Kũtũngĩĩa Ngwatanĩo Yaku na Yeova

KĨLA mwaka, aingĩ nĩmatũngawa kĩkundinĩ kya Kĩklĩsto na methĩawa me malondu ma vata mũno. Kwasũanĩa ũndũ kwĩthĩawa “ũtanu mwingĩ ĩtunĩ” yĩla ũmwe wasyoka! (Luka 15:7, 10) Ethĩwa wĩ ũmwe ũnatũngiwe, ĩkala ũte na nzika kana Yesũ, alaĩka, na Yeova mwene nĩmatanaa kwona ũnoosie ĩtambya ũlũmanyʼe na ũla wʼo ĩngĩ. Ĩndĩ nũtonya kũkomana na mawetu mana yĩla ũendeee kũtũngĩĩa ngwatanĩo yaku na Yeova. Mawetu asu nĩ ta meva, na nĩ kyaũ kĩtonya ũkũtetheesya ũmasinde?

NĨ MAWETU MEVA ŨTONYA KŨKOMANA NAMO?

Aingĩ nĩmekalaa makwʼĩte ngoo o na ĩtina wa kũtũngwa kĩkundinĩ. Nũtonya kwĩthĩwa wĩwʼaa o ta Mũsumbĩ Ndaviti. O na ĩtina wa kũekewa naĩ syake, aisye: “Naĩ syakwa ningwatĩte ũkethĩa o na nditonya kwona kĩndũ.” (Sav. 40:12, The Holy Bible in Current Kikamba Language; 65:3) Ĩtina wa mũndũ kũmũsyokea Yeova, nũtonya kwĩkala myaka mingĩ ayĩandũĩka kana ayĩwʼa nthoni. Kwasũanĩa ĩũlũ wa Isabelle, ũla wekalile e mũtenge kwa myaka mbee wa 20.a Aisye, “Neewʼaa ve vinya mũno kũĩkĩĩa kana Yeova no andekee.” Wakwʼa ngoo, nĩ laisi mũno ngwatanĩo yaku na Yeova ĩkonza ĩngĩ. (Nth. 24:10) Kwoou mwa ndũketĩkĩle kĩu kĩkĩke.

Kĩngĩ kĩemeeaa angĩ nĩ kũsũanĩa kĩthito kĩla maĩlĩte kwĩkĩa mayĩsa kũtwʼĩka nĩmeethĩwa na ngwatanĩo nzeo na Yeova ĩngĩ. Mwana-a-asa wĩtawa Antoine atũngwa aisye, “Maũndũ onthe ala neemanyĩĩtye na neekaa nĩ Mũklĩsto nĩ ta maĩ moolile.” Kĩu no kĩtume amwe makĩa kwĩlikya maũndũnĩ ma kĩ-veva na ngoo yonthe.

Kwasũanĩa nyũmba yaanangwa mũno nĩ kĩuutani. Mwene no akwʼe ngoo mũno asũanĩa ĩvinda na kĩthito kĩla kĩkwendeka ayĩsa kũtwʼĩka nĩwamĩtũngĩĩa. O ta ũu, ethĩwa ngwatanĩo yaku na Yeova nĩyaanangiwe nĩ naĩ ngito, nũtonya kwĩwʼa wĩ wĩa mwingĩ kũmĩtũngĩĩa. Ĩndĩ manya kana ndwĩtethya wĩa ũsu wĩ weka.

Yeova atwĩĩte atĩĩ: “Ũkai yu, tũsũanĩe vamwe.” (Isa. 1:18) Yu tũũneena, ‘nũsũanĩĩte vamwe’ na Yeova, kana kwa ndeto ingĩ, nĩwĩkĩĩte kĩthito ũkalũnga maũndũ vamwe nake. Yeova nũkwendete mũno nũndũ wa kĩthito kĩu. Kwasũanĩa ũndũ ũũ: Nũndũ wa ĩtambya yĩu wosete, Yeova e na kĩtumi kĩanu kya kũĩkĩĩthya kana Satani nĩ mũkengani!—Nth. 27:11.

Ĩtambya yĩu wosete nĩyĩtumĩte ũmũthengeea Yeova, nake nũkwathĩte kũũthengeea. (Yak. 4:8) Ĩndĩ o na kau ala angĩ nĩmeũtana kwona ũnatũngiwe, kĩu kĩitoetye. No nginya ũendeee kwĩkĩa kĩthito ũmwende mũnango Ĩthe waku na Mũnyanyau, Yeova. Nĩ kyaũ kĩtonya ũkũtetheesya?

ĨVANGĨĨE MAŨNDŨ ŨTONYA KWĨANĨSYA

Tata wĩvangĩĩe maũndũ ũtonya kwĩanĩsya. Nũtonya kwĩthĩwa ũtaaũlwa nĩ maũndũ ma mũsingi ala weemanyĩisye ĩũlũ wa Yeova na mawatho make ma ĩvinda yũkĩte. Ĩndĩ, nĩwaĩle kwĩkĩa kĩthito ũsyokee kĩmanyĩo kyaku kya kwĩka maũndũ ta kũtavanyʼa ũvoo mũseo, kũthi maũmbanonĩ, na kũtindanyʼa na ana-a-asa na eĩtu-a-asa. Kwasũanĩa maũndũ aa ũtonya kwĩvangĩĩa.

Mũvoyae Yeova kĩla ĩvinda. Ĩthe waku wa ĩtunĩ nĩwĩsĩ kana no ũemwe nĩ kũmũvoya nũndũ wa kwĩwʼa ũiandũĩka mũno. (Alo. 8:26) Ĩndĩ ‘mũvoye na kĩthingʼĩĩsyo,’ na ũimũtavya ũndũ ũkwĩwʼa ũyenda mũtume ndũũ ĩngĩ. (Alo. 12:12) Andrej aĩtye ũũ: “Naandũĩkaa mũno na neewʼaa nthoni mbingĩ vyũ. Ĩndĩ kĩla ĩvinda navoya, natiawa nĩwʼĩte kavaa. Natiawa nĩ na mũuo mwingangĩ wa kĩlĩko.” Ethĩwa ndwĩsĩ wĩvoya wasye ata, no ũsisye mboya ila Mũsumbĩ Ndaviti wavoyie eelila, syĩ nthĩnĩ wa Savuli 51 na 65.

Ĩmanyĩasye Mbivilia ũteũtĩĩa. Kĩu kĩkalũlũmĩĩlya mũĩkĩĩo waku na kĩyĩũtetheesya ũmwende Yeova mũnango. (Sav. 19:7-11) Mwana-a-asa wĩtawa Felipe easya: “Kĩla kyatumie nonza kĩ-veva na nĩmũvĩtĩsya Yeova, nĩ kwĩthĩwa nde na mũvango mũseo wa kwĩmanyĩsya Mbivilia. Na nũndũ ndyendaa kũmũvĩtĩsya Yeova ya kelĩ, nĩnatwie kwĩthĩwa na mũvango mũseo wa kwĩmanyĩasya ndeũtĩĩa.” O naku no wĩke oou. Wĩona ata ũkakũlya mũnyanyau mũimu kĩ-veva aũtetheesye kũmanya nĩ maũndũ ta meva ũtonya kwĩmanyĩsya?

Ĩkĩa kĩthito ũtume ndũũ ĩngĩ na ana-a-asa na eĩtu-a-asa. Amwe masyoka methĩawa na wia mayona ala angĩ kĩkundinĩ ta meũmosa naĩ. Kwa ngelekanyʼo, Larissa aisye: “Neewʼaa nthoni mbingĩ mũno. Noonaa navalũkilye kĩkundi. Na nekalile ĩvinda yĩasa ndyĩwʼa ũu.” Mwa ĩkala ũte na nzika o na vanini kana atumĩa na Aklĩsto ala angĩ aimu kĩ-veva me na wendi wa kũũtetheesya ũtũngĩĩe ngwatanĩo yaku na Yeova. (Sisya ĩsandũkũ “Atumĩa Matonya Kwĩka Ata?”) Nĩmeũtana kwona ũnasyokie, na meenda ũendeee nesa!—Nth. 17:17.

Nĩ kyaũ kĩtonya ũkũtetheesya wĩthĩwe na ngwatanĩo ndũmu na kĩkundi? Kwatĩanĩa vyũ na ana-a-asa na eĩtu-a-asa maũndũnĩ ala mekwĩka, ta kũthi maũmbanonĩ na kũtavanasya. Kwĩka ũu kũkaũtethya ata? Felix aĩtye: “Kĩkundi kyaĩ na mea maingĩ ma kwona ndisyoka. Kyatumie nĩmanya kana nĩ wa vata. Kĩla ũmwe nĩwatumie nĩwʼa ta nĩ mũsyĩ, atuma nĩĩkĩĩa kana Yeova nũmbekeete, na kana no nĩendeee kũmũthũkũma.”—Sisya ĩsandũkũ “Ũtonya Kwĩka Ata?”

NDŨKAKWʼE NGOO!

Satani eendeea ũkũetee iuutani sya ngelekanyʼo nĩ kana akwonzye wĩthĩe ndũtonya kũtũngĩĩa ngwatanĩo yaku na Yeova. (Luka 4:13) Ĩyũmbanĩsye iuutani isu kwa kwĩyaka kĩ-veva oyu.

Yeova athanie ũũ ĩũlũ wa malondu make: “Ngamantha ũla waĩte, na ngatũnga ũla walũngilwʼe, na ngooveea ũla watũlĩtwe, na ngeekĩa vinya ũla wawaie.” (Esek. 34:16) Yeova nũtetheetye aingĩ mũno makatũngĩĩa ngwatanĩo yoo nake. Ĩthĩwa na mũĩkĩĩo vyũ kana o naku nũkwenda kũũtetheesya ũendeee kũlũlũmĩĩlya ngwatanĩo yaku nake.

Atumĩa Matonya Kwĩka Ata?

Atumĩa nĩmo methĩawa na kĩanda kĩla kĩnene kya kũtetheesya ala matũngwa matũngĩĩe ngwatanĩo yoo na Yeova. Kwasisya maũndũ ala matonya kwĩka.

Kũmaĩkĩĩthya nĩmendetwe. Mũtũmwa Vaulo nĩweesĩ kana mũndũ ũla wasyoka no ‘aemeewe nĩ kyeva.’ (2 Ako. 2:7) Nũtonya kwĩkala aiandũĩka kana ayĩwʼa nthoni. Vaulo eeie kĩkundi atĩĩ: “Mwaĩlĩte kwĩthĩwa mwĩyũmbanĩtye kũmũekea na mũimũkiakisya.” Ala matũngwa methĩawa na vata wa kũĩkĩĩthwʼa nĩmendetwe mũno nĩ Yeova na athaithi ala angĩ. Kwoou atumĩa matata kĩla ĩvinda mamakathe na maimatethya, no mamasũvĩe maikese kũkwʼa ngoo.

Kũvoya vamwe namo. “Mboya ya kĩthingʼĩĩsyo ya mũndũ mũlũngalu nĩtethasya mũno.” (Yak. 5:16) Ũla mwĩĩtu-a-asa wĩtawa Larissa aĩtye: “Nĩnatavisye atumĩa maũndũ ala matumaa nĩya nzika na nĩlikwa nĩ wia. Namo nĩmavoyaa vamwe nakwa na kwondũ wakwa. Kĩu nĩkyatumie nĩmanya kana atumĩa mainthatĩe. Mendaa mũno kũndetheesya nĩtũngĩĩe ngwatanĩo yakwa na Yeova.” Nake mwana-a-asa wĩtawa Theo easya, “Mboya sya atumĩa nĩsyandĩkĩĩthisye vyũ kana Yeova nũmbendete mũno na nũsiasya ũseo wakwa, ĩndĩ ti ũthũku tũ.”

Kũtuma ndũũ namo. Ala matũngwa nĩmethĩawa na vata wa kũkwata anyanya kĩkundinĩ. Mũtumĩa wĩtawa Justin aĩtye: “Wakwata mwanya wa kũmathokya mũtavanyʼe ĩmwe, ĩka ũu, na mũno mũno, mantha mwanya wa kũmathokea kwoo. Nĩ ũndũ wa vata vyũ ũtume ndũũ namo!” Mũtumĩa ũngĩ wĩtawa Henry easya, “Ala angĩ kĩkundinĩ moona atumĩa mayĩkĩa kĩthito matume ndũũ na ala matũngwa, o namo makendaa kwĩka tamo.”

Kũmatetheesya memanyĩasye. Mũnyanya mũimu kĩ-veva no atetheesye ũla watũngwa ethĩwe na mũvango mũseo wa kwĩmanyĩasya. Mũtumĩa wĩtawa Darko aĩtye: “Nĩnendete kũmatavya maũndũ ma vata ala nonie ndyĩmanyĩsya, na nĩnĩekaa mone ũndũ ndanĩaa mũno kwĩmanyĩsya Mbivilia. O na nĩnĩmanthaa ilungu imwe mavukunĩ maitũ tũkemanyĩsya ĩmwe.” Mũtumĩa ũngĩ wĩtawa Clayton aĩtye, “Nĩmekĩaa vinya mamanthe ngewa syĩ Mbivilianĩ sya andũ makwatiwe nĩ maũndũ ala mamakwatĩte.”

Kwĩthĩwa me aĩthi aseo. Ala matũngwa nĩmonete atumĩa maianĩsya kĩanda kyoo ta asili. Ĩndĩ yu atumĩa maĩle kũmatetheesya mamonae ta aĩthi. (Yel. 23:4) Kwoou inywʼĩ atumĩa, ĩthĩwai mwĩ na mĩtũkĩ ya kũmethukĩĩsya na kũmakatha. Eaai ngewa namo. Kwoona kĩĩ mũtumĩa wĩtawa Marcus wĩkaa yĩla mathokea mũndũ mamwĩkĩe vinya: “Nĩnĩsũanĩaa ĩandĩko ĩna nĩ namo, ngamakatha, na ngamaĩkĩĩthya kana nĩtũmendete mũno nũndũ wa kĩthito kĩla maneekĩie masyoke, na kana o nake Yeova nũmendete mũno nũndũ wa kĩthito kĩu. Tũitaanĩsya, tũtiaa twavanga yĩla tũũmathokea ĩngĩ.”

a Masyĩtwa kĩlungunĩ kĩĩ nĩ mavĩndũe.