Nĩkĩ Mbivilia Ĩtaanangĩka Kana Ĩkaminwa?

Mbivilia ndyaaminwa na nĩkyo kĩtumi ũtonya kũmĩkwata na kũmĩsoma. Na ĩla wakwata Mbivilia ĩalyũlĩtwe nesa, no wĩthĩwe na mũĩkĩĩo kana Maandĩko ala ũũsoma vau mayaavĩndũwa, ĩndĩ nĩmo ala maandĩkiwe nĩ aandĩki ma Mbivilia.a Ĩndĩ nĩkĩ ũmũnthĩ tũtonya kũkwata Mbivilia o na kau mavuku ma tene ala maandĩkawa maĩ matonya kwoa, andũ aingĩ maĩ matonya kũmyananga, na angĩ mendaa kũvĩndũa ũvoo ũla wĩ nthĩnĩ? Nĩkĩ Mbivilia nĩ ĩvuku ya mwanya mũno?

Amanyĩwʼa aingĩ ma Mbivilia nĩmetĩkĩlanaa na ndeto ii sya mũtũmwa Vaulo ũla waandĩkie atĩĩ: “Kĩla Ũandĩko nĩwaveveewe nĩ Ngai.” (2 Timotheo 3:16) Maĩkĩĩaa kana Mbivilia yaemie kũminwa nũndũ nĩ Ndeto ya Ngai na kana nĩwe wamĩsũvĩie. Ũla mũndũũme wĩtawa Faizal ũwetetwe mwambĩĩonĩ wa ĩkaseti yĩĩ, nĩwatwie kwĩka ũkunĩkĩli wa maũndũ asu kwa kwĩmanyĩsya Mbivilia. Maũndũ ala weemanyĩisye nĩmamũsengʼisye mũno. Ĩtina wa ĩvinda ĩkuvĩ, nĩwamanyie kana momanyĩsyo maingĩ ala mamanyĩawʼa ndĩninĩ ila syĩyĩtaa sya Kĩklĩsto maikwatĩkanaa Mbivilianĩ. O na ĩngĩ, nĩwendeeiwʼe nĩ ũndũ Mbivilia yĩeleetye moalyũku ala Ngai ũkeka ĩũlũ wa nthĩ.

Aĩtye atĩĩ: “Yu nĩnĩsĩ nesa kana Mbivilia nĩ mũthĩnzĩo kuma mwa Ngai.” Aendeee kwasya atĩĩ: “Ethĩwa Ngai e na vinya wa kũmba ĩtu na nthĩ, kwa wʼo no aemwe nĩ kũtũnenga ĩvuku na aiyĩsũvĩa nginya ũmũnthĩ? Tũkasya kana Ngai ndesa kwĩka ũu twĩthĩwa tũivanga kana nde vinya, nake nĩwe Mwene Vinya Wʼonthe! Nakwa ninyie ũũ nĩ kana nĩvange kana Ngai nde vinya?”—Isaia 40:8.