nzika, Ũsumbĩ wa Ngai ũkavetanga mathĩna onthe. (Ndanieli 2:44) Maũndũ ta ũkya, ũwau, na kĩkw’ũ, makeethĩwa me maũndũ ma tene. Mbivilia ĩineenea andũ ala ngya yaĩtye kana Ngai “akavonokasya mũthĩni yĩla wĩkayaa.” (Savuli 72:12-14) O na kwa ala awau Mbivilia yathanĩte ũũ: “Ũla ũtwĩe kw’o ndakasya, Nyie nĩ mũwau.” (Isaia 33:24) Na kwa ala akw’ũ me kĩlilikanonĩ kya Ngai, Yesũ aisye: “Saa nĩwũkĩte, yĩla onthe ala me mbũanĩ makew’a wasya wake, namo makauma.” (Yoana 5:28, 29) Asu kwa w’o nĩ mawatho ma kũtwĩkĩa vinya!

ŨNDŨ ŨTONYA KŨEKA KŨMŨTŨLA NGAI MŨTĨ?

Ũla mũndũũme ũwetiwe vaaya mwambĩĩonĩ wĩtawa Sidnei, aisye ũũ myaka 17 ĩtina wa kũkwatwa nĩ mũisyo ũsu: “Ndyaaĩsa kũmũtũla Yeova Ngai mũtĩ nũndũ wa mũisyo ũsu, ĩndĩ no nasye kana mwambĩĩonĩ nĩnamũthatĩe. Ve mavinda amwe nĩw’aa nĩtũlĩkĩte ngoo mũno na nĩnĩĩaa nasũanĩa ĩũlũ wa wonzu wakwa wa mwĩĩ. Ĩndĩ o na ũu wĩ o vo, nĩnĩmanyĩĩtye kuma Mbivilianĩ kana mũisyo ũsu wangwatie ndwaĩ mũnzyũ wa Ngai. O tondũ Mbivilia yaasya, ‘ĩvinda na ĩvuso [“ũndũ ũtataĩĩwe,” NWT] nĩsyĩkĩkaa kwa onthe.’ Kũvoya Yeova vamwe na kũsoma Maandĩko amwe nĩkũtumĩte nĩthĩwa nĩ na vinya kĩ-veva na kũkatuma nĩthĩwa na woni ũla waĩlĩte.”—Mũtavan’ya 9:11; Savuli 145:18; 2 Akolintho 4:8, 9, 16.

Kũmanya nĩkĩ Ngai ũekete mathĩna maendeee na kana o mĩtũkĩ nũkũka kũmamina, nĩkũtũtetheeasya tũikamũtũle Ngai mũtĩ ũndũnĩ o na wĩva. Mbivilia nĩtũĩkĩĩthĩtye kana Ngai “nũmanengae ĩtuvi ala mamũmanthaa.” Vai mũndũ o na ũmwe wĩkwatasya Ngai na Mwana wake ũkasonoka.—Aevelania 11:6; Alomi 10:11.