Makũlyo Kuma Kwa Asomi Maitũ

Yĩla Satani weeie Eva kana aya ĩtunda ya mũtĩ wa kũmanyĩthya ũseo na ũthũku ndakakwʼa, no twasye kana endaa kũmwĩkĩa yĩla yĩsilya yĩthĩawa na andũ aingĩ ũmũnthĩ ya kana mũndũ ethĩawa na thayũ ũtatonya kũkwʼa?

No twasye ũu ti wʼo. Ndevili ndaatavya Eva kana aya ĩtunda yĩla yavatanĩtwe nĩ Ngai mwĩĩ wake nĩwʼo ũkakwʼa, ĩndĩ ũyĩthĩa ve kĩndũ kĩ nthĩnĩ wake kĩtenekee kyauma na kyathi kwĩkala thayũ vandũ vangĩ (kĩla andũ amwe ũmũnthĩ maasya nĩ thayũ ũtatonya kũkwʼa). Satani aneenie na Eva atũmĩĩte nzoka amwĩa kana aya ĩtunda ya mũtĩ ũsu ‘ndakakwʼa’ nongi. Kwoou Satani avangie kana Eva eendeea kwĩkala thayũ, na aitanĩa maũndũ maseango kũũ nthĩ atasumbĩkĩtwe nĩ Ngai.—Mwa. 2:17; 3:3-5.

Ethĩwa ĩmanyĩsyo yĩĩ ya ũvũngũ ya kana mũndũ e thayũ ũtakusaa yĩyaambĩĩa mũũndanĩ wa Eteni, yambĩĩie ĩndĩĩ? Tũitonya kũweta nesa. Kĩla twĩsĩ nĩ kana ũthaithi wʼonthe wa ũvũngũ waminiwe nĩ ĩla mbua mbingĩ ya ĩvinda ya Noa. Nĩkwĩthĩwa Noa na mũsyĩ wake nomo maĩ athaithi ma wʼo ma Yeova na nomo mavonokie mbũa ĩsu, vai ũmwe woo waĩ atonya kũtwaĩĩsya momanyĩsyo ma ũvũngũ.

Kwoou ũmanyĩsyo ũla andũ mamanyĩasya ũmũnthĩ wa kana thayũ wa mũndũ ndũkusaa no nginya wĩthĩwe wambĩĩiwʼe ĩtina wa mbua ĩsu. Yĩla Ngai wathokoanisye kĩthyomo ndũanĩ ya Mbaveli andũ nĩmanyaĩĩkie “ĩũlũ wa nthĩ yonthe,” na kwoou no nginya methĩwe maendie na yĩsilya ya kana mũndũ e thayũ ũtatonya kũkwʼa. (Mwa. 11:8, 9) Ĩndĩ o na ũvũngũ ũsu wĩthĩwe wambĩĩie ĩndĩĩ, tũi na nzika kana “ĩthe wa ũvũngũ,” Satani ũla nĩwe Ndevili, nĩwe watumie wambĩĩa, na ndalea kwĩthĩwa atanie mũno kwona ũinyaĩĩka.—Yoa. 8:44.