We Nĩwĩsĩ?

Ĩvinda ya tene mwaki wakuawa ata?

NGEWA ĩla yĩ ĩvukunĩ ya Mwambĩlĩlyo 22:6 yonanĩtye kana ĩla Avalaamu weeyũmbanasya nĩ kana akathembe nthembo kĩsionĩ kĩ vaasa, oosie “ngũ sya nthembo ya kũvĩvwʼa, amwaĩkya Isaka mwana wake; na akua kwʼokonĩ kwake mwaki na kavyũ; na maendanʼya me elĩ.”

Vai vandũ Maandĩkonĩ vonanĩtye ũndũ andũ makwatasya mwaki ĩvindanĩ ya tene. Ĩndĩ mũndũ ũmwe awetie ndeto ii aineena ĩũlũ wa kyalo kĩu kya Avalaamu na Isaka: “Vethĩwa vaĩ vinya mũno kũkua ũmũĩ kyalonĩ kĩasa ta kĩu.” Kwoou nĩvatonyeka ũkethĩa kĩla kĩneenewe ngewanĩ ĩsu nĩ kĩndũ kĩla kyatũmĩawa kũkwatya ũ mwaki.

Ĩndĩ andũ angĩ nĩmawetaa kana ndwaĩ ũndũ wĩ laisi kũkwatya mwaki ĩvindanĩ yĩu ya tene. Andũ moonaa wĩ ũndũ wĩ laisi kwoka mwaki kwa atũi, ethĩwa nĩvatonyeka, vandũ va kũtata kũkwatya mwaki no mo ene. Kwoou asomi aingĩ maĩkĩĩaa kana no kwĩthĩwa Avalaamu akuĩte kavisũ kasũnzũũlĩtwʼe na mũnyololo, kala katonya kwĩthĩwa kookeewe mwaki ũla makwatĩtye ũtukũ wa ĩyoo yĩu. (Isa. 30:14) Ĩla mũndũ ũkuĩte makaa makene na nzĩa ĩsu e savalĩnĩ, aĩ atonya kwakanyʼa mwaki mĩtũkĩ atũmĩĩte tũlũkũ tũmũ.